እቲ ኣብ ዝሓለፈ ሳምንታት ኣብ ማእከል ከተማ ኣስመራ፣ ቀትሪ ምድሪ ቶኽሲ ከፊቱ ኣብ ልዕሊ 11 ንጹሃት መንእሰያት ጃምላዊ ቅትለት ዝፈጸመ ህድግለነዘይብለኡ ፋሽሽታዊ ምልካዊ ስርዓት ኢሳይያስ፣  ኣብ መላእ ስዑዲ ዓረብያ፣ ማለት ጀዳ፣ ርያድ፣ ደማም፣ ጣይስ፣ የንቡዕ፣ መካ፣ ጀዛን፣ ገዛ ገዛ እናኣተወ ነቶም ናብ ቤትጽሕፈቱ ምምልላስ ዝተሓሰሙ ኤርትራውያን፣ ኣብ ወጻኢ ዝርከቡ ኤርትራውያን ተቓወምቲ ካብ ዓለም እናኣነጸሉ ዲፕሎማስያውን ገንዘባውን ደገፋት ዓለም ከምዝንፈገና ይገብሩ ስለዘለዉ፣ ደገፍቲ መንግስቲ ምዃንኩም ፈርሙልና እናበለ፣ ብጸቕጥን ምፍርራሕን ኣብ ጠፋሽ ፊርማታት ናይ ምእካብ ወፍሪ ተጸሚዱ ከምዘሎ ምንጭታት ኣሰና ካብ ጀዳ ሓቢሮም።

እቶም ምንጭታት እቲ ምልካዊ ስርዓት ብመንገዲ መሓዮታት መጋበርያኡ፣ ሰብኡት ንስራሕ ምስወፈሩ ገዛ አዛ እናካሕኵሐ፣ ከምኡ ‘ውን ኣብ ፈቐዶ እንዳሻሂ ከም ለማኒ ኣእዳው ጢል እናበለ ዘካይዶ ዘሎ ተራእዩ ዘይፍለጥ ዓቕሊ ጽበታዊ ጎስጓስ፣ እቲ ስርዓት ክሳብ ክንደይ ወዲቑን ሓሲሩን ከምዘሎ ዘርኢ ዘጸይን ተግባር ምዃኑ ኣገንዚቦም።

ኣብ ቀጻሊ ኣስማት ናይቶም መጋበርያ ናይዚ ጽዩን ስራሕ ኮይኖም ዘለዉ መቃጠርቲ ብዝርዝር ክገልጹ ምዃኖም ‘ውን ኣሚቶም።

ምስዚ ኣብ ዝመሳሰል ዜና፣ ኣብ ዝተፈላለያ ከተማታት እስራኤል ‘ውን ነቲ ኣቐዲሞም ብዝተፈላየ ምኽንያት ናብ ቤትጽሕፈቶም ዘርጠብ ዝበለ ሰብ ከም ቅድመ ኩነት ዘፈርሙዎ ዝነበሩ  ናይ ደገፍ ወረቐት፣ እቲ ዝሓሰቡዎ ቁጽሪ ስለዘይመልኣሎም ደገ ወጺኦም ናይ ፌርማ ለመና ተታሓሒዞሞ ከምዘለዉ ኣረዲኦም።

ምስዚ ኣብ ዝተኣሳሰር ዜና፣ ኣብ ዓዲ እንግሊዝ ህዝቢ ብምኽንያት ሕማማት ብኣብ ኣፍ ጾሙ ኣብ ኣብያተ ክርስትያናት፣ ብልቡ ካብቲ ንሶም ዘውረዱሉ መዓታት ክመሓር ኣብ ዝጽልየሉ ዘሎ እዋን፣ መንግስትና ንድግፍ ኢና ኢሎም ህዝቢ ብጸቕጢ ከፈርሙ ዝረኣዩ ኤርትራውያን እቲ ስርዓትን ልኡኻቱን ቁሩብ ሕፍረትን ኣሳሕኮን ከምዘይብሎም ገሊጾም።

እቲ ዋላ ምስናይ ቀጻሊ ጥፍኣቱ፣ ብደረት ዘይብሉ ሕድገታት ህዝቢ ኤርትራ ዝበሽቀጠ ምልካዊ ስርዓት፣ ኣብዚ እዋን’ዚ ህዝቢ ኤርትራ ተወዲኡዎ ይኣክል ኣብ ዝብለሉ እዋን፣ ኣብ ነፍሲ ወከፍ ወጻኢ ሃገር ኮታ ሰሊዑ ፌርማታት ኣብ ምልማን ምውራዱ ዕለተ ውድቀቱ ከምዝእኸለ ዝምስክር እዩ። ናይ መወዳእታ ተስፍኡ ሬርማ ካብ ኮነ፣ ነቲ ሃገር ዘጸምለተ ስርዓት ኣይፋል ኢሉ፣ ንለመና ፌርማኡ ‘ይርዳእካ’ ክብሎ ኣለዎ።