ታሪኽ ኣብ ምዝንታው ቅንዕናን ልቦናን የድሊ

ኣነ ተጋዳሊት ህዝባዊ ግንባር እየ። ጓል ገዛ ባንዳ ስለዝኾንኩን እቲ ብርኽቲ ጓል ብርጅዋን ጽገወይኒ ጓል ላንጋኖን ዝዛረባሉ ዘለዋ ናይ ደቂ ገዛውትና ግዜን ኩነታትን ኣጸቢቑ ስለዝዝከረኒ ኸኣ እየ ቃለይ ክሕውስ ደልየ።

ጠባያት ጓል ብርጅዋ ከምቲ ጓል ላንጋኖ ገሊጻቶ ዘላ እዩ። ቅድሚ ኹሉ ክጠቕሶ ሓሳብ ካብ ጓል ብርጅዋ፣ ብዓል ኣብልይ ሃብቱ፣ ሳራ ኣለምሰገድ፣ ገነት ቀለታ፣ ሃብተኣብ ተ/ሚካኤል ዝኣመሰሉ፣ ንጀብሃ ጀሚሮም ዝወድኡዎ ምኩራት ተጋድልቲ ነቲ ኩነታት እንትዝገልጹዎ ዝያዳ ርዱእ ምኾነ ነይሩ ዝብል እዩ።

እቲ ዝያዳ ዝገረመኒ ግን፣ ኣብቲ እዋን’ቲ ብርኽቲ ንጽገወይኒ ጓል ላንጋኖ ጥራይ ዘይኮነ፣ ከም ብዓል ሰናይት ትኽለ፣ ኣልማሽ ሰንጋል፣ ሳባ ገ/ሄር ኣልማዝ በራኺ ዝኣመሰላ ብዙሓት ደቂ ገዛ ማንዳ እያ መጠንቀቕታ ኣምጺኣ ነይራ። ስለምንታይ ናብ ጽገወይኒ ጥራይ ከምዘተኮረት ኣይተረድኣኣንን።

መቸም እቲ ስዉኣቱ፣ ንስኩላቱን ተጋደልቱን ደርብዩ ኣብዘን ከም ብዓል ብርኽቲ ጓል ብርጅዋ ዝኣመሰላ ብላሽ ዝኾና መጋበርያታት ተመርኵሱ ምህላዉ፣ ፖለቲካዊ ዕላማ ከምዘለዎ ንኹሉ ብሩህ እዩ። ብፖለቲካዊ መንገዲ ከዳኽሞም ንዝደለዮም ውልቀሰባት ከምዚኣተን ዝኣመሰላ ደፋራት ሓሰውቲ እዩ ሹት ዝብለሎም። እዚ ናይ ብርኽቲ ተግባር ከኣ ካብዚ ዝተፈልየ ተልእኾ ዘለዎ ዕማም ኣይኮነን።

ታሪኽ ኤርትራ ብኣኺ ዝግለጽ ኣይኮነን። እቶም ዝወዓሉሉ ጸግዖም ሒዞም ኣንታ እንታይ እያ ትብል ዘላ ይብሉኺ ከምዘለዉ ዘክሪ። እዚ ፕሮጀክት’ዚ ንበይንኺ ከምዘየበገስክዮ ርዱእ እዩ። እቲ ምስ ህግደፍ ወጊኑ ኣብ ልዕሊ ሬሳታት ኤርትራውያን ዝስዕስዕ ዘሎ ተስፋይ ኣርዓዶም ከምዝተሓባበረኪ ዝሰሓት ኣይኮነን።

ንምዃኑ ንስኺ ኣብ ጥፍኣት ናይተን ሽዑ ኣብ ኣስመራ ተሓባበርቲ ደርግ ብዝብል ምኽንያት ብጀብሃ ስጉምቲ ዝተወስደለን፣ ኣካል ናይቲ ሽዑ ዝተፈጸመ መስርሕ ቅትለት ዶ ኣይኮንክን። ኣብቲ ግዜ ‘ቲ ጽገወይኒ ዘቕተለቶ ሰብ እንተሎ ብጭብጢ ከተቕርቢ ነይሩኪ። እንተዘይኮኑ፣ ብዝያዳ ብዛዕባ ተግባራትኪ ምዝራብ ምቐለለኪ ነይሩ።

ጽገወይኒ ጓል ላንጋኖ ‘ውን ኣብቲ ኣብዚ ዘቕረብክዮ ጽሑፍ፣ ኣብ ክንዲ ሕርቃንኪ ኣርኢኺ ብሓፈሻዊ ኣዘራርባ ትሓልፍዮ፣ ገጽ ብገጽ እናጠቐስኪ ነብስኺ ክትከላኸልን ሓቂ ከተብርህን ይግባእ ነይሩ።

ኣብ መደምደምታ ክብሎ ዝደሊ ግን፣ ኣብ ግዜ ሓርነታዊ ቓልሲ ብተጋድሎ ሓርነት ይኹን ህዝባዊ ግንባር ብዙሕ ሰብ ጠፊኡ እዩ። እቲ ታሪኽ ንስኒት ህዝብና ብዝጠቅም መንገዲ ብልቦናን ጥበብን ክተሓዝ ከሎ ኸኣ ‘ዩ መልክዕ ዘለዎ እምበር። በዚ ነብስኻ እናጸባበቕካ ንኻልኦት ምውንጃል ዝዓይነቱ ስምዒታዊ ኣቀራርባ ብርኽቲ ምቕራቡ ሳዕቤኑ ማህሰይቲ ጥራይ እዩ’ሞ ኣዝዩ ጥንቃቐ ከምዝሓትት ምግንዛብ የድሊ።

ሰላም