ንዝኽሪ 24 ግንቦት ማዓልቲ ነጻነት ኤርትራ ብ ኤርትራዊ-ኣመሪካዊ ማሕበረኮም ኣብ ጆርጅያ ኣብ ዝተኻየደ ጽንብል፡ ብ ኣቦና ኣቶ ፍቕረማርያም ማሓሪ ዝቐረበ ቓል።

እንኳዕ ናብ መበል 24 ዓመት፣ዕለተ- ነጻነትና ኣብጸሓና!

ዮሃና “ ን ጸ ዋ ር ” ህዝብና!!

እዛ ሎሚ መዓልቲ እነብዕላ ዘሎና፡መበል 24 ዓመት ዕለተ ነጻነትና፥ እንካብ’ተን ካልኦት፡ኣብ ዝሓለፈ ግዜ ዘብዓልናየን ዕለታት ነጻነትና፥ ፍሉይ ብዝዀነ ኵነት፣ ምስቲ ሎሚ መናእሰያትና ፈቐዶ ባሕሪን ምድረበዳን ዝጠፍእሉ ዘለዉ፡ምስቲ ኣሕዋትና ክሳዶም ዝብተኽሉ ዘለዉ፡ ምስቲ መንእሰያትና ካብ ዓዶም ዝነፍጽሉን ዝብርግግሉን ዘለዉ፡ደሞም ምስ ማያት ባሕሪ ዝሕወሰሉ ዘሎ ግዜ ስለ ዝተጋጠመ፥እቲ ዝተለምደ ስለ መዓልቲ ነጻነትና ኢልና፡ ንመግለጺ ሓጐስና፡ ብመስተን ሳዕስዒትን እነብዕሎ ዝነበርና ተሪፉ፣ኣብ ክንዳኡ፡ ነቲ ዝወርደና ዘሎ መከራታትን፣ ጥፍኣት- ሃገራውያንን ብጥልቀት እነስተንትነሉ መዓልቲ ኰይኑ ኽውዕል፣ንዝወሰኑ፡ ኣካየድቲ ኤርትራዊ ኣመሪካዊ ማሕበረኮም ኣብ ጆርጂያ፡ ክብ ዝበለ ምስጋናን ኣድናቖትን ከነቕርበሎም ይግበኣና።

ኣብዚ እዋን’ዚ፣መንእሰያትና ከም ጤለ-በጊዕ ዝሕረድሉን፣ውሽጣዊ ኣካላቶም ዝምዝሓቐሉን፣ዘሎ ጸልማት ግዜ፣ኣብ መላእ ዓለም እናተቓልሐን፣መራሕቲ ሃገራት ነዚ ጥፍኣት’ዚ ከመይ ገይርና ንዕገቶ እናበሉ ፍታሕ ንምርካብ ዳም-ዳም ዝብልሉ ዘለዉ እዋን፣ብርእዮ ኣእዝንና ኣናሰምዐን ኣዒንትና እናርኣየን፣ሕጂ ዝላን ሳዕሳዒትን ዝረኣየና ሰባት እንተሊና፡ብርግጽ ኤርትርዊ ሕልናን ኒሕን ኣስሓኮን ኣጥፊእና፥ኣብ ልዕሊ’ቶም መከረኛታት ዜጋታትና ነሽካዕልል ምህላውና ዝገልጽ ኢዩ።

እዚ እንርእዮን እንሰምዖን ዘሎና ክፉእ ፍጻሜታት፣ ናባና ዘመሓላልፎ መልእኽቲ እንተልዩዎ፣ ናይቲ ዝወርደና ዘሎ መከራን ዝርወትን፡ ሓድሕድ ምጽልላእን ምፍልላይን፡ጠንቁ እንታይ ኢዩ ኣለሊና፣ነቲ ሽግር ሓቢርና ክንፈትሖን፣ብሕብረት ክንለዓልን ዝጽውዓና ዘሎ ኢዩ።

ኣሕዋት ደቂ ኤረ፡ካብ ጥንቲ ብስምረትን ውህደትን ዝጸናሕና ህዝቢ ኢና። ከምኡ እንተ ዘይንኸውን’ሞ ነቲ ንምሉእ ዓለም ዘስተንክረ፡ ን30 ዓመታት ዘካየድናዮ ደማዊ ቃልሲ፡ ኣብ መፈጸምታኡ ከነብጽሖ ኣይምተኻእለናን ነይሩ።  ሕጂ’ንከ ዓዲ ምስተረኽበ፡እቶም ካብ ሓደ ከርሲ ኤርትራ ዝወጻእና ኣሕዋት፡ ኣብ ታሪኽና ተራእዩ ዘይፈልጥ፣ሓድሕድና ክንረሓሓቕን ክንናኸስን ብሕማቕ ዓይኒ ክንረአአን ንርከብ ኣሎና ። እዚ ከመይ’ሉ ይኸውን? እዚ ምስ ልምድናን ሰርዓትናን ወግዕናን ዘይኸይድ፣ ገለ ውሑዳት እከያት ንጥቕሞም ዝመሃዝዎ ኢዩ። እዚ ምሕዞ’ዚ እንሆ ክሳብ ምጽናት ከብጽሓና ይደናደነናን ይጻብኣናን ኣሎ። ነዚ ዓቢ መንቅብ’ዚ ኣሕዋት ሓቢሮም ክእርምዎን፡ነቲ ጠንቁ ክፈልጥዎን መድሃኒት ክረኽብሉን ይግብኦም። ኣሕዋት ናይ ግድን ተቐራሪቦም ሓድሕዶም ክጣጐሙ ይግብኦም። ምኽንያቱ ኣሕዋት ሓቢሮም እንተ ዘይወጢጦም ህልውና ሃገርን ፡ባህጊ ህዝብን ክረጋገጽ ኣይክእልን። ስለዚ ኣርሒቕና ንጠምት፣ኣይንዓሹ፣ገበጣ ክሳዕ ዝውዳእ ኣይንጻወት። ኣፍና ዘዝሃበና ናይ ምፍልላዪን ምርሕሓቕን ኣሉታዊ ድምጺ ኣይነስምዕ። ምኽኒያቱ ኣሕዋት ኢና። ስስዕትን ሃርጎምጎምን ካብ ቅዱስ ምድርና ሓቢርና ከነርሕቖ እንተ በቒዕና፡ካልእ ዘባእስ የብልናን ። ምብኣስን ጽልእን ብኡ ኣቢሉ ክስነነናን ክተዓዛዘረናን የብሉን። ሓቢርና ነታ እትሸርወና ዘላ ምድዋ ደው ነብላ። ንመን ክሕሾ ኢልና ኢና እንመናጨት ዘሎና። ክሳዕ ሕጂ ፋሕ ጪንግራሕ ዝበልናዮ ይኣክል ንበል። ንምዕሻው፣ንምፍልላይ፣ንምጽልላእ ይኣክል ንበል።ንምጕጅጃል ንምጥቕቓን፡ንምጽልላም ይኣክል ንበል። እንታይ ዘባእስ’ከ ኣሎና፣እቲ ባእሲ ምህዞ ተንኰለኛታት ምዃኑ ኣይ’ን’ስ’ሓቶ። ኣሕዋት ሓቢርና ብዘይ-ኣፈላላይ፡እቶት ሓንቲ ግራት ጸባ ሓንቲ ላም ኰይና ከምቲ ለበዋ ጀጋኑናን ባህጊ ህዝብና ክንሰርሕ ንለዓል።ዅልና ነቲ ዘይተፈጸመ ሕልሚ ህዝቢና ሸለል ኣይንበሎ። ካብ ጥንቲ ጀሚርና ደቂ ስሙር ህዝቢ ኢና። ኣብ ኤርትራ ብረታዊ ቃልሲ ዝጀመርናሉ ቀንዲ ምኽኒያት፥እቲ ዝነበረና ሓጋጊ ኣካልና (ፓርሊያመንት)፣እቲ 99 ዓበይቲ ዓናቕጽ ዝሓዘ ስልጡንን ዲሞክራሲያዊን ቅዋምና ስለ ዝፈረሰና፣ኵሉ ናይ ምንቅስቓስን፡ ናይ ምጽሓፍን ናይ ምዝራብን፡ናይ ምምላኽን፡ሰላማዊ ሰልፊ ናይ ምግባርን መሰላትና ስለ ዝተፋሕቈና፥ነቲ ዝጠፍአ መሰላትና ክንመልስን፡ናይ ገዛእ ርእስና መንግስቲ ክንእውጅን ስለ ዝወሰና ነይሩ።

ናይ ዝሓለፈ ሓሊፉ፣ሕጂ ብዝተፈላለየ ምኽኒያት፣እንተ’ስ ብዕሽነትን ኣርሒቕካ ዘይምርኣይን፣እንተ’ስ ብጕርሕን፡ስስዕትን ብሃርጐምጕምን ሃነፍነፍን ሓድሕድና ብቐጻሊ ክንተሓናፈጥ ወርቃዊ ግዜና እነጥፍእ ዘሎና ኢና። ሎሚ’ሞ ከኣ ወዮ ቀንዲ ውራይ ተረሲዑ፣ኣብ ክንዲ እንተሓቛቚፍን ቑምነገር እንሰርሕን፣ቀደም ዘይነበረን፣ብኣቦታትና ኣቦሓጎታትና ዘይጸንሓና ናይ ኣውራጃ ምፍልላይ እናምጻእና፡ነቲ ብሕብረትን ዓወትን ዝተጓዓዝናሉ ጐደና ሰላምን ሓድነትን፣ጐደና ሓቦን ኒሕን እንሆና ኣእሻዅ ኣሜከላን ድንጉርን ክንዘርኣሉን ከነንጽፈሉን ንርከብ ኣሎና።ስለዚ፡ንኸሉ ከነተዓራርዮ፡ ኤርትራውያን ኣሕዋትን ኣሓትን ሽግ ፍቕርን ስኒትን ኣብሪህና፣ነቲ ናይ ጥንቲ ውርዝነትና፡ ልቢ ምዕባይን ፡ ሕድገታት ምግባርን ፡ምስምማዕን ፡ምጽውዋርን ከነሐድሶ ኣሎና። ኵሉ ዘዕወድውደና ዘበለ  ሓቢርና ከነለልዮን ኣጸቢቕና ክንሓስበሉን ክንገጥሞን የድልየና።ሓደራ ንድሕሪት ኣየነንቀልዕጥ።ኤርትራና ትሰሓግ ኢያ ዘላ።ሃየ ንርደኣያ!!

ዘልኣለማዊ ዝኽሪ ንጀጋኑ ስዉኣትና!!

ሰላምን ፍቕርን ሓድነትን ኣብ መንጎ ኤርትራውያን ኣሕዋትን ኣሓትን ይንገስ!!