ሰራዊት ሱዳን ግዳይ ዘይሕጋዊ ምስግጋር ሰባት (human trafficking) ንዝኾኑ 231 ስደተኛታት ገይሊ ኣብ ዝተባህለ ከባቢ ገዳርፍ ዝርከብ ጫካ ነጻ ከም ዘልቀቐ መርበብ ሓበሬታ ሱዳን ትሪቡን ንመንግስታዊ ኣገልግሎት ዜና ሱዳን፡ ሱና ብምጥቃስ ትማሊ 8 ግንቦት ሓቢሩ።

ዜግነት ናይቶም ግዳያት ኣይተገልጸን፡ ይኹን እምበር ዶባት ሱዳን ኤርትራውያን ብብዝሒ ናብ ስደት ካብ ዘምልጡሉ ሓደ መንገዲ ምዃኑ ይፍለጥ።

ብመሰረት `ቲ ሓበሬታ፡ ኣብ መንጎ እቶም ግዳያት 34 ደቀንስትዮን 3 ቆልዑን ይርከቡ።

ሱዳን ትሪቡን፡ ኣብ ዝሓለፈ ወርሒ መጋቢት ኣብ ካርቱም ብተመሳሳሊ ስርሒት 27 ደቀንስትዮ ዝርከባኦም 177 ግዳያት ዘይሕጋውያን መሰጋገርቲ ነጻ ከምዝወጽኡ ይጠቅስ። ኣብ ወርሒ ታሕሳስ 2017 `ውን ኣብ ዞባ ከሰላ ፖሊስ ምስ`ቶም ዕጡቓት ድሕሪ ዘካየዱዎ ናይ ቶኽሲ ልውውጥ 95 ግዳያት ነጻ ከምዘውጽኡ የዘኻኽር።

ሱዳን፡ ምንጭን መሰጋገሪት ካብ ኤርትራን ኢትዮጵያን ብመንገዲ ሊብያ ናብ ኤውሮጳ ዝሰግሩ ኣሽሓት ስደተኛታት ከምዝኾነት ይፍለጥ።

ሃገራት ኤውሮጳ ብስደተኛታት ምስ ኣዕለቕለቓ ኣብ 2014 ዓመተ ምህረት፡ ሱዳንን ኤርትራን ምስ ዝርከባአን ሃገራት ምብራቕ ኣፍሪቃ፡ ዋሕዚ ስደተኛታት ንምዕጋት ዝዓለመ ስትራተጂካዊ ምሕዝነት ዝብሃል ርከብ መስሪተን፡ ብምወላ ገንዘብ ሕብረት ኤውሮጳ ዝተደገፈ ዕማም ተዋሂቡወን እዩ።

በዚ መሰረት፡ መንግስቲ ሱዳን ንገበነኛታት ክሳብ 20 ዓመት ማእሰርቲ ዝቐጽዕ ሕጊ ጸረ-ዘይሕጋዊ ምስግጋር ከምዘጽደቐ ሱዳን ትሪቡን ይጠቅስ።

ቅድሚኡ ኣብ ዝነበረ፡ ብብዝሒ ኤርትራውያን ካብ ዶባት ሱዳን ብ ራሻይዳ ተጨውዮም ካብ ኢድ ናብ ኢድ ከም ጊላታት ኣብ ዝሽየጡሉ ዝነበሩ እዋን፡ ሓለዋ ዶብን ፖሊስን ሱዳን ብግቦን ገንዘብን እቶም ዘይሕጋውያን መሰጋገርቲ ተደሊሎም ምስቶም ዘይሕጋዊ መሰጋገርቲ ብምትሕብባር ንኤርትራውያን ስደተኛታት ናብ ሓደጋ የቅልዑ ከምዘንበሩ፡ ኣብ ሲናይ ዝሳቐዩ ዝነበሩ ኤርትራውያን ግዳያት መስኪሮም እዮም።