ጋዜጣዊ መግለጺ ዓለም-ለካዊ ምንቅስቓስ መንእሰያት ኤርትራ

ለውጢ ተበግሶ ብምውስ ድኣምበር፡ ብሰናይ ድሌት ጥራይ ክረጋገጽ ዝኽእል መስርሕ ኣይኮነን። ሓልዮት ህዝቢ ዝሕመረቱ፡ ስቅያትን ሓሳረ መከራን ወገኑ ዘሕመሞን ድቃስ ዝኸልኦን መንእሰይ፡  ብዕስራ ሰነ 2009 ኣብ ዋሸንግቶን ዲሲ ዝተገብረ ስላማዊ ሰልፊን ሲምፖዝዮምን ፈላሚ ኣኼብኡ ዘስላሰለ ምጥርናፍ መንእስያት፡ ንዝሓለፉ ሸዱሽተ ኣዋርሕ ብግዝያዊ መሪሕነትን፡ ብስም ዓለም-ለካዊ ምንቅስቃስ  መንእሰያት ኤርትር ንጥፈታቱ ከኻይድን ፡ ሓያሎ ሰርሓት  ክዓምም  ከምዝጸንሐ  ኩላትና  ንፍልጦ ሓቂ እዩ።  ማሕበርና ኣብ ፈላሚ ርክባቱ  ብዝወሰኖ መሰረት ካብ ዕለት 15 ጥሪ ክሳብ 17 ጥሪ 2010 “ጥርኑፍ መንእሰይ ተስፋ  ብሩህ መጻኢ” ኣብ ትሕቲ ዝብል ቴማ ንሰለስተ ምዓልታት ኣብ ከተማ ኣትላንታ ጆርጅያ ግባኤኡ ኣካይዱ።