ውልቀመላኺ ኢሳይያስ ኣፈወርቂ ንሜጀር ጀነራል ሮመዳን ኣውልያይ ኣመሓዳሪ ዞባ ማእከል (ኣስመራን ከባቢኣን) ክኸውን ከምዝመዘዞ ምንጭታት ኣሰና ካብ ኣስመራ ሓቢሮም።

ሜጀር ጀነራል ሮመዳን ኣውልያይ ኣብ ግዜ ብረታዊ ቃልሲ ኣዛዚ ክፍለሰራዊት ከቢድ ብረት፣ ድሕሪ ናጽነት ከኣ ሓላፊ ኮምሽን ስፖርት ኮይኑ ኳ እንተሰርሐ፣ ነቲ ዋና ከተማ ኣስመራ ዝርከቦ ዞባ ማእከል ከመሓድር ናይ ሲቪላዊ ምሕደራ ተመክሮ የብሉን።

ውልቀመላኺ ኢሳይያስ ግን ትእዛዙ ከምዘለዎ ተቐቢሉ ዘተግብር፣ ንሽሙ ዝተቐመጠ ሓላፊ እምበር፣ ርእሱ ክኢሉ ህዝቢ ዘመሓድር ዓቕሚ ዘለዎ ኣመሓዳሪ ስለዘየድልዮ፣ ህዝቢ ደኣ ግዳይ ይኸውን እምበር ንኢሳይያስ ዘሸግሮ ኣይኮነን።

እቶም ቅድሚ ሕጂ ኣብ ዞባታት ኣቐሚጡዎም ዝጸንሐ ኣመሓደርቲ እውን መጋበርያኡ ድኣምበር ፍሉይ ክእለትን ብቕዓትን ምሕደራ ዘለዎም ኣይኮኑን።

ኣብ ዝሓለፈ ዓመታት ንኹሎም ኣመሓደርቲ፣ ከም ኣዘዝቲ “ስርሒታት” ዝመዘዞም ሜጀር ጀነራላት ደሪቡሎም ስለዝነበረ ኣብ ምምሕዳር ህዝቢ ናይ ኣሰራርሓ ግጭትን ሕንፍሽፍሽን ከምዝበዝሐ ብልሽውና ከምዝሳዕረረ ይፍለጥ።

ውልቀመላኺ ኢሳይያስ፣ ንሜጀር ጀነራል ሃይለ ሳሙኤል (ቻይና) ኣቐዲሙ ኣመሓዳሪ ዞባ ማእከል ክኸውን መዲቡዎ ኳ እንተነበረ፣ ነቲ መዝነት ቻይና ከምዝነጸጎ ይንገር። ሜጀር ጀነራል ሮመዳን ኣውልያይ እምብኣር ነቲ ቻይና ዝተሓሰሞ መዝነት እዩ ተቐቢሉዎ ዘሎ።

እቲ ንነፍሲሄር ውጩ ኣብ ኣጋ ሞቱ ሓለቓ ስታፍ ሓይልታት ምክልኻል ክኸውን ዝሸሞ፣ ን ሜጀር ጀነራል ፍሊጶስ ኣብ ሓመድ ድበ ቫይናክ፣ ሃንጀማን ደሱን ሃንደበት ጀነራል ገይሩ ሓለቓ ስታፍ ዝለጠፈሉ ኢሳይያስ፣ ኩሉ ኣሰራርሓኡ ዕብዳን ከምዘንጸባርቕ ርኡይ ኮይኑ ኳ እንተጸንሐ፣ እቶም ክሳብ ቀረባ እዋናት ክጻወሩዎ ዝጸንሑ ከይተረፈ ንስሕታን ኣእምሮኡ ምኽሓድ ጸጊሙዎም በቲ ኩነታት ከግረምርሙ ይስምዑ ከምዘለዉ እቶም ምንጭታት ኣገንዚቦም። ልዕሊ ኹሉ ኣብ ልዕሊ ህዝቢ ኤርትራ ዘለዎ ንዕቀትን ብድዐን፣ ናይ ዕንወት ውጥንን ደረት ስኢኑ ምህላዉ፣ “ኩሉ መለሳ የብሉን” ካብ ዝብል ተስፋ ምቝራጽ ዝተበገሰ ናይ ቅብጸቱ መርኣያ ምዃኑ ‘ውን የረድኡ።