ኤርትራዊ ስምረት ንደሞክራስያዊ ለውጢ

ሓጺር ጸብጻብ ውዕሎ 3ይ መዓልቲ

ውዕሎ ሳልሳይ መዓልቲ የካቲት 3, 2015

ኣብ ኤርትራ ከጋጥሙ ዝኽእሉ ሰናርዮታት፣

ረቡዕ የካቲት 3, 2015 ሰሚናር ኤስደለ፣ ትማሊ ዘይደምደሞ ናይ ከጋጥሙ ዝኽእሉ ሰናርዮታት ዝብል ኣርእስቲ ተመሊሱ ዘትይሎም

• 1ይ. ንኢሰያስ ኣልዩ ገለ ዘይመሰረታዊ ለውጥታት ቀይሩ እቲ ስርዓት ከምዘለዎ ምቕጻል
• 2ይ. ከምብዙሕነትና ደረጃ ተመቓቒልና ኣብ ሓድሕድ ኵናት ኣቲና ናይ ምብትታን ሓደጋ ከጋጥም ከምዝኽእል፣
• 3ይ. ሰላማውን ኣሳታፍን ስርዓት ዝፈቕድ ለውጢ ብዝርዝር ርእዩ።

ካብዞም ኣብ ላዕሊ ዝተጠቕሱ ሰለስተ ሰናርዮታት እቲ ኣብ ቍ3 ዘሎ ሰናርዮ ሃገርን ህዝብን  ዘድሕን ምዃኑ ኩሉ ተጋባኣይ ዝርእዮ ምርጫ ይኸውን። እንተኾነ እቲ ካብ ኩሎም ሰናርዮታት ተመራጺ ዝኾነ ተርእዮ ብዙሕ ስራሕን ጻዕርን ዘድልዮ ምዃኑ ፈሊጥና ኣበርቲዕና ክንሰርሕ ርኢና።

ጭዋ ባህልታትን ክብርታትን ህዝቢ ኤርትራ፣

ኣብዚ ኣርእስት’ዚ ኣስተምህሮ ትምህርቲ ዝሃበ ሓውና ዶር. ምስግና ገብረመድህን እዩ። ኣብ ኣስተምህርኡ ዶር. ምስግና ኤርትራ ዝተፈላልየ ባህልታትን ሃይማኖታትን ዘለዋ ሃገር ኮይና ብምክብባር ንዘመናት ብሓባር ዝነበረ ህዝቢ ዘለዋ ሃገር’ያ። ጭዋ ባህልታትናን ልምድታትናን ግን ብፖለቲካዊ ውድባት ብሓፈሽኡ፡ ብውድብ ህግደፍ ከኣ ብፍላይ በትረ ስልጣን ብምጭባጥ ንኹሉ ባህልታትና ኣጥፊኡ ሓድሽ ናይ ምንዕዓቕን ናይ ምፍልላይን ባህሊ ኣተእታትዩ ይገዝኣና ስለ ዘሎ፣ ነዚ ተገንንዚብና ብዝቐልጠፈ ሓድነትና ኣስጢምና ጸላኢና ክንምክት ክም ዘለና ኣስተምሂሩ።

መንእሰያትን ተርኦም ኣብ ለውጥን፣

ኣብ ጉዳይ መንእሰያት ብዘርኢ መንእሰይ ማህር ዑመር ሳልሕ ኣባል መሪሕነት ማእከል መንእሰያት ሱዳን፡ ሰፊሕ መጽናዕታዊ ጽሑፍ፡ መንእሰይ ሮቤል እምባየ ካብ ኤርትራዊ ስምረት ንደሞክራስያዊ ለውጢ ስፍሕ ዝበለ መግለጺታት ኣብ ተራን፣ ድኽመታትን መእሰያት ምስ መዋጽኦታቶም ወሲኾም ትንተናታት ኣቕሪቦም። ኣብ ልዕል’ዚ ተጋባእቲ ተውሳኺታትን ርእሰ-ነቐፌታትን፣ ነቐፌታትን ብምሃብ ኣተባባዒ ለበዋታት ሂቦም።

ካብ መግለጺታት መንእሰይ ማህር ዑመር ሳልሕ፣ በቶም ህይወቶም ምእንቲ ኤርትራን ህዝባን ዘወፈዩ ጀጋኑ ሰማእታት ዘለዎ ክብሪ ጀሚሩ፣ ኤርትራዊ ስምረት ንደሞክራስያዊ ለውጢ ኣብዚ ሰሚናርል’ዚ መላእ ፖለቲካዊ ውድባትን በርጌሳዊ ማሕበራትን፣ ምሁራትን፣ ናይ ዜና ማዕከናትን…..ወዘተ ክሳተፉ ዝወሰዶ ሰናይ ተበግሶ ናእድኡ ገሊጹ። መጽናዕታዊ ጽሑፍ ማእከል መንእሰያት ሱዳን ዝተፈላለየ ትሕዝቶ ዝድህስስ ኮይኑ ካብኡ ድማ፣

1. ህልዊ ኩነታት መንእሰያት ኤርትራ
2. ተራ መንእሰያት ኣብ ፖለቲካዊ መዳይ
3. ንመንእሰያት ዘጋጥሞም ብድሆታትን ክበብርዎ ዝግባእ መኸተታትን
4. ኣገዳሲ ተራ መንእሰያት ኣብ ምህናጽ ሃገር
5. ቅሳነትን ርግኣትን ዝዓሰላ መጻኢት ኤርትራ ንምህናጽ ህዝቢ ካብ መንእሰያት ዝጽበዮ ተራ የጠቓልል።

መንእሰይ ኣቤል ብወገኑ፣ ንተራ መንእሰይ ኣብ ቃልሲ ኣዳኺሙ ዘሎ ምኽንያታት፣

1. ዝተጋደሉ እንታይ ረኺቦም ዝብል ቀቢጸ ተስፋዊ መንፈስ ስለ ዝዓስሎም
2. ኣተሃላልዋ ደምበ ተቓውሞን ብዝሐ ውድባትን ምትህልላኻቶምን
3. ብህግደፍ ዝግበር ጸለመ ንጎረቤት መንግስቲ ኢትዮጵያ ከም ክድዓት ገይሩ ከም ዝቝጽር ካብ ከባቢ ሃገሩን ህዝቡን ኣርሒቑ ክስደድ ከም ዝሓስብ ስለ ዝገብሮ
4. ኣብ መንጎ ምግዳልን ንድሕሪት ተሪፎም ዘለዉ ኣረጋውያን ወለዲ ናይ ምሕጋዝን ዘሎ ጸቢብ ምርጫታት ስለ ዘጨንቖ
5. ብውድባት ዝግበር ምሕብሓባት ስለ ዝጎድልን
6. ኣብ መዓርፎ ስደቱ ምስ በጽሐ ከኣ ቤቱ ሰቡ ንምሕጋዝ ብናይ ጣዕሳ ወረቐትኣቢሉ ኣብ ዳግማይ ባርነት ናይ ህግደፍ ስለ ዝቝረን.. የጠቓልል።

ሰሚናር ኤስደለ ኣብ መደምተምትኡ  ሓደ ፖለቲካዊ ፕሮግራም ዘለወን ውድባት ክሰምራ፣ ዝተፈላለየ መደብ ዕዮ ዘለወን ወድባት ከኣ ኣብ ክሊ ዘራኽበን መደብ ዕዮ ተወዲበን ፍልልያተን ኣጻቢበን ኣንጻር ስርዓት ህግደፍ ዝማእከሉ ቃልሲ ከካይዳ ከም ዘለወን ተማኻኺርና ሰሚናርና ዓጺና።

ናይ ዜናን ሓበሪታን ቤት ጽሕፈት

ኤስደለ

የካቲት 3, 2015