ውልቀመላኺ ኢሳይያስ ኣፈወርቂ፣ ኣብ ኣስመራ፣ ዝሓለፈ 24 ግንቦት ኣብ ዝተኻየደ ጽምብል መበል 25 ዓመት ናጽነት ኤርትራ፣ ከም ኣመሉ ፍሽለቱ ንምሽፋን ንኻልኦት ብጥቃን ዘስምዖ ናይ ክሕደት መደረ፣ ኤርትራ ሃገርና ኣብ ትሕቲ ‘ቲ ባዕሉ ዝገበቶ ምልካዊ ምሕደራ ርብዒ ዝበን ናጽነት ኣጋጢሙዋ ዘሎ ውድቀት ክሳብ ክንደይ ከቢድ ምዃኑ ከምዘንጸባርቕ ኣብ ስደት ዝነብሩ ኤርትራውያን ገሊጾም።  

ውልቀመላኺ ኢሳይያስ ኣብ መደረኡ፣ ነቲ ህዝቢ ኤርትራ ህይወት ዓሰርተታት ኣሽሓት ብሉጻት ደቁ ዝሰውኣሉ፣ ከም ሞሳ ሓርነታዊ ቃልሱ ሃረር ዝበሎ፣ ከም ግዝኣተ ሕግን ዲሞክራስያዊ ቅዋማዊ ምሕደራን፣ ፍትሒ፣ ስልጣኔ፣ ሰላምን ቅሳነትን ዝኣመሰለ ጸጋታት ናጽነት ሓምሺሹ ኣብ ኤርትራ ካብ መግዛእቲ ዝኸፍአ ባርነት ፈጢሩ ክንሱ፣ ናብ ታሪኽ ተመሊሱ ቀሚሽ ኣደይ ሓንኵሉኒ ዝዓይነቱ መመኽኔታ ምድርዳሩ፣ ከም ኣመሉ፣ ነቲ ባዕሉ ዝፈጠሮ ፖለቲካዊ፣ ቁጠባውን ማሕበራውን ቅልውላው ንምሽፋን ዝዓለመ ምንባሩ ‘ውን ኣገንዚቦም።

ምእንቲ’ ‘ዚ ኢሳይያስ፣ ነቲ ንህዝቢ ኣሰኪሑ ንመንእሰያት ኤርትራ ብቓፍላያት ስደት ዘጽርር ዘሎ፣ ንማሕበረሰብ ዓለም ኣደንጽዩ ንሃገርና ምስ ሰሜን ኮርያ ከወዳድራ ኣገዲዱዎ ዘሎ ህሉው ኩነታት፣ ሕጊ ኣልቦነትን ዕንደራን፣ ሕሰም መነባብሮን ውርደትን ህዝቢ ፈጺሙ ከይለኸፈ ኣብ ውልቃዊ ፋንታዚ ጥሒሉ ኣመሪካ ክብል ምምሳዩ፣ ካብ ስሕታን ኣእምሮ ሓሊፉ ካልእ መግለጺ ከምዘይብሉ ዝጠቐሱ ተዓዘብቲ፣ ዋላ ኳ ርብዒ ናጽነት ፍልይ ዝበለ ኣጋጣሚ እተነበረ፣ ካብ ውልቀመላኺ ኢሳይያስ ዝተፈልየ ስጉምቲ ዝተጸበዩ እንተነይሮም ዕሸላውነት ዘጥቅዖም ጥራይ ክኾኑ ከምዘለዎም ኣረዲኦም።

በንጻሩ እቲ ብብደዐ ኢሳይያስ ዝረብረበ ህዝቢ ኤርትራ፣ ነቲ ዛጊት ዘይተማልአ ባህግን ሕልምን ናጽነት ናይ ምምላእ ዕማም ኣብ ኢዱ ምህላዉ ብምምልካት፣ ለውጢ ብምምጻእ ሽግሩ ፈቲሑ ሕጋውን ዲሞክራስያውን ስርዓት ብምትካል ነታ ክብርቲ ሃገሩ ናብ ጎደና ሰላምን ስልጣኔን ክመልሳ ከምዝግባእ ኣተሓሳሲቦም።