እቲ ብ21 ጥሪ 2013 ኣብ ፎርቶ ዝተኻየደ ምንቅስቓስ ሰራዊት ድሕሪ ምቝጻዩ፡ ብሪጋደር ጀነራል ኣብርሃ ካሳን፡ ሜጀር ጀነራል ፊሎጶስ ወልደየውሃንስን ተሰንዩ ናብ ሰራዊት ዑደታት ንኸካይድ ዝተገደደ፡ ምስ ኮለኔል ወዲ ዓሊ ነቲ ምንቅስቓስ ዝመርሕ ዝነበረ ‘ሞ ዝተታሕዘ ብሪጋደር ጀነራል ሳልሕ ዑስማን ናይ መጀመርያ ዑደቱ ኣብ ከባቢ ደቀምሓረ በቶም ናቱ ሰራዊት ‘ዩ ተጀሚሩ።

ብመሰረት ምንጭታት፡ ንሱ “ ናይ ፎርቶ ስርሒት ተጋጊና ኢና ኣጋጊናዮምና እዮም” ኢሉ ዘረብኡ ብምጅማር፡ “ወዲ ዓሊ ኣብ መትከሉ እዩ ተሰዊኡ” በለ፡ ቀጺሉ፡ “ ኣነ ግን ንመን ንሕሾ ኢለ ክስዋእ ኣይመረጽኩን፡ ነቶም ዝጋገዩና መን ከቃልዖም” ብምባል፡  ነቶም ዝጠለሙ ንኹሎም ከቃልዕ ሙኻኑ እዩ ሓቢሩ።

ይኹንእምበር ሰራዊት ከበድቲ ሕቶታት ብምልዓል፡ “ሕቶ ወዲ ዓሊ ሕቶ ኩላትና እዩ፡ እቲ ሕቶ ሕጂ’ውን ኣብ ቦትኡ ዘሎ፡ ብምባል ብትብዓት ሓቲቱ። ሜጀር ጀነራል ፊልጶስን ብሪጋደር ጀነራል ኣብርሃ ካሳን ከኣ ኣዝዮም ስለዝሰንበዱ፡ ብዘይ ዝኾነ መልስን ዘረባን ኣብ ሓጺር እዋን ነቲ ኣኼባ ኣቋአኢጾም ናብ ኣስመራ ተመሊሶም። ንኢሳይያስ ከኣ፡ “በዚ ንገብሮ ዘለና ባዕልና ካልኣይ ናዕቢ ኢና ነልዕል ዘለና፡ እዚ ዑደት ክግበር የብሉን” ኢሎሞ። ኢሳይያስ ብወገኑ፡ ርእይቶኦም ተቐቢሉ ነቲ ኣብ መላእ ኤርትራ ናብ ኩሉ ክፍለ ሰራዊታት፡ ክግበር ወጢኑዎ ዝነበረ ናይ ጎስጓስን ፕሮፖጋንዳን ዑደት ደው ደው ከምዝበል ገይሩ።