ኣብ ዝሓለፈ ጥቅምቲ፡ ኣንጻር መላኺ ስርዓት ኢሳይያስ ብዝቃለሱ ገዳይም ተጋደልቲ ህዝባዊ ግንባር ነበር፡ ኣብ  ዓዲ ኢንግሊዝ ዝቖመ ማሕበር ተጋደልቲ፡ ትማሊ ቀዳም 04 ጥሪ 2013 ኣብ ዓዲ ኢንግሊዝ ምስ ዝነብሩ  ደለይቲ ለውጢ ሓይልታት ብሙኻን ንዓመተ 2014 ጸምቢሉዋ።

እቲ ብማሕበር ተጋደልቲ ህዝባዊ ግንባር ንለውጢ ዝዓተዓደመ ናይ ድራርን ምዝንጋዕን ምሸት፣ እቲ  ማሕበር ተጋደልቲ  ኣካልን ኣምሳልን ናይ ኩሎም ደለይቲ ለውጢ ሓይልታት ሙዃኑን ንኹሎም ኣቐዲሞም ኣብ ቃልሲ-ፍትሒ ዝጸንሑ ኤርትራውያን ሓይልታት ኣኽብሮቱ ንምርኣይን እዩ ወዲቡዎ።

ኣብቲ ኣጋጣሚ  ንዕዱማት ምስጋናን ኣኽብሮትን ብምቕዳም ዝቐረበ ቃል ማሕበር፡-

ትማል ኩሎም ተቓለስቲ ገድሊ ኤርትራ ጀብሃን ሻዕቢያን፡  ኣብ ቃልሲ ናጽነት አእጃሞም ኣበርኪቶም ብኽልተ ልዕለ ሓያላን ንዝድገፍ ንዘነበረ ስርዓታት መግዛእቲ ስዒሮም ናጽነት ክውን ብምግባሮም ኪሕበኑ ዝግበኦም እኳ እንተኾኑ፡ እቲ ናይ ትማል ሓበንን ፍናንን ግን  ብሰንኪ ጉጅለ ምልኪ ስለዝተጋህሰ ነቲ ህዝብን ሃገርን ዝርምስ ዘሎ ጠላሜ-መብጽዓ ስርዓት ገጢሞም ብምስዓር ነቲ ሓበን ኪመልስዎ ቅልጽሞም ከሕብሩ ይጽውዕ።

እቲ… “ክብሪ ቓልሲ ልዕሊ ኩሉ ክቡር ህይወቶም ንዝበጀዉ ሰማእታትና ጥራሕ እዩ ዝግባእ”  ዝበለ መግለጺ ማሕበር ” እቲ ዝተረፈ ኩሉ፡ ሃገር ርህዩዋ ቀሲናን ኪሳዕ ዝርኢ ብቐጻሊ ዝሕደስ ብስራሕ ዝምስከር ቃል ሕድሪ ከተግብር ትጽቢት ከምዝግበረሉ ኣተሓሳሲቡ።” ኣስዒቡ እቲ መግለጺ፡ ኩሉ ደላይ ፍትሕን ለውጥን ሕሉፉ ተወኪሱ ብሓባር “ትማል ብኸመይ ኢና ተዓዊትና፣ ስለምንታይ’ከ ሎሚ ወዲቕና፡ ጽባሕ’ከ ብኸመይ ኪንዕወት ንኽእል’ ብምባል ብሓባር ኪዝትን ዘትዩ ፍታሕ ኪቅርብን ልዑል ትጽቢት ከምዝግበረሉ ኣተሓሳሲቡ።

ውፉያት ሃገራውያን ድምጻውያን ተጋደልትን ዋርሳይን ነቲ ደምበ ተቓውሞ ኣብ ዝውድብዎ ምሸታት ናይ ምስታፍ ዝጸንሐ ሓጹር ሰባቢሮም ድሕሪ ደጊም ይእከል ብምባል፡ ምስ ደለይቲ ለውጢ ወገኖም ብምስላፍ  ነቲ ምሸት ብምኡዝ ድምጾምን ቃኖኦምን ኮሊዖሙዎ ኣምስዮም።

ስነጥበባውያን ሃገርና ድሕሪ ህልቂት ላምፔዱሳን ጃምላዊ ፍልሰት መንእሰያትናን ናይ ቃልሲ ወኒን መንፈስን ዘበራብር፡ ሓያልን ምኡዝ ዜማታት ብምፍራይ ንህዝቢ ይጉስጉሱ ብምህላዎም ብዝያዳ ኪተባብዑን ኣብ ቃልሲ ናጽነት ልዑል እጃም ከምዘበርከቱ ኣብ ቃልሲ ሓርነት እጃሞም ከበርክቱ ዝሕተትሉ እዋን ሙዃኑ ብምዝካር ዝተረፉ ኩሎም ነቲ ዘሎ ከታሪ ሓጹር ደጋፍን ተቓዋምን ብምስባር ኣብ ጎድኑ ውጹዕ ህዝቦም ብምስላፍ  ኣሰር ቀዳሞት ብጾቶም ኪኽተሉ ተሳተፍቲ ጸዊዖም።

እቲ ብናይ ድራር እንግዶትን ምውቕ ባህላዊ ምዝንጋዕን ደሚቑ ዘምሰየ ምትእኽኻብ ንኹሎም ተሳተፍቲ ሓይልታት፡ ኤርትራዊ ብዝኾነ ይኹን ስምን መጸውዕን ይወደብ ኩሉ ድሌቱን ኣተሓሳስባኡን ኣብ ሓደ ዕላማን ኣተሓሳስባን ከምዘሎ ዘረድእ ሙዃኑ ዘግሃደ እዩ ነይሩ።  ኣብቲ ምሸት ዝተሳተፉ ዓበይትን ናእሽቱን ሓርበኛታት ተጋደልቲ ጀብሃን ሻዕቢያን፡ ውህደትን ሓድነትን ተቓለስቲ ዘማዕብልን ሓድሕዳዊ ምትእምማን ሓቢርካ ምስራሕን  ዘጎልብትን ናይ ሓባር ምሸታት ኪውደብን ኣተሓሳሲቦም።