ንሓደ ግንቦት መዓልቲ ሰራሕተኛታት ዓለም ምኽንያት ብምግባር ኣብ ዝተጸውዐ ሰልፊ፡ ኤርትራዉያን ደለይቲ ፍትሒ ነበርቲ ስታቫንገርን ከባቢኣን፡ ነቲ ኣጋጣሚ ብምጥቃም፡ ኣብ ኤርትራ ንዝካየድ ዘሎ ግህሰት ሰብኣዊ መሰላት ዝኹንን ሰለማዊ ሰልፊ ከምዘካየዱ አኪል ኣሰና ካብታ ከተማ ካብ ዝለኣኸልና ጸብጻብ ንምርዳእ ተኻኢሉ።

እቲ ብምረሻ ባንድ ዝተዓጀበ ሰልፊ፡ ልዕሊ ክልተ ሽሕ ዝበጽሑ ወከልቲ ዝተፈላለያ ትካላት ዝተሳተፍዎ ኪኸውን እንከሎ፡ ኣዝዩ ብርክት ዝበለ ህዝቢ ድማ ኣብ ጎደናታት ብምውጻእ ብኣንክሮ ተዓዚብዎ። እቶም ኣብቲ ሰልፊ ዝተሳተፉ ደለይቲ ለዉጢ፡ ‘’ህዝቢ ኤርትራ ኣንጻር  ምልካዊ ስርዓት ንዘካይዶ ዘሎ ቃልሲ ደግፉ’’ ዝብል ጭርሖ ብምንብልባል ኣቓልቦ ብዙሓት ኖርወጃውያን ክረኽቡ ክኢሎም። ብዘይካ’ዚ ንህልዊ ኩነታት ሃገርና ዝገልጽን፡ ኣብ ልዕሊ ህዝብና ዝወርድ ዘሎን ከቢድ ግህሰት ሰብኣዊ መሰላት ዘረድእ ዝርዝራዊ ትሕዝቶ ዘለዎ ጽሑፍ ብምድላው፡ እንዳተዘዋወሩ ንተሳተፍትን ተዓዘብቲ እቲ ሰልፊን ዓዲሎም።

እዚ ብደለይቲ ለውጢ ስታቫንገር ብውዱብ መልክዕ ንካልኣይ ግዜ ይካየድ ከምዘሎ ንምፍላጥ ተኻኢሉ። በዚ ድማ እቲ ኣብ ከባቢ ፍርቂ መዓልቲ ዝጀመረ፡ ካብ ማእክል ከተማ ስታቫንገር ተበጊሱ፡ ንቕርዓት ማእከል እታ ከተማ ብምኹላል ድሕሪ ሰለስተ ሰዓት ተዛዚሙ።