ንልዕሊ ኣርባዕተ ኣዋርሕ ብዛዕባ እቲ ኣብ ኣዋሳ ኢትዮጲያ ዝተመስረተ ኤርትራዊ ሃገራዊ ባይቶ ንዲሞክራስያዊ ለውጢ ክንዛረብ ኣይደለናን፡፡ሕማቕ ናትካስ ኦሆይ ይብለካ ስለ ዝኾነ ሕመቕና ተሰኪምና ክንጓዓዝ ሰለይ ክንብል ኣብ መስርሕ ጌጋታቱ እናኣለየ ክኸይድ መሪጽናን ሓሲብናን፡፡ እንተኾነ ሓባእ ቁስሉ ሓባእ ፈውሱ ከም ዝበሃል፡ዝሓባእናዮ ቁሰሊ ገና ካብ መፈለምትኡ ሓሳኹ ገይሩ ክምሽምሽ ምጅማሩ ኣስተባሂልናሉ ኢና፡፡ነገራት አንዳተበላሸወ ምእንቲ ሞጎጎ ትሕለፍ ኣንጭዋ ዝኸድናዮ ህዝቢ ተስፋታቱ ከይጽልምት እቲ ሓቂ እንዳፈለጥና ከም ዘይፈለጥናዮ ዝዓበጥናዮ ደጊም ይኣክል፡፡በዚ ጉዳይ’ዚ ድማ ቀዲምና ጌጋና ነልዕል፡፡ንሕና ከም ኤርትራውያን ተቓለስቲ ብምስሊ ጫካን ገበል ዝምሰል ህግደፋዊ ስርዓት ኣሊና ካብኡ ዝገደደ ዳይኖሶራዊ መላኺ ክንተክል ድሌትናን ዓስብናን ኣይኮነን፡፡ስለዚ ባይቶ ኣዋሳ ናበይ ገጹ ዝብል ተኸታታሊ ጽሑፍ ኣብ ዝቕጽል ብተኸታታሊ ከነቕርቦ ኢና፡፡ነዚ ጽሑፍ ኣብ ምእራምን ግቡእ ስዋስው ትግረኛ ኣብ ምትሓዝን ዝተሓባበሩና መንእሰያት ብስም ተኸታተልቲ እዚ ጽሑፍ ነመስግን፡፡ከምኡ ውን ኣዳላዊ መርበብ ኣሰና ጋዜጠኛ ኣማኑኤል ኢያሱ ጽሑፋትና ናብቲ ንሓቀኛ ለውጢ ዝቃለስ ዘሎ ውጹዕ ሓፋሽ ኤርትራዊ ክበጽሕ ንእትገብረልና እንግዶት ብልቢ ነመስግን፡፡

እቲ ካብ ዕለት 21 ክሳብ 30 ሕዳር 2011 ኣስታት 600 ኤርትራውያን ተቓለስቲ ደለይቲ ደሞክራስያዊ ለውጢ ኣብ ኣዋሳ ተኣኪቦም ብዘይ ምሉእ ዕግበት ዝተመርጸ ባይቶ ንሎሚ ብእገሩ ዘይኮነ ብርእሱ ኢና ክንጅምሮ፡፡እቲ ምንታይ ሃገር ከቢድ ሓደጋ ደበና ኩናት ኣንጸላልይዋ፡ህዝቢ ዝሓለፈ መሰክሕ ውግእ ከይድገም ኣብ ሻቕሎት እንከሎ ድምጹ ይኹን መረገጺኡ ክንሰምዖ ስለ ዘይከኣልና፡፡ኣብቲ ዝቕጽል ተኸታታሊ ጽሑፋት ግን እዚ ባይቶ ካብ አበጋግሰኡ ክሳብ እዚ ሕጂ ንኣስታት ኣርባዕተ ኣዋርሕ ዝተዓዘብናዮ ዘይስገሩ ዓበይቲ ጉድለታቱ ብጉሁድ ከነቃልዖ ኢና፡፡እዚ ከምቲ ንዝተበገሰ ቃልሲ ንምሕንኳል ዝግበር ተንኮል በለጽን ተበለጽትን  ኣይኮነን፡፡ንሕና ኣብ ዝኾነ ኣንጻር ስርዓት ኢሳያስ ዝትከል ቃልሲ ንበቆ ደገፍ የለን፡፡ንባይቶ ዘለና ደገፍ ውን ከምኡ እዩ፡፡ክዕረን ከጽልጸልን ዝግበኦ ኣበራት ግን ክእለን ክዕረይን ክኽእል ኣለዎ፡፡

ኩልና ከም ዝተኸታተልናዮ መንግስቲ ኢትዮጲያ ዝሓለፈ 15 መጋቢት 2012 ዶብ ኤርትራ ሰጊሩ ክሳብ 18 ኪሎ ሜተር ንውሽጢ መሬት ኤርትራ ኣትዩ ኩናት ከም ዘካየደ ብእዉጅ ገሊጹ እዩ፡፡ደጊሙ ዝሓለፈ ሓሙስ 22 መጋቢት ውን ዲፕሎማሰኛታት ዝተፈላለዩ ሃገራት ዓዲሙ ብዛዕባዚ ጋዜጣዊ መግለጺ ሂቡ እዩ፡፡ጨፍላቂ ስርዓት ኢሳያስ ካብ ቶኽታኺ ተግባራቱ እንተዘይ ተቖጢቡን እንተዘይ ተኣዲቡን ከምኡ ዓይነት ስጉምትታት ደው ከም ዘይብል ውን ተነጺሩን ተረጋጊጹን ኣሎ፡፡መንግስቲ ኢትዮጲያ ነቲ ዝተኻየደ ውግእ ዕዉት ነይሩ ጥራይ ብምባል ዝርዝራቱ እንታይ ከመይ ኔሩ ኣይገለጸን፡፡ ብዜካ እቲ ኣብ ከባቢታት ራሚድ፡ ገለቤና፡ ጊብና ዝተኻየደ ውግእ ኣብ  ካልእ ቦታታት ዶብ ኤርትራ ሰጊሩ ኩናት ከምዝኸፈተ ውን ኣይገለጸን፡፡ቀዳም 17 መጋቢት 2012 ኣብ ከባቢታት ባድመ ውግእ ከም ዝነበረ ግን ሓበሬታታት ኣሎ፡፡ እብዚ ናይ ዕለት 17 መጋቢት 2012 ውግእ ኣስታት 400 ኤርትራውያን ወተሃደራት ከም ዝተማረኹ ዘይተረጋገጸ ጽላቕ ወረ ኣሎ፡፡ገና እቲ ናይ ውግእ ሃዋህው ክምዘይ ዓረፈ ኣብ ብዙሕ ከባቢታት ሓሓሉፉ ቶኽሲ ከምዘሎን ህዝቢ ኣብ ከቢድ ስግኣት ከምዝወደቐን ካብ ውሽጢ ዓዲ ቀጻላይ ሓበረታታት ኣሎ፡፡ ብመንጽሩ ትማሊ ሰንበት 25 መጋቢት 2012 ዲክታቶራዊ መራሒ ኢሳያስ ኣብ ዘገበሮ ቃለመጠየቕ ሓላፍነት ህዝቢ ከምዘይስከም ዘስምዕ ንዝነበረ ኩነታት ክገልጽ ፍቓደኛ ከምዘይኮነን እቲ ውዲት ናይ መንግስቲ ኣመሪካ ኢዩ ክብል ብድፍኑ ስጊርዎ ኣሎ፡፡ ኩነታት ሃገርና ኣብ ከምዚ ዝኣመሰለ ኣሻቓሊሃዋህው እንከሎ ኤርትራዊ ሃገራዊ ባይቶ ንደሞክራስያዊ ለውጢ ድምጹ ይኹን መርገጺኡ ዘየስማዓሉ ምኽንያት ግን ስለምንታይ?

ኣብዚ ጉዳይ እዚ ዋላ እኳ ጨፍላቒ ስርዓት ኢሳያስ ክዳኸም ካብ ተወጢሕዎ ዘሎ ዘይሕጋዊ ናይ ምልኪ ስልጣን ብዘይ ውዓል ሕደር ክእለይ ንደልን ንቃለስን እንተኾና ብኣባትር ካልኦት ኣካላት ክኸውን ግን ኣይግድን፡፡ሳዕቤን መዘዛቱ ውን ከቢድ እዩ፡፡ ብተወሳኺ ህዝቢ ኤርትራ ብጨፍላቒ ስርዓት ኢሳያስ ክሳዱ ተረጊጹ ምስትንፋስ ተሳኢንዎ ኣብ ትልኽ እንከሎ ዝገደደ ከተጽብበሉ ዝወሓጥ ኣይኮነን፡፡ብቐንዱ ውን ኩናት ኣብ ዝኾነ ይኹን እዋን ቅቡል ኣይኮነን፡፡መፍትሒ ውን ኣይኮነን፡፡ብፍላይ ዶብ ተሳጊርካ ዝግበር ኩናት  ዝኾነ ምኽኒት ሃበሉ ወራር እዩ፡፡ኣብ ከምዚ ዝኣመሰለ ተኣፋፊ ጉዳይ ህዝቢ መድሕን እናደለየ ድምጽኻ ሓቢእካ ምጽቃጥ ግን ኣብ ትዕዝብቲ ዘእቱ እዩ፡፡ሓደው ንደገፍ እንተስ ንምውጋዝ ድምጽን መርገጽን ኤርትራዊ ሃገራዊ ባይቶ ንደሞክራስያዊ ለውጢ ክስማዕ ምተገበኦ፡፡ብኣንጻሩ ዓለም ለኻዊ ምንቅስቓስ መናእሰይ ኤርትራ፤ ሰልፊ ደሞክራሲ ህዝቢ ኤርትራ፤ሲቭክ ደሞክራስያዊ ምንቅስቓስ ኤርትራ ፈጻሚ ቦርድ፤ ዜጋታት ንደሞክራስያዊ መሰላት ኣብ ኤርትራ–ስድሪ ከምኡ ውን ውልቀ ዜጋታት ኤርትራ ብጋህዲ ኣብ ቃልሲ ዝርከቡ ሰፊሕ ትንታነታት ሂቦምን መረገጺኦም ኣብ ኩናት ኣነጺሮምን ኢዮም፡፡ ናይተን ሳላሳ ዝኾና ውድባትን ኣብ ኪዳን ዝሕቖፋ ልዕሊ ዓሰርተ ውድባትን ደለ ይኹን፡፡ኣብቲ ናይ ሓሸውየ ጸወተአን ኣይንኣቱን፡፡ እንተ እቲ ካብ ስቭክ ማሕበራትን ህዝብን ውድባትን ተሓናፊጹ ተተኺሉ ዝተባህለ ኤርትራዊ ሃገራዊ ባይቶ ህጣሙ ዘጥፍእ ግን ስለምንታይ?ህዝቢ ክርህዎ ካብ ተጻዒንዎ ዘሎ ከቢድ ጾር ንኸገላግሎ ዶ ኣይኮነን ተተኺሉ፡፡እሕሕ ቢሉ ድምጹ ዘየሰምዕ ካብ ተዋጋኢት ላም ዘየድሕን እንተድኣ ኮይኑ እንታይ ኢዩ ቁምነገሩ?ኤርትራዊ ሃገራዊ ባይቶ ኣብ ከምዚ ዝኣመሰለ ዓበይቲ ሃገራዊ ጉዳያት ንህዝቢ መድሕን ዋልታ ክኸውን እንተዘይ ኪኢሉ ብደዉ ሞይቱ እዩ፡፡ገና ፍሑኽ ከይበለ መብጽዓ ዝመረጽዎ ሓቀኛ ተቓለስቲ ጠሊሙ ኣሎ፡፡ከምዚ ዝኣመሰለ ከቢድ ጥልመት እናፈጸመ ስግርፎኦ መሊኡ ዝፈስስ ጉድለታቱ ሎሚዶ ጽባሕ ይዕረ እናበልና ተሰኪምናዮ ክንከይድ ከም ዝሓለፈ ርኢና ከምዘይ ረኣና ክንከውን ኣይመረጽናን፡፡ስለዚ ኣብ ዝቕጽል ባይቶ ኣዋሳ ናበይ ገጹ ብዝብል ኣርእስቲ ህዝቢ እቲ ሓቂ ክፈልጦን ኣብ ምእራሙ ክሳተፍን ሓሳባትና ከነፍስሶ ኢና፡፡ ኣብ መጠረሽታ ደጊያት ባህታ ሓጎስ ኣብ ገለ ኣጋጣሚ ኣብ ምጥልላም ዝነበሮም ስክፍታ ንኽገልጹ ከምዚ ቢሎም ማሰ ማሰ ኢሎም ይበሃል፡፡ንዓና ውን ግርም መለበሚ ስለ ዝኾነ ብማሰ ደግያት ባህታ ሓጎስ ክንሰናበት፡፡

ኣንታ ማሰ ማስ ማሰ

ለሰ ሓርሽ ዝዓድኹም እልፊ ትግዘሙ

ለሰ ኣንበሳ ዝዓድኹም ዕጽፊ ትግዘሙ

ስገም ዝቐለብኩም ጠጥዑሙ

ስርናይ ዝመግብኹም ጠጥዑሙ

ኣንከለናስ እኳ ክንደይ ከይትሓስሙ

ምስ ሞትና ድኣ እምበር ከይትጠልሙ

ቢሎም ስክፍቶኦም ገሊጾም ይበሃል፡፡ስክፍታ ደግያት ባህታ ሓጎስ ድሕሪ ሞት ንዝመጽእ ጥልመት ኢዩ ዝእምት ዝነበረ፡፡ገና ፍሑኽ ከይበሉ ከይተበገሱ ብሂወትና ክጠልሙና ኣድብዮም ዘለዉ ኸ ድኣ እንታይ ዝኦሙ ማሰ ማሰ ክንብለሎም ደቀይ ሃብሮማት?ወደሓንኩም ኣብ ዝቕጽል፡፡

ዕጥቅና ሓቂ ኢዩ

ሓባራዊ ርእይቶን ገምጋምን

ብርሃነ፤ ሳምሶም፤ኣሕመድ፤ኪዳነ፤

selameri2012@gmail.com