እንታይ ገደሰካ ዲኻ ዝበልካኒ
ትም ዘይበልኩ ህዝበይ እንዳተበደለኒ
ንሓቂ ብቁሉዕ ክክሕዳ ትደልየኒ
እምበለይ ኣነስ ከይሰምዓካ ሕሩም ይኹነኒ::
ኣብ ጽመዋ ዝቦቐለት ኣውሒ
ብዓቲ ዝወለደ ከውሒ
‘ኣውሒ ሰይጣን’ ‘ከውሒ ሰይጣን’
ተባሂሉ ክጽዋዕ ውጽዋይስ ሰሚዕና
ካብ ኣቦና ኣባሓጎና
ሰይጣን ግን ኣይረኣየን ዓይንና።
ሳይንስ ዘይኣምን ትምክሕቲ ቀለቡ
ምሁር ምስ ዝርኢ ዝቖስል ልቡ
ብሱሱዕ ቅንኢ መንፈሱ ተሰሊቡ
ኣቐዲሙ ኣጥፊኡዎም በላሕቲ ቆላሊቡ
ሓደሽቲ ከይፈርዩ ተንኮል ሓሲቡ
ንዕውር ኣንቍሩስ እንታይ’ዩ መኽሰቡ::
ምራቕ ንእስነተይ ዝሰተኺ ጎርዞ
መን ኣጋግዩኪ ልቢ ከይኣዘዞ
ግደይስ ሂበኪ ግዴኺ ተሪፉ
ጣዕሳ የብለይን እንቋዕ ኣይበደልኩ
ትማል ሓሊመ ከይደሀ፡ ኣንደበቱ ዝገረዘ
ከይርእይ፡ የዒንቱ ዝዓመተ
ከይሰምዕ፡ ኣእዛኑ ዝደፈነ
ከይሙጉት፡ ኣንደበቱ ዝተረትዓ
ከይልሀ፡ ወኑ ዝቐተለ
ኣሎ ዝብልዎስ፡
ሞይቱ እንድዩ ኣብ ህላወ፡
ሎሚ 21 ሰነ ኣብ ቴለቪዥን ኤርትራ ብዛዕባ ስዉኣት ኣብ ዝቐረበ መደብ ሓንቲ ኣደይ ጉዕሽ ዝተባህለት 5 ኣብ ግዜ ሓርነታዊ ቓልሲ 2 ድማ ኣብ’ዚ ዳሕረዋይ ኵናት፡ ብጠቕላላ 7 ደቃ ዝተስዉኡዋ ውጽዕቲ ኤርትራዊት ኣደ ስውኣት “እቖርር ኣለኹ!” ኢላ ድሕሪ ምዝራባ ዝተደርሰት ግጥሚ።
ኤርትራና ኮይኑኪ ዲኺ ትም ክትብሊ
ካልእ ‘ተተረፈስ እህህ እንዶ በሊ
ኣሕሊፍኪ ሃብዩ ‘ዚ ርጉም ቀንጻሊ
ክትሓረልና መታን ናይ’ዚ ርጉም ቆጽሊ።
ኣንቱም ሰባት፡
ካብ ምንባር ኣብ‘ዚ ኸዳዕ ዘበን
ዘየጽንዕ ኪዳን ዘየኽድን ሓበን
እንተንሓልፍ ምስ ተመስገን
እምበር ዶ ኣይምሓሸን?
ኣቤት ‘ወ!
ምደሓንና ካብ ንብዓትን ቃንዛን
ምርቓ ምበር መርገም ኣይነበረን
ኣብ’ዚ ጠላም ዘበን
መስዋእቲ’ዩ በለጽ ‘ቲ ህይወት ኣይኮነን!