Chris Cotter ዝተባህለ ሓደ ግዱስ ኣመሪካውን ጉጅሊኡን ብዛዕባ ጠንቂ ዋሕዚ ስደት ኤርትራውያን ኣብ ጉዕዞ ስደት ዘጋጥሞም ዘሎ መከራን ንዓለም ንምብራህ The Eritrean Exodus ብዝብል ኣርእስቲ ናይ ፊልም ፕሮጀክት ንምስላጥ ዘካየዱዎ ምወላ ናይ ምርካብ ጎስጓስ፣ ልዕሊ እቲ ወጢኖሞ ዝነበሩ ናይ 30 ሽሕ ዶላር ታርጌት ብምውጻእ ተዓዊቱ።

ንሳቶም ነታ ፊልም ብምሉኣ ንምምዋል መበገሲ ዝኸውን ገንዘብ ንምውጻእ ቅድሚ ሒደት ሰሙናት ዝኣወጁዎ ገደብ ግዜ ክልተ መዓልትን ፈረቓን ተሪፉዎ ኳ እንተሎ ድሮ ልዕሊ 31 ሽሕ ዶላር ተዋጺኡ ኣሎ።

እቶም ኣብ መዓስከራት ስደተኛታት ኤርትራውያን ኣብ ኢትዮጵያን እስራኤልን ብምብጻሕ ሓያለ ኤርትራውያን ስደተኛታት ዘዘራረቡ ሰብ ሞያ ከምዝጠቐሱዎ፣ ኤርትራውያን መንእሰያት ብሰንኪ እቲ ገደብ ዘይብሉ ከም ገላዩ ዘገብሮም ዘሎ ሃገራዊ ኣገልግሎት፣ ማእሰርትን ቅትለትን፣ ብሩህ መጻኢ ስለዘይረኣዮም ዝፈትዉዋ ሃገሮም ገዲፎም ናብ ስደት ክውሕዙ ይግደዱ ከምዘለዉ ኣገንዚቦም።

Chris Cotter ን ብጾቱን በዚ ኣብ ሒደት ኣዋርሕ ክፍጽሙዎ ሒዞሞ ዘለዉ ናይ ፊልም ፕሮጀክት፣  ኣብ መበል 21 ክፍለ ዘበን ከምዚ ዝኣመሰለ ከቢድ ስቅያት ኣብ ዓለም ምርኣዩ ንተዓዛቢ ክብድሁዎ ትጽቢት ከምዘለዎም ‘ውን ኣሚቶም።