ሚኒስተር ውሽጣዊ ጉዳያት የመን ትማሊ ቐዳም፡ እታ ካልኣይቲ ከተማ የመን ዓደን፡ ካብቶም ብ ኢራን ዝድገፉ ተቓወምቲ ሑቱ ሓራ ከምዝወጽአት ድሕሪ ምግላጹ፡ ኣብ ስዑዲ ዓረብ ተዓቒቦም ዝጸንሑ ሚንስተራት የመን ብመንገዲ ኤርትራ ኣቢሎም ብጃላቡ ናብ ዓደን ከምዝተመልሱ ኣገልግሎት ዜና ፈረንሳ AFP ሓቢሩ።

ተቓወምቲ ሑቱ ኣብ ወርሒ መጋቢት ናይዚ ዓመት `ዚ ናብ ወደባዊት ከተማ ዓደን ካብ ዝኣትዉ ንደሓር ፡ ኣብ ስዑዲ ዓረብ ክቖቡ ዝተገደዱ ፕረዚደንትን ሚኒስተራትን ናይቲ ኣህጉራዊ ተፈላጥነት ዘለዎ መንግስቲ የመን፡ ንፈለማ ግዜ እዮም ኣብታ ከተማ ዝረግጹ ዘለዉ።

ሚኒስተር ዓብዶ ኣል-ሑዘይፊ ብዓርቢ ናብ ዓደን ከምዝተመልሱ ካብ ምርግጋጽ ሓሊፉ፡ ከመይ ኢሎም ናብ ዓደን ከምዝኣተዉ ከምዘየብርሀ ዝጠቐሰ ኣገልግሎት ዜና AFP፡ እቲ ብስዑዲ ዓረብ ዝውነን መዓልታዊ ጋዜጣ ኣሽራቕ ኣል ኣውሳጥ ንሓደ ብዓል ስልጣን ስለያ ስዑዲ ዓረብ ብምጥቃስ፡ እቶም ሚኒስተራት ካብ ሪያድ ናብ ኤርትራ ብነፋሪት ድሕሪ ምብራር፡ ካብ ኤርትራ ብጃልባ ናብ ዓደን ከምዝሰገሩ ከምዘመልከተ ኣገንዚቡ።

እዚ ሓበሬታ `ዚ ነቲ ስዑዲ ዓረብ ንኤርትራዊት ወደብ ዓሰብ፡ ነቶም ብኢራን ዝድገፉ ተቓወምቲ ሑቱ ኣብ ምድኻም ከም መበገሲ ትጥቀመሉ ከምዘላ ክመጽእ ንዝጸንሐ ሓበሬታታት ዳግም ዘረጋግጽ እዩ።

ኣብ ዝሓለፈ ፈነወ ድምጺ ኣሰና ከምዝተጠቕሰ፡ መራሕቲ ስዑድያ፡ ንኢሳይያስ ናብ ስዑዲ ዓረብ ጸዊዖም፡ ንወደብ ዓሰብ ንተቓወምቲ የመን ንምውቃዕ ከም ሓደ ወተሃደራዊ መዓስከር ክጥቀሙሉ ንዘቕረቡሉ ተሪር ጠለብ ክቕበሎ ከምዝተገደደ ምንጭታት ካብ ኤርትራ ሓቢሮም እዮም።

ካብ ዓሰብ ናብ ዓደን ናይ ኣስታት 150 ማይልስ ርሕቀት ጥራይ ከምዘሎ ይፍለጥ።