ኣብ ኣትላንታ ህግደፋውያን ወጋሕ ትበል ለይቲ ደበስዶ ታሕጓስ?

ህግደፋውያን መላእ ህዝቢ ኤርትራ በቶም ከባቢ 400 ኣብ ባሕሪ ጥሒሎም ዝጠፍኡ ደቁ ኣብ መሪር ሓዘንን ብኽያትን ኣብ ዘለወሉ እዋን፣ እቶም ንርእሶም ሃገራውያን፣ ካልእ ከዳዕ ጠላም፣ ወያኔ፣ ሲኣይኤ ብዝብል ዜግነት ክዕድሉ ዝውዕሉ፣ ሓንቲ ልቦም (ልቢ ኢሳያስ) ህግደፋውያን  ብበዓል ዳዊት ሽላንን ወዲ ትኳቦን ዝኣመሰሉ ሕልና ኣልቦ ደረፍቲ፣ ቀዳም ናብ ሰንበት ዘውግሕ፣ ጥቅምቲ 6, 2013 ሂር ዝበለ ጓይላ ተኺሎም ኣብ ዕብዳንን ሳዕስዒትን ዳንኬራን ሓዲሮም።

መስከረም ነት እታ ካብ ቲቪ-ኤረ ንላዕሊ ጽቡቕ ዘይብሉ ግንከ ጽቡቕ እንተ ረኸበት  ብዘይዕረፍቲ ብዛዕባ ኢሳያስ ኮለል እትብል መርበብ ሓበሬታ፣ “ሓቂ እንተ ኾይኑ ዓገብ ማሕበረ ሰብ ኣትላንታ መዓልቲ ቀይሩ።” ብምባል ነቲ ዳንኬራ ህግደፍ ናብ ማሕበረ ሰብ ኣትላንታ ከተጸግዖ ምፍታና ዘገርም እዩ ሕፍረት ንኣኹም ከኣ ንብሎም።  ማሕበረ ሰብ ኣትላንታ ኣባል እዚ ግዕዘይ ስራሕ አይኮነን።  እኳ ደኣ ብኣንጻሩ፣ ኣብቲ ጓይላ ዝግበሮ ቦታ ብምኻድ ናይ ናይ ሓዘን ክዳን ተኸዲኖም  ናይ ሽምዓ ሰልፊ፣ ብምግባር ብፍሉይ ናይ ጸሎት ኣዋጅ ገይሮም  ኣብ መድሃኔ ኣለም ቤተ ክርስቲያን ጸሎተ ፍትሓት ተገይሩ እዩ። http://tewahdo.tv/ ህዝቢ ብጸሎትን ንብዓትን ዘኪርዎም ውዒሉ እዩ።

ህግደፋውያን ንማሕበረ ሰብ ኣትላንታ ኣይውክሉን እዮም። ከመይሲ ማሕበረ ሰብ ህዝቢ ኣትላንታ ኣካል ኩሉ ኤርትራዊ እዩ። ኤርትራውያን  ይትረፍ ከምዚ ዓይነት ጃምላዊ ህልቂት ኣብ ልዕሊ ኣሕዋቱን ኣሓቱን ተፈጺሙ፣ ሓደ ሰብ ሞይቱ’ውን ረይሳ ሓመድ ከየልበሱ እኽለ ማይ ኣይለክፉን ክብረት ሰብ ዘለዎ ሕፉር ህዝቢ እዩ።

ማሕበረ ሰብ ኣትላንታ እዚ 06/10/2013 ዝሓደረ ጓይላ ኣዝዩ ዝኹንኖን ዝቃወሞን፣ ዓገብ ዝበሎን ኣብ ርእሲ ምዃኑ፣ ከም ኩሉ ኤርትራዊ ዜጋ ኣብ ሓዘንን ንብዓትን ጸሎትን ከም ዘሎ፣ ተካፋሊ ሓዘን ዘይኮነስ ኣካል እዚ መሪር ሓዘን ምዃኑ፣ ንምሉእ ህዝቢ ኤርትራን ንባዕሉን ድማ ጽንዓት ጽንዓት ክረክብ ኣብ ጸሎትን መሪር ሓዘንን ኣሎ።

እንተ ህግደፋውያን ግን ዘይወግሕ መሲልዋ ኣብ በኹራ… ከም ዝበሃል፣ ድሕሪ ጸልማት ብርሃን ምህላዉ፣ ንውጹዕ ህዝቢ ኤርትራ እናወግሓሉ ይኸይድ ኣሎ፣ ንህግደፋውያን ግን እናዓረበቶም ትኸይድ ከም ዘላን ክፈልጡ ይግባእ። ናይዚ ኩሉ ብድዐን ኣደራዕን ድማ፣ ህዝቢ ኤርትራ ይቕረ ክብለልኩም ክኸብዶ ምዃኑ ብኣግኡ ክግንዘብዎ ኣለዎም።

ግዱሳትን ሕዙናትን ኤርትራውያን ካብ ማሕበረ ሰብ ኣትላንታ።

ጽንዓት ይሃበና ንኹልና ኤርትራውያን።