ምስ ብዙሓት ኤርትራውያን ስደተኛታት ካብ ሱዳን ናብ ሊብያ ኣብ ዝኣተዉሉ እዋን በቶም ISIS ተባሂሎም ዝፍለጡ ጥሩፋት እስላማውያን ድሕሪ ምትሓዞም ዘምለጡ ክልተ ኤርትራውያን፣ ምስኣቶም ዝጓዓዙ ዝነበሩ ዓሰርተታት ኤርትራውያን ደቂ ኣንስትዮን መንእሰያትን ኣብ ትሕቲኦም ተታሒዞም ከምዘለዉ ብምርግጋጽ፣ ኤርትራውያን ኣብ ኢድ እዞም ጨካናት ጉጅለ ከይወድቁ ብጽኑዕ ኣተሓሳሲቦም።

እቲ ሓደ ቅድሚ ወርሒ ኣቢሉ ካብቲ ሓደጋ ዘምለጠ ክኸውን ከሎ፣ እቲ ሓደ ግን ካብቶም ኣብ ከባቢ ወርሒ መጋቢት ናይዚ ዓመት ካብቶም ኣይሰስ ብኻራ ዝሓረዱዎምን ዝረሸኑዎምን ግዳያት ብህይወት ዝተረፈ እዩ።

ክልቲኦም እቶም ኣብ ዝተሓርዱን ዝተረሸኑን ግዳያት ብዘይካ በጻብዕቲ ዝቑጸሩ ኢትዮጵያውያን፣ ዳርጋ ኩሎም ኤርትራውያን ምዃኖም ኣረጋጊጾም። ብዘይካ ‘ቶም ኣይሰስ ብቴለቭዥን ስኢሉ ንፕሮፖጋንዳ ዝተቐጥመሎም 30 ኣቢሎም ዝኾኑ ግዳያት ካልኦት ኣስታት 20 ኣቢሎም ዝኾኑ ኤርትራውያን ስደተኛታት ብኣይሰስ ህይወቶም ከምዝጠፍአ’ውን ኣገንዚቦም።

ብመሰረት ሓበሬታ ናይቶም ክልተ ግዱሳት ኤርትራውያን፣ እቶም ዝተረሸኑን ዝተሓርዱን፣ ብዕድሚኦም ዓበይቲ ስለዝኾኑ ወይ ድማ ተረርቲ ስለዝኾኑ ብቐሊሉ ሃይማኖቶም ናብ እስልምና ክቕይሩ ኣይክእሉን እዮም ተባሂሎም ብኣይሰስ ዝተለለዩ ምዃኖም ‘ውን ኣረዲኦም።

እቲ ሓቂ እዚ ስለዝኾነ፣ ኣብ ውሽጢ ኤርትራ ዘለዉ መንእሰያት ኣብ ከምዚ ዝኣመሰለ ሓደጋ መታን ከይወድቁ ዓቕሊ ክገብሩ፣ እቶም ኣብ ጉዕዞ ስደት ዘለዉ ድማ ልዑል ጥንቃቐ ከካይዱ ኣተሓሳሲቦም።

ምሉእ ትሕዝቶ ናይቲ ዝርርብ ኣብ ናይ ሎሚ መደብ ድምጺ ኣሰና ተኸታተሉ።