ኣሰናዳኢ ኣሰና ኣማኗኤል ኢያሱ፣ ብቕድሚ ትማሊ ቐዳም 22 መጋቢት ኣብ ቺካጎ፣ ትማሊ ሰንበት 23 መጋቢት ከኣ ኣብ ቶሮንቶ ካናዳ ተኸታታሊ ህዝባዊ ኣኼባታት ብምክያድ፣ ኤርትራውያን ደለይቲ ፍትሒ ውድበይ ወድብካ፣ ማሕበረይ ማሕበርካ ከይተበሃሃሉ፣ ነቲ ኣብ ኤርትራ ዲሞክራስያዊ ለውጢ ናይ ምርግጋጽ ዕማም ብምትኳር በብኸተማኦም ኣብ ሓደ ህዝባዊ ምንቅስቓስ ተወዲቦም፣ ሃገርን ህዝብን ኣብ ምድሓን ብስምረት ክሰርሑ ጸዊዑ።

ንሱ ኣብ መግለጺኡ፣ ኢሳይያስ ንህዝቢ ኤርትራ በቲ ቅንጣብ ሰብኣውነት ዘይብሉ ምልካዊ መግዛእቱ ድሂኹ ሃገራዊ መንፈሱ ስለዘዳኽሞ እቲ ብማእሰርትን ቅትለትን ገዛእቲ ተንበርኪኹ ዘይፈልጥ፣ ኣብ ቅድሚ ምረት ስቓይን ባዕዳውያን መመሊሱ ሃገራውነቱ ዘሐይል ዝነበረ ተባዕ ህዝቢ ተንበርኪኹ ናብ ስደት ይበታተን ከምዘሎ ብኣብነታት ብምጥቃስ፣ ኢሳይያስ፣ ኣብ ታሪኽ ንህዝቢ ኤርትራ ካብ ዘጋጠሙዎ ጸላእቲ እቲ ዝኸፍአ ምዃኑ ኣገንዚቡ።

እቲ ንኣሽሓት መንእሰያት ኤርትራ ኣብ በረኻታት ትግራይ ኣብ ዝርክቡ መዓስከራት ስደተኛታት ዘስፈረ ኢሳይያስ፣ ንደምሒት ካድረታት ኣስመራ ዝገበሮም ኢሳይያስ፣ ጸላኢ ህዝቢ ኤርትራ ምዃኑ ዳርጋ ኩሉ ህዝቢ ኤርትራዊ ፈሊጡ ኳ እንተሎ፣ “ ኢሳይያስ ጸላኢና ምዃኑ ጥራይ ዘይኮነ፣ ክሳብ ክንደይ ከምዝጸልኣና ኣጸቢቕና ክንፈልጥ ይግብኣና ብምባል” ንኤርትራ ካብ ብርሰት ንምድሓን ኤርትራውያን ህጹጽነት ናይቲ ኩነታት ተገንዚቦም ብሓባር ክምክቱዎ ኣዘኻኺሩ።

እቶም ካብ ካብ ቺካጎ ከባቢኣን፣ ከምኡ ‘ውን ካብ ሚኒሶታን ኢንድያናን ንሓያለ ሰዓታት ብመካይን ተጓዒዞም ኣብቲ ናይ ቺካጎ፣ ካብ ቶሮንቶን ከባቢኣን ከምኡ ኸኣ ካብ ለንደን ኦንታርዮ ኣብ ቶሮንቶ ዝተረኽቡ ግዱሳት ኤርትራውያን ‘ውን ጉዳይ ሃገሮምን ህዝቦምን ኣዝዩ ከምዘሻቕሎም ብምምልካት፣ ቀዳነቶም ብምስራዕ ብስምረት ክሰርሑ ዘለዎም ድልዉነት ገሊጾም።