ብወግዒ ብዘይተፈልጠ ምኽንያት ብምልካዊ ስርዓት ኢሳይያስ ኣብ ጽኑዕ ቤትማእሰርቲ ተመቝሑ ን15 ዓመታት ክሳቐ ዝጸንሐ ምኩር ፓይሎት ዕባይ ቤት ትምህርቲ ሰውራ ደጀን ዓንደ ሕሸል፣ ካብቲ ኣብ ኣስመራ ዝርከብ ጽኑዕ ቤትማእሰርቲ፣ ካርሸሊ፣ ፈንጢሱ ምስ ወጽአ ተሸሪቡ ከምዘሎ፣ እቶም ክረኽቡዎ ንክልተ ሰሙን መመላእታ ሸበድበድ ክብሉ ንኣስመራን ኤርትራ ብሓፈሻን በጽቢጾማ ዝቐነዩ ልኡኻት ምልካዊ ስርዓት ኢሳይያስ ‘ውን ተስፋ ናብ ምቝራጽ ገጾም በጺሖም ምህላዎም ምንጭታት ኣሰና ሓቢሮም።

ብመሰረት እቲ ሓበሬታ፣ ቅድሚ ክልተ ሰሙን ሓደ ንጉሆ ካብ ማእከላይ ቤትጽሕፈት ኣብያተ ማእሰርቲ ዝመጽአ ሓላፊ ናብ ካንሸሎ ካርሸሊ ብመኪናኡ ብምእታው፣ ከም ልሙድ ቆጸራ እሱራት እናካየደ ከሎ፣ ማዕጾ ናይታ መኪና ከምዘይተዓጽወ ዘስተብሃለ ደጀን፣ ብናህሪ ናብታ መኪና ኣትዩ፣ ሞተረ ብምልዓል ማዕጾ ፈንጢሱ ጽርግያ ኣኽርያ ሒዙ ከምዘምለጠ፣ ነታ መኪና ኣብ ከባቢ ምህራም ጭራ ገዲፉዋ ከምዝተሸርበ ይግለጽ።

ፓይሎት ደጀን፣ ካብቲ ቤትማእሰርቲ ፈንጢሱ ምስ ወጽአ ብኡንብኡ ናብ ጻዕቂ መካይን ስለዝተጸንበረ እቶም ቅጽበታዊ ስጉምቱ ሃንደበት ዝኾኖም ዋርድያታት ክትኩሱሉ ኣይከኣሉን።

ካብታ መዓልቲ እቲኣ ንደሓር ብሎኮታት ኣስመራ፣ ከም ብዓል ተሰነይ ዝኣመሰሉ ኣብ ዶባት ዝርከቡ መሰጋገሪታትን ተዓጽዮም ልኡኻት ምልካዊ ስርዓት ኢሳይያስ ጽዑቕ ተፍትሽ ከካይዱ ከምዝቐነዩ፣ ህዝቢ ኣስመራ ‘ውን እንታይ ተረኺቡ ኢሉ ደንጽዩዎ ከምዝቐነየ ተፈሊጡ።

ስርዓት ኢሳይያስ ኣብ ኣስመራ ንደጀን ምርካቡ ምስተሓለለ፣ ነቲ ጭውያ ኤርትራውያን ሳዕሪሩሉ ኣብ ዝነበረ እዋን ነጻ ገይሩዎ ዝነበረ ‘ኬላታት’ እንደገና ዓጽዩ፣ መካይን ኣብ ምፍታሽ ተዋፊሩ ቀንዩ። ይኹን’እምበር ኣብዚ እዋን’ዚ እቲ ስርዓት ንደጀን ንምርካብ ከካይዶ ዝጸንሐ ጻዕሪ ተስፋ ኣብ ምቝራጽ ከምዝርከብ እቲ ሓበሬታ የመልክት።

እቲ ኣብ መጋቢት 1999 ብምልካዊ ርዓት ኢሳይያስ ተኣሲሩ፣ ብዘይፍርዲ ኣብ ቤትማእሰርቲ ክበሊ ዝጸንሐ ፓይሎት ደጀን ዓንደ ሕሸል ካብ ወለዱ ተጋደልቲ ኣቶ ዓንደ ሕሸልን ካብ  ወ/ሮ ስላስን ብ1975 ተወሊዱ፡ ብህጻኑ ኣብ ቤትምህርቲ ሰውራ ዓብዩ፡፡ ወላዲኡ ኣቶ ዓንደ ሕሸል ቅድሚ  ኤርትራ ካብ ባዕዳዊ መግዛእቲ ሓራ ምውጽኣ ኣብ ክፍሊ መጎዓዝያ ህዝባዊ ግንባር ሓርነት ኤርትራ ብዝለዓለ ሓልፍነት ንነዊሕ ዓመታት ዝተቓለሰ ገዲም ተጋዳላይ እዩ፡፡

ኣብ 10ይ ዓመት ማእሰርቱ፣ ንደጀን ብዝምልከት ብ2009 ኣብ መርበብ ሓበሬታ ኣሰና ኣውጺእናዮ ዝነበርና ዛንታ ንምንባብ ኣብዚ ጠውቑ።