ኤርትራዊ ምንቅስቃስ ንዲሞክራስን ሰብኣዊ መሰላትን- ደቡብ ኣፍሪቃ (ኤምዲሰመ)፣ አብቲ ብዕለት 01 ለካቲት 2013 ኣብ ንውዮርክ፣ ሕቡራት መንግስታት ኣመሪካ፣ ዝተኻየደ ኣኼባ ፈጻሚ ኣካል ባይቶ መንእሰያት ውዱብ ሕቡራት ሃገራት፤ ተሳቲፉ። ኣባል ፈጻሚ ኣካል ኤምዲሰመ፤ ኣቶ ሜሮን ሰመዳር፤ ንኤምድሰመ ብምውካል ኣብ ኣብ ዘስመዖ መደረ፤ ኣብ ኤርትራ ዘሎ መዳርግቲ ኣልቦ መግሃስ ሰብኣዊ መሰላት ናይ ዜጋታትን ህሉው ፖለቲካዊ ኩነታት ኤርትራን ብሰፊሑ ገሊጹ። እቶም ተሳተፍቲ እቲ ኣኼባ፤ ድሕሪ ሰፊሕ ክትዕን ምይይጥን፤ “ምውሓስ ሰብኣዊ መሰላት ንውሕስነት ዘለዎ ምዕባለ” ዝብል ንኩነታት ኤርትራ ንምክትታል ውሳነ ከምዘሕለፉን እሱ ድማ ብፕሮፈሰር ዳን ኮነል ክትእለ ምዃናን ተፈሊጡ ኣሎ። ድሕሪ እቲ ዋዕለ፤ ኣቶ ሜርን፤ ምስቶም ተጋባእቲ ዓሚቕ ዘተ ከምዘካየደን፤ ብፍላይ ከኣ ምስ ኮንሰለር ናይቲ ዋዕላ ዝኾነ፡ ቀዋሚ ወኪል ሃገረ ዒራቕ ኣብ ውዱብ ሕቡራት ሃገራት፡ ኣምባሳደር ሓሚድ ኣል ባያጢ፤ ህዝቢ ኤርትራ ኣብዚ ሕጂ እዋን ኩሉ መሰላት ተነፊግዎ፤ ኣብ ሃገሩ ከም ባርያ ከምዝነብርን፤ መንእሰይ ኤርትራ ነቲ “ዝኾነ ክሃድም ዝተረኸበ ቅተል” ዝብል መምሪሒ ስርዓት ኢሰያስ፤ ነጺጉ፤ ብብዝሒ ይስደድ ከምዘሎ ኣብሪሁ።
ዳይረክተር፡ እቲ ባይቶ መንእሰያት ኣብ ውዱብ ሕቡራት ሃገራት፤ ዝኾነ፤ ሚስተር፤ ፓትሪክ ሲያራታ፤ ኤምድሰመ ኣብዚ ዋዕላ ምስታፉ ከምዘሖጎሶን፡ ኣብ ቀጻሊ ኣኼባታት እዚ ባይቶ ከኣ፤ ተሰታፍነት ኤርትራወያን፤ ድልየቱ ምዃኑን፤ ኩሉ ዝከኣል ክገብር ድሉው ምኾኑ ገሊጹ።
ኤምድሰመ፡ ንኩለን እተን ቀወምቲ ኣባላት ባይቶ ጸጥታ ውድብ ሕቡራት ሃገራት፤ ዝኾና፤ ቻይና፤ ራሻ፤ ዓባይ ብሪጣንያ፤ ፍራንሳን፤ ሕቡራት መንግታት ኣመሪካን፡ ከምእውን ንዋና ጻሓፊ ውድብ ሕቡራት ሃገራት ባን ኪ ሙን፤ ሜሞራንደም ኣረኪቡ። ኣብቲ ኤምድሰመ ዘቅረቦ ሜሞራንደም፤ መንግስቲ ኤርትራ ብቅዋም ከምዘይግዛእ፤ ምርጫ ከምዘየለ፤ ንመንግስቲ ዝቃወም ዜጋ፤ ካብ ጎደናታት ተገፊፎም ኣብ ማሕዩር ከም ዝዳጎኑን ኣብ ፍርዲ ከምዘየቀርቡን፤ ኤርትራውያን ናይ ሓሳብካ ምግላጽን ምእካብን ናጽነት ከምእተነፍጎምን፤ ኤርትራ ኣብዚ ሕጂ እዋን፤ ዓባይ ቤት ማእሰርቲ ተቐይራ ከመዘላን ገሊጹ። እዚ ከኣ ኣንጻር እቲ ሃገራቶምን ውዱብ ሕቡራት ሃገራትን ዝቆመሉ መትከላት ምዃኑን፤ ስቓይ ኤርትራውያን ኣብ ምፍታሕ እጃሞም ከበርክቱን ጸዊዑ።

ቤት ጽሕፈት ኤምድሰመ
07 ለካቲት 2013
ፕሪቶርያ
ደቡብ ኣፍሪቃ