መንግስቲ ኢትዮጵያ ነቶም ናብ አውሮፓ ክሰግሩ ክብሉ አብ ሊብያ አብ ከቢድ ሽግር ወዲቖም ዘለው ዜጋታቱ ብሰላም ንኽውጽእ ጻዕርታት ይገብር ከምዘሎ ተፊሊጡ አሎ። ብመሰረት 28.04.15 መግለጺ ወጻኢ ጉዳይ ሚኒስትር ኢትዮጵያ ዶክትር ቴድሮስ አድሓኖም፤ መንግስቲ ኢትዮጵያ ምስ መንግስቲ ሱዳንን ግብጽን ብምኻን ነቲ ስደተኛታት ናይ ምውጻእ መስርሕ የካይዱ ከምዘሎ ሓቢሩ። እቲ መግለጺ ከምዝሕብሮ ሊብያ አብ ትሕቲ ክልተ ሓይልታት ኢድ ከምትርከብ ይሕብር፤ በዚ መሰረት ድማ እቲ ብዓለም ተፈላጥነት ዝረኸበ መንግስቲ ሊብያ አብ ቱብሩክ ቤት ጽሕፈቱ ዝኸነ ምስ መንግስቲ ሱዳን ርክብ ስለዘለዎ ብመንገዲ መንግስቲ ሱዳን ንኢትዮጵያውያን ካብቲ ከባቢ ንምውጻእ ይስራሕ ምህላው፤ ከምኡ ድማ ቤንጋዚ ዝርከብ ዓማጺ ሓይሊ ድማ ምስ መንግስቲ ግብጺ ርክብ ስለዘለዎ ብመንገዲ መንግስቲ ግብጺ ነቶም ስደተኛታት ኢትዮጵያውያን ብሰላም ንምውጻእ ይጽዕር አሎ። ዛጊት አብ ቤንጋዚ አብ ሕማቕ ኩነታት ተኣሲሮም ዝነበሩ 37 ኢትዮጵያውያን ካብ ቤት ማእሰርቲ ናብ ውሑስ ቦታ ከምዘግዓዝዎም ሓቢሮም አለው። ከም ዝፍለጥ ሊብያ አብ ሕድ ሕድ ኩናት ስለዘላ ሓያሎ ግብረ ሽበራውያንን ዘይሕጋዊ መስግጋር ወዲ ሰብ አብ አዝዩ ሓደገኛ ኩነታት በጺሑ ከምዘሎ መላእ ዓለም ይዛረበሉ አሎ። ብሰንኪ እዚውን ካብ ዝሓለፈ ሰሙናት ጀሚሩ አብ ኤርትራ ሓያለ ስድራ ቤታት መርድእ ሞት ብሰንኪ እቲ አብ ማእከላይ ባሕሪ ዘጋጠመ ሓደጋ ብብዝሒ ይርድኡ ከምዘለው ዝፍለጥ ኢዩ።

ስርዓት ህግደፍ ነቶም ብኣሽሓት ዝቑጸሩ ኤርትራውያን አብ ሊብያ አብ ውሽጢ ረመጽን ካራሩ አሸበርቲ ከምዝርከቡ እናተፈልጠ፤ እቲ ሰርዓት ከምዘይምለከቶ ነቲ ጉዳይ ዓሽሽ ኢልዎ አሎ። ስርዓት ህግደፍ አብ ዝሓለፈ ሰሙን አብ ባሕሪ ዝጥሓሉ 350 ኤርትራውያን’ውን ከምዘይሰምዓን ስድራቤታት ዓው ኢሉም ደሃይ ደቆም ከየናድዩን አብ ትሕቲ ራዕዲ ሒዝዎም አሎ።

ስርዓት ህግደፍ ብኣንጻሩ ስደተኛታት ዋሕዚ ክንቆጻጸር ናይ ገንዘብ ሓገዝ ግበሩልና እናበለ ጉዳይ ሰደተኛታት ኤርትራውያን ናብ ሸቐጥ አውሪድዎ አሎ። ከምዝፍለጥ ንስደተኛታት ኤርትራውያን ካብ እስራኤል ናብ ሃገረን ንክቕበላ መንግስቲ ሩዋንዳን ዩጋንዳን ብኣምሳይኡ ሚሊዮናት ዶላራት ካብ መንግስቲ እስራኤል ክረኽባ ምኻነን ማዕከናት ዜናታት ይሕብራ አለዋ። መራሒ ርዋንዳ ነዚ ጉዳይ ሕቅነቱ ከምዘረጋገጸ ድዝከር ኢዩ። ስርዓት ህግደፍውን አብዚ ዕዳጋ ወሪዱ ነዚ ደሳልጡ ሰባት ጊሩ ጽዑቕ ናይ ዲፕሎማሲ ርክባት ይገብር አሎ። ነዚ ምስሊ ኤርትራን ክብሪ ኤርትራውያን ባይታ ዘቢጡ፤ ሃገር አብ ሓደገኛ ኩነታት አውዲቕዋ ዘሎ ምልካዊ ስርዓት ምእላይን አብ ኤርትራ መሰል ወዲ ሰብ ዝኽበረሉ ባይታ ንምፍጣር ምቅላስ ናይ ኩሉ ዜጋ ሓላፍነት ኢዩ። እቶም አብ ወጻኢ ዝርከቡ ኤርትራውያን ነቲ አብ ውሽጢ ሃገር ተዓፊኑ ዘሎ ህዝቢ ድምጹ ከስምዕሉ ግዜ ዝጠልቦ ሕቶ ኢዩ። ናይ መንግስቲ ቀንዲ ስራሕ ናይ ዜጋታት ህይወት ምድሓን ኢዩ።

ኢደይ ኢድካ ንብሃሃል፤ ምልኪ ንኽምሓው።