እቲ ን 15 ዓመታት ብዘይ ገበንን ፍርድን ኣብ ማሕዩር ምልካዊ ስርዓት ኢሳይያስ ክሳቐ ጸኒሑ ብጅግንነት ምቑሕ ናይቲ ጨካን ስርዓት ሰይሩ ብትብዓቱን ብልሓቱን ነጻ ዝወጽአ ፓይሎት ደጀን ዓንደ ሕሸል ምስ ድምጺ ኣሰና ብዝገብሮ ዘሎ ግሉጽን ዓሚቝን ተኸታታሊ ቃለመጠየቕ ንባርባርነትን ውዲትን ኢሳይያስን ስርዓቱን ዝገብሮ ዘሎ ጽጹይ ምቅላዕ ኣብ ውሽጥን ወጻእን ውዕዉዕ ተሰማዕነት ብምርካቡ ዝሰንበደ ሽፍታ ስርዓት ኢሳይያስ፣ ነቲ ኣብ ህዝቢ ሓዲሩ ዘሎ ቁጥዐን ነድርን ንምዝሕሓል መድሓኒ ገጽ ንምርካብን ናይ ጸለመ ፕሮፖጋንዳ ይኣልም ከምዘሎ ምንጭታት ካብ ኣስመራ ሓቢሮም።

ምልካዊ ስርዓት ኢሳይያስ ሎሚ ቕነ ናይ ካድረታቱ ጸበብቲ ኣኼባታት ብምክያድ፣ ፓይሎት ደጀን ምስ CIA ርክብ ከምዝነበሮ፣ ናብ መንግስቲ ኣመሪካ ሓበሬታ የታሓላልፍ ከምዝነበረ፣ ካብ ቤትማእሰርቲ ነጻ ዘውጽኡዎ ‘ውን ናይ ኣመሪካ ሰለይቲ ምዃኖም ናይ ሓሶት ጸብጻብ ዝሓዘ ዘነድ ብምድላው ብወግዓዊ መንገድን ባዶ ሰለስተን ነዚ ናይ ጸለመ ወረ ናብ ህዝቢ ንምዝርጋሕ መደባት ሂቡዎም ከምዘሎ እቲ ሓበሬታ የረድእ።

በዚ ኣብ ስውራ ዓብዩ ሃገሩ ንምግልጋል ተወፋይነቱ ብግብሪ ዘርኣየ በሊሕን ተባዕን ፓይሎት ደጀን ዓንደ ሕሸል ዝገብሮ ዘሎ ምቅላዕ፣ እቶም እሙናት ደገፍቲ ናይቲ ስርዓት ከይተረፈ ብጭካኔን ሕጊ ኣልቦነትን እቲ ዓማጺ ስርዓት ሰኪሖም ብጋህዲ ይጽይኑዎ ስለዘለዉ፣ ነቲ ወትሩ ምስጢራቱን ክፍኡን ምስ ተቓልዐ ነዚ ዓቅሊጽበታዊ ኣጕል ናይ ጸለመ መደብ ክኣትዎ ከምዝተገደደ እቶም ምንጭታት ብተወሳኺ ኣገንዚቦም።

ምስዚ ኣብ ዝተኣሳሰር ዜና፣ ፓይሎት ደጀን ዓንደ ሕሸል ‘ኣጻምእ ደንከል ሰጊሩ ባሕሪ ቆሪጹ ክሳብ ዝሳገር እንታይ ትገብሩ ኔርኩም’ ብዝብል ምኽንያት 7 ኣባላት ምክትታል ዶባት ኣሲሩ ከምዘሎ ‘ውን ተፈሊጡ።