ኣብቲ 27 ሕዳር ኣብ ናይሮቢ ዝጀመረ ዞባዊ ኣህጉራዊ ውድድር ኩዕሶ እግሪ ምብራቕን ማእከላይን ኣፍሪቃ፣ Cecafa፣ ክሳተፉ ኬንያ ዝገሹ ዛጊት ኣስማቶም ዘይተነጸረ ክልተ ተጻወቲ ሃገራዊት ጋንታ ኤርትራ፣ ኣብ’ታ ሃገር ከምዝተሸርቡ ነቲ ኣህጉራዊ ውድድር ሸፈነ ዝገበራሉ ዘለዋ ዝተፈላለያ መርበብ ሓበሬታታት ኣፍሊጠን።

ብመሰረት’ቲ ሓበሬታ እቶም ክልተ ተጻወቲ፣ ትማሊ ቀዳም 30 ሕዳር ናይ ካልኦት ጋንታታት ውድድር ንምዕዛብ Nyayo ኣብ ዝተባህለ ስታድዩም ምስ ኣተው እዮም ኣብዚኣ ኣተዉ ከይተባህሉ ተሸሪቦም።

Goal ጎል ዝተባህለ ኣብ ስፖርት ዘተኵር መርበብ ሓበሬታ ንመግለጺ ዋና ጸሓፊ Cecafa Nicholas Musonye ጠቒሱ ሎሚ 1 ታሕሳስ 2013 ኣብ ዝዘርግሖ ዜና፣ እቲ ጉዳይ ን Cecafa በጺሑዎ ከምዘሎን፣ ንሰበስልጣን ኬንያ ብኡ ንብኡ ሓቢሮም ከምዘለዉን ይገልጽ። ዋና ጸሓፊ Cecafa “ካብ ናይ ኤርትራ ልኡኽ ኩሉ ግዜ ተመሳሳሊ ሽግር የጋጥመና ምህላዉ ኣዝዩ ዘሕዝን እዩ” ከምዝበለ ‘ውን ይጠቅስ።

ኣብ ዝሓለፈ ዓመት ኣብ ኡጋንዳ ኣብ ዝተኻየደ ተመሳሳሊ ዞባዊ ውድድር ዳርጋ ብምሉኦም ኣባላታት ሃገራዊት ጋንታ ኤርትራ ኣብ’ታ ሃገር ድሕሪ ምሽራቦም፣ ፖለቲካዊ ዑቕባ ከምዝሓተቱ መርበብ ሓበሬታ ጎል የዘኻኽር።

ምልካዊ ስርዓት ህግደፍ በቲ “ኣይተሳተፍካን” ከይብሃል፣ በቲ ድማ ካብቲ ብስፖርተኛታት ኤርትራ ብተደጋጋሚ ክበጽሖ ውርደት ከምልጥ፣ ንዝበዝሑ ኣባላት ናይዛ ብሃታ ሃታ ዘቖማ ሃገራዊት ጋንታ ኣብ ሱዳንን ስዑዲ ዓረብን ካልኦት ሃገራት ኤውሮጳን ብዝነብሩ ስደተኛታት ኤርትራውያን ከምዘቖማ፣ ካብ ኤርትራ 6 ተጻወቲ ጥራይ ከምዝሓረየ፣ ኣብ ዝሓለፉ ዜናታትና ኣሰና ደጋጊምና ገሊጽናልኩም ኔርና። ይኹን እምበር ምልካዊ ስርዓት ኢሳይያስ ካብ’ቲ ዝፈርሖ ውርደት ከምልጥ ኣይከኣለን።

ብሰንኪ ‘ቲ ስርዓት ኢሳይያስ ብዘይብቑዕ ምድላው ንስለ ምስታፍ ጥራይ ኢሉ ሰናኒዑ ሃገራዊት ጋንታ ብምቛም ዝኣተዎ ውድድር፣ ሃገራዊት ጋንታ ኤርትራ ኣብ ቀዳማይ ዙርያ ጸወታኣ 3 ብ ባዶ ብሱዳን ከምዝተሳዕረት ይፍለጥ።