ግዳያት ሓደጋ ላፐዱዛ ንምዝካርን፣ ነቲ ቀንዲ ጠንቂ ናይቲ ሽግር ዝኾነ ምልካዊ ስርዓት ህግደፍ ንምዅናንን ካብ ዕዲ ጥልያን፣ ስዊዘርላንድ፣ ዓዲ እንግሊዝ፣ ጀርመን፣ ሽወደን፣ ነርወይ፣ ኔዘርላንድስን ካልኦት ዝተፈላለያ ሃገራት ኤውሮጳን ናብ ሮማ ብነፈትን መካይንን ዝገሹ ልዕሊ ሓደ ሽሕ ግዱሳት ኤርትራውያንን ኢጣልያውያን ኣኽሩኽ ኤርትራ ዝተሳተፉዎ ዕዉት ሰላማዊ ሰልፊ ሎሚ 25 ጥቅምቲ፣ ኣብ ሮማ፣ ኣብ ፊት ፓርላማ ኢጣልያ ተኻይዱ።

እቲ ናይ ዝኽሪ ሰልፊ ብኣቕሽሽትን መሻይኽን ክኽፈት ከሎ፣ ሰልፈኛታት ንኹሎም ‘ቶም ብ3 ጥቅምቲ ኣብ ላምፐዱዛ ዝጠሓሉ ግዳያት ንምውካል ቁጽሪ ሓደ ከምኡ ‘ውን መበል 369 ቁጽርታት ዝተጻሕፎ ሳናዱቕ ሬሳ ጸይሮም፣ ብመልቀስ ኣዴታት ተሰንዮም ነቲ ኣደብባይ ሰለስተ ሳዕ ዘይሮሞ።

መራሕቲ ሃይማኖት ብትግርኛን ዓረብ ኣብቲ ዘጣገመ ሓደጋ ኣተኵሮም ዝብከት ድሕሪ ምግባሮም ከኣ፣ ሰልፈኛታት፣ ነቲ ንመንእሰያት ኤርትራ ካብ ሃገሮም ከምዝነፍጹ እናገበረ ኣደዳ ሞትን ጥፍኣትን ዝገበሮም ዘሎ ምልካዊ ስርዓት ኢሳይያስ ብምዅናን ጭርሖታት ኣስሚዖም።

ማዕረማዕሪኡ ወከልቲ ሰልፈኛታት ምስ ኣባላት ፓርላማ ተራኺቦም ጉዳይ ኤርትራውያን ስደተኛታት ኣብ ዓዲ ጥልያን ብሕልፊ ኸኣ ነቶም ብማእከላይ ባሕሪ ሰጊሮም ናብታ ሃገር ዝኣትዉ ኤርትራውያን ስድተኛታት ዝቃለለሉ መንገድታት ብዝምልከት ዝርርብ ኣካይዶም።

ነቲ ኣጋጣሚ ወከልቲ መደበራት ቴለቭዥን ዝርከቡዎም ሓያለ ናይ ዓዲ ጥልያን ጋዜተኛታት ሸፈነ ገይሮምሉ።

ሰልፈኛታት ኣብ ፊት ፓርላማ ዘካየዱዎ ሰልፊ ድሕሪ ምፍጽሞም፣ ንምልካዊ ስርዓት ኢሳይያስ ብሓባር ንምምካት ከሰላስሉዎም ብዛዕባ ዘለዎም ስጉምታትን ሕጽረታቶምን ገምጊሞም።