መስራትን ኣሰናዳእን ኣሰና ኣማኑኤል ኢያሱ፡ ትማሊ ቀዳም 12 መስከረም፡ ብምኽንያት መበል 14 ዓመት ማሕዩር ላዕለዋት ሰበስልጣንን ጋዜጠኛትትን ኤርትራ፡ ኣብ ዙሪክ ስዊዘርላንድ፡ `ሓባራዊ ራእይ፡ ሓባራዊ ቃልሲ፡ ንናይ ሓባር ዓወት` ኣብ ትሕቲ ዝብል ቴማ ሰፊሕ ህዝባዊ ሰሚናር ኣካይዱ።

ንሱ ኣብቲ ሰሚናር፡ ብ መስከረም 18 2001፡ እቶም ኣብ ማእከል ረመጽ ናይቲ ምልካዊ ስርዓት ረጊጾም፡ ኣብ ኤርትራ ዲሞክራስያዊ ለውጢ ክተኣታቶን ሕጋዊ ቅዋማዊ መንግስቲ ክትከልን ብዓውታ ጻውዒት ዘቕረቡ ሓርበኛታትን፡ እቲ ስርዓት ኮነ ኢሉ መጸዋዕታኦም ንምዕፋን ኣብ ዝፈተነሉ እዋን ኣፍ ኮይኖም ምስ ህዝቢ ዘራኸቡዎም ጋዜጠኛታት ብሕትን፡ ምእንቲ ህዝብን ሃገርን ድርብ መስዋእቲ ከምዝኸፈሉ ብምጥቃስ፡ ወትሩ ክዝከሩ ከምዝግባእ ኣዘኻኺሩ።

እዞም ኣብ ቃልሲ ንናጽነት ኤርትራ መሪሕ ተራ ንእስነቶም ዘወፈዩ ሓርበኛታት፡ ዋላ ኣካል ናይቲ ንሃገር ዘዕኑ ዘሎ ስርዓት እንተነበሩ፡ ኣብ መስርሕ ናይቲ ፖለቲካዊ መኣዝን ኤርትራ ንምትዕርራይ ዝወሰዱዎ ተባዕ ስጉምቲ፡ ንውልቀመላኽነት ኢሳይያስን ጉጅሊኡን ብምቅላዕ ንቕሓት ህዝቢ ኤርትራ ክብ ኣብ ምባል እጃሞም ብምጥቃስ ድማ፡ እቲ ድሕሪ ናጽነት ከም ነጥበ መቐይሮ ፖለቲካዊ ኩነታት ኤርትራ ክግለጽ ኣውንታዊ ስጉምቶም ኣውንታዊ ሚዛን ክወሃቦ እምበር ክነኣኣስ ከምዘይግባእ ብኣብነታት ዝተሰነየ ትንተና ብምቕራብ ኣተሓሳሲቡ።

ንሱ ኣብ መግለጺኡ፡ ምካዊ ስርዓት ኢሳይያስ፡ ነቶም ህዝቢ ኤርትራ ኣብ 50 ዓመታት ዘፍረዮም ሓርበኛታት ናይ ማእሰርትን ምሕቃቕን ታርጌት ክገብሮም ከሎ፡ ንዓዓቶም ከም ሰባት ጥራይ ዘይኮነ፡ ንህዝቢ ኤርትራ ከም ህዝቢ ከንበርክኽ ዝወሰዶ ውዲታዊ ስጉምቲ ምዃኑ ኣረዲኡ። ህዝቢ ኤርትራ ነዚ ተንኮል`ዚ ፈቲጉ ንጻውዒቶም ብምስዓብ ነብሱ ዘይምድሓኑ፡ ንዓዓቶም ጥራይ ዘይኮነ ንርእሱ ተወጺዑ ኣብ ዝኸፍአ ታኼላ ከምዝርከብ `ውን ኣገንዚቡ።

ብዘይካ`ዚ ማእሰርቲ ናይቶም ምስኣቶም ዝተኣሰሩ ጋዜጠኛታት፡ ከም መቐጸልታ ናይቲ ውልቀመላኽነት ኣሰሰኑ ኣብ ስልጣን ንምንባር ዝነበሮ ውጥን፡ ንናይ ህዝቢ ኤርትራ መሰል ነጻ ምግላጽ ሓሳባት ንምቕታል ዝዓመሞ እኩይ ተግባር ምዃኑ ጠቒሱ።

ኣማኑኤል ኣብቲ ዝያዳ ዘተኮረሉ ንህዝብን ሃገርን ኤርትራ ንምድሓን ክግበር ብዛዕባ ዘለዎ ቃልሲ ዝዳህሰሰ ሰፊሕ ኣስተምህሮ፡ ሓባራዊ ራእይ ብምምዕባል፡ ሓባራዊ ዕላማ ስትራተጅን ብምሕንጻጽ ዝካየድ ሓባራዊ ቃልሲ ጥራይ ከምዘዋጽእ ብምጥቃስ፡ ኣብ ስደት ዘሎ ደላዪ ፍትሒ፡ ቀዳምነቱ ምስዓር ውልቀምልካዊ ስርዓት ኢሳይያስ ምዃኑ ብምእማን፡ ፍልልያቱ ኣወጊዱ፡ ህዝቢ ዝመሰረቱ ስሙርን ስጡምን ህዝባዊ ምንቅስቓስ በብኸተማኡ ከስፋሕፍሕ፡ ሓደ ደምበ ተቓውሞ ክኸውን ከምዘለዎ ኣተሓሳሲቡ። እዚ ኣብ ምቅዋም ተሓጺሩ ዘሎ ደምበ ተቓውሞ፡ ኣወዳድባኡ ኣጽፊፉ፡ ኣብ ውሽጢ ኤርትራ ናይ ቃልሲ ክንፊ ብምዝርጋሕ ዕቱብ ምንቅስቓስ እንተደኣ ሃገሩን ህዝቡን ኣብ ምድሓን ወሳኒ ተራ ብምጽዋት ኣብ ዓወት ክበጽሕ ከምዝኽእል ውን ኣዘኻኺሩ።

ወለዶ መንእሰያት ኤርትራ ኣብ ዘበኑ ስዑር ወለዶ ኮይኑ ከይተርፍ፡ ነዚ ዓወት ኣብ ምርግጋጽን ስልጣን ናብ ህዝቢ ኣብ ምርካብን ውሕስነት ክኸውን ዝኽእል ህዝባዊ ምንቅስቓስ መንኮርኮር ኮይኑ ክጸሮ ንምጽዋዕ፡ `ኣብዚ መድረኽ ‘ዚ እጃም ናይቶም ናይ ለውጢ ሞተር ዝኾኑ መንእሰያት ኤርትራ ወሳኒ እዩ። ሓያል ውልቀሰብ ተዋህሊሉ እዩ ሓያል ምቅስቓስ ዝኸውን። ስለዚ መንእሰያት ኤርትራ ከም ውልቀሰባት ‘ውን ብንቕሓትን ተወፋይነትን ነብሶም ሃኒጾም ነዚ ከቢድ ሃገራዊ ብድሆ ንምግጣም ሓጺናዊ ድሉውነት ብምርኣይ፣ ሕመረት ናይቲ ህዝባዊ ምንቅስቓስ ክኾኑ ይግባእ።` ኢሉ።  
ኣብ መወዳእታ ኸኣ፡ ነቶም ኣብ መዓልቲ ኣውድኣመት፡ ካብ ቤተሰቦምን ኣጋይሾምን ነቲ ናይ ዝኽርን መኣዲ ሃገራዊ ዘተን  ኣቐዲሞም ካብ ዝተፈላለያ ከተማታት ስዊዘርላንድ ኣብቲ ሰሚናር ዝተረኽቡ ግዱሳት ኤርትራውያን ርሑስ ኣውድኣመት ብምምናይ ኣመስጊኑ።

ኣብ መዛዘሚ ናይቲ ሰሚናር፡ መንእሰይ ስነጥበበኛ ሓይልኣብ ካብ ዙሪክ፡ ነቲ ናይ ዝኽሪ ዕለት ዘንጸባርቕ ንተሳተፍቲ ዝመሰጠ እዋናዊ ዜማ ኣቕሪቡ።