ፖሊስ እስራኤል ኣሲሮሞም ዝነበሩ ልዕሊ 50 ኤርትራውያን መንእሰያት ደለይቲ ፍትሒ ብዘይካ ክልተ ኩሎም ነጻ ተለቒቖም፣ ምልካዊ ስርዓት ህግደፍ ዘይሕጋዊ ንጥፈታት ዘካይደሉ ሰነዳት ብጭብጢ ተታሒዙ።

ድሕሪ’ቲ ኣብ መንጎ መንእሰያት ደለይቲ ፍትሕን ደገፍቲ ምልካዊ ስርዓት ኢሳይያስን ትማሊ ቐዳም 21 ታሕሳስ ኣብ ገሊላ ዝተኻየደ ግጭት ፖሊስ እስራኤል ኣሲሮሞም ዝነበሩ ልዕሊ 50 ኤርትራውያን ደለይቲ ፍትሒ ብዘይካ ክልተ፣ ኩሎም ነጻ ክልቀቑ ከለዉ፣ ካልኦት ክልተ ብመውቃዕቲ ዝተሃሰዩ መንእሰያት ገና ኣብ ሆስፒታል ሕክምናዊ ክንክን ይግበረሎም ከምዘሎ ምንጭታት ኣሰና ካብ እስራኤል ሓቢሮም።

እዚ ከምዚ ኢሉ ኸሎ፣ እቶም ኣብቲ ግጭት ዝተገብረሉ ኣጋጣሚ ዝወዓሉ መንእሰያት፣ ኣምባሳደር ስርዓት ህግደፍ ተስፋማርያም ተኸስተ (ወዲ ባሻይ) ኣብቲ ኣኼባ ዘካይደሉ ዝነበረ ኣዳራሽ ገዲፉዎ ዝሃደመ ሰነዳት ሎሚ ኣብ ዝገበሩዎ መደበራት ቴለቭዥን እስራኤል ዝተረኽባሉ ጋዜጣዊ ዋዕላ ብጭብጢ ብምቕራብ፣ እቲ ስርዓት ዘይሕጋዊ ምስግጋር ገንዘብ ዘካይደሉ ሜላታት ኣቃሊዖም።

መንግስቲ እስራኤል ስደተኛታት ብቐጥታ ናብ ኤርትራ ዝልእኩዎ ገንዘብ ደረት ገይሩሉ ከምዘሎ ዝፍለጥ ኮይኑ፣ ደገፍቲ ናይቲ ስርዓት ዝኾኑ ኤርትራውያን ኣባይቲ ንምግዛእ ክብ ዝበለ ገንዘብ ናብ ኤርትራ ክሰዱ ኣብ ዝደልዩሉ ግዜ ብመንገዲ ፍራንክፈርት (ጀርመን)፣ ነቲ ናይ እስራኤል ሕጊ ብምድንጋር ከመይ ኣቢሎም ብዙሕ ገንዘብ ከምዝልእኩ ዝሕብር ናይ ባንክ ሕሳብ፣  ምስቲ ኣምባሳደር ስርዓት ህግደፍ ወዲ ባሻይ ገዲፉዎ ዝሃደመ ሰነዳት ከምዝተረኽበ እቶም ምንጭታት ኣገንዚቦም።

ኣምባሳደር ስርዓት ህግደፍ ተስፋማርያም ተኸስተ (ወዲ ባሻይ) ኣብቲ ኣኼባ ክዛረበሉ ዘዳለዎ ኣጀንዳ ዝሓዘ ደብተር ከይተረፈ ኣብቲ ኣዳራሽ ገዲፉዎ ክስወር ከሎ፣ እቶም ሰዓብቱ ‘ውን ሰለስተ ኮምፒተራትን ሞባልይላትን ገዲፎም ከምዝተበተኑ ተፈሊጡ። እቶም ደለይቲ ፍትሒ ነተን ዝረኸቡወን ሞባይላት ቆጺሮም ንፖሊስ እስራኤል ከምዝረከቡዎም ‘ውን እቲ ሓበሬታ የመልክት።

እቶም ደለይቲ ፍትሒ ኣብቲ ሎሚ ዘካየዱዎ ጋዜጣዊ ዋዕላ፣ ኣብዚ እዋን’ዚ ንስርዓት ህግደፍ ወቒሶም ኣብ እስራኤል ኢዶም ሂቦም ክንሶም ተመሊሶም ናይ ዝድግፉዎ ኤርትራውያን ዝርዝራዊ ጸብጻብ ረኺቦም ከምዘለዉ ብምምልካት፣ መንግስቲ እስራኤል ብሓቂ ነቶም ብሓሶት ዑቕባ ዝሓተቱ ስደተኛታት ናብ ኤርትራ ናይ ምምላስ ተገዳስነት እንተልዩዎ ኮይኑ፣ ብጭብጥታት ክተሓባበሩዎ ከምዝኽእሉ ኣዘኻኺሮም።

ብዝኻልእ ወገን፣ እቶም ደለይቲ ፍትሒ ኣብ ዘካየዱዎ፣ ነቲ ናይ ትማሊ ኩነታት ዝግምግም ርክብ፣ ኣብቲ ንምልካዊ ስርዓት ህግደፍ ብምቅዋም ዝተኻየደ ምንቅስቓስ፣ ሰራዊት ሕድሪ፣ ስምረት ኤርትራውያን መንእሰያት ንድሕነት ሃገር፣ ከምኡ ‘ውን ነጻ ደለይቲ ፍትሒ ብዘይኣፈላላይ ብሓድነት ደው ኢሎም ደሞም ብሓባር ከምዘፍሰሱ ብምግንዛብ፣ ነዚ ኣብ ስራሕ ዝተጓናጸፉዎ ስምረት ዓቂቦም ብዘይኣፈላላይ ሓደ ኣካል ኮይኖም ክንቀሳቐሱ ከምዝወሰኑ ኣረጋጊጾም።