ኣብ ዝኽሪ መስከረም እንስከሞ ከቢድ ሓላፍነት!!

ቅድሚ 12 ዓመታት ልክዕ ኣብዛ ወርሒ፡ ሚኒስተራትን ጀነራላትን ዝርከቡዎም ሰውራን ሃገርን ዝመርሑ ላዕለዎት ሓለፍቲ መንግስቲ፣ ቓልሲ ሓርነት ህያው ዝገበሩ ገዳይም ካድራትን ድምጺ ህዝቢ ዘቃልሑ ውፉያት ጋዜጠኛታትን፡ ዲሞክራሲያዊ ለውጢ ኪትግበር ስለዝጠለቡ ጥራሕ ብዓመጽ ብሓይሊ ተቐይዶም ኣብዚኣ ኣተዉ ከይተባህሉ ተሰዊሮም ኣለዉ። እዞም ብወረ-ወረ ኣብ ዒላዒሮ እንተዘይኮይኑ ብወግዒ  ኣበይ ከምዘለዉ  ዘይተነግረሎም  ዒላዒሮ  ዊሒጣቶም ዘላ ጀጋኑ ኣርካናት፡ ብዙሓት ካብኦም፡ ኣብ ሓርነታዊ ቓልሲ ተኣምር ዝሰርሑ፣ ድሕሪ ናጽነት ከኣ ስልጥንትን ብልጽግትን ዲሞክራሲያዊት ቅዋማዊት ሃገር ኪሃንጹ ዝጸዓቱ፣ ኣብቲ ዘሕዝን ክስተት ጎንጺ ዶባት ኣብ ክንዲ ብኩናትን ሓይልን፡ ብሰላምን ዘተን ኪፍታሕ ዝመኸሩ፣ እቲ ግጭት ምስተኸስተ ከኣ ኣልያን ምሕደራን እቲ ኩናት ኪጸፍፍን ኪውርጽጽን ዝመጎቱን ዝሓተቱን ጀጋኑ ኢዮም።

ምኽንያትን መበገስን ናይቲ ድሕሪ ኩናት ዶባት 2000 ዝነቶገን ዝተዋዓወዐን ሕቶ ዲሞክራሲያዊ ለውጢ፡ ብሰንኪ ድኽመት ኣመራርሓን ኣተኣላልያን መንግስቲ፡ ንነዊሕ እዋን ኪውህለል ዝጸንሐ፡ ኣብ ዝተፈላለየ ኣጋጣሚታት ብህዝብን ተጋደልትን ሓሓሊፉ ዝስማዕ ዝነበረ ናይ መላእ ህዝቢ ሕቶ እምበር ናይ ውሑዳት ጉጅለ ወይ ምትእኽኻብ ጠለብ ኣይነበረን።

ኣብ ዝተፈላላየ ኣጋጣሚታት፡ ዋላ ኣብ እዋን ቃልሲ እውን እንተኾነ፡ ኣብ በረኻ፡ ንብልሽውናን ብኽነትን ዝእርም፡ ንብቕዓት ኣመራርሓን ተሓታትነትን ዝነቅፍ ደሞክራሲያዊ ሕቶታት ይለዓል ነይሩ ኢዩ። ድሕሪ ናጽነት ከኣ ህዝቢ ኣብ ዝዕዘቦን ዝርእዮን ክንደይ ኣራሚ ምንቅስቓስ ዘይተላዕለ።  እንተኾነ እቲ ካብ ነዊሕ እዋን ኣትሒዙ ንሕግን ሕጋዊ መዳያትን እናጎሰየ ብምልክን ዕብለላን ኪመርሕ ዝጸንሐ ርእሰ-ብሄር ንገሊኡ ብተስፋን ምኽኒትን ንገሊኡ ገኣ ብሓይልን  መግናሕትን ቆጽዩዎ።

ይኹን እምበር እቲ ብግቡእ ዘይተፈወሰ ቑስሊ ምሕደራን ኣልያን፡ ብፍሽለት ኩናት ዶባት ኢትዮ-ኤርትራ ዳግም ምስ ረኸሰ፡ እቲ ብታሕዎት ቐጸላ ሕብረተሰብ ዝለዓል ዝነበረ ናይ ለውጢ ሕቶ፡ “ድሕሪ ደጊም ይእከል” ኢሎም ናይ ዝተላዕሉ ድምጺ ላዕለዎት ሓለፍቲ መንግስቲ ተሓዊሱዎ ደሚቚ ምስተቓልሐ፡ ኣብ መንጎ ፕረዚደንትን እቶም ደለይቲ ለውጥን ናይ ቃላት ኩናት ጀመረ።

እቲ ንነዊሕ እዋን እናተዋህለለ ዝተኾመረ ዘይሕጋውን ዘይሓላፍነታውን በይናዊ ውሳነ ፕረዚደንት ንሃገር ኣብ ሓደጋ ከእትዋ ምስተራእየ ብዙሓት ካብዞም ዳሕራይ ዝተቐየዱ ላዕለዎት ሓለፍቲ  ብጽሑፍን ብኣፍን መኺሮም ምስተቐብጾም ናብ ህዝብን ሰራዊትን ቅሉዕ ደብዳበ ኪጽሕፉ ተገዲዶም።

እተን በብቑሩብ ኪዓብያን ኪዕምብባን ዝጀመራን ባይታ ዘተን ልዝብን ኪኾና ተስፋ ዝተነብረለን ብሕታውያን ጋዜጣታትና ከኣ ንርእይቶን ሓሳባትን እቶም ደለይቲ ለውጢ ብምቅላሕ፡ ህዝቢ፡ ሕቶታቶምን ጠለባቶምን ኪሰምዕን ኪከታተልን ልዑል ኣበርክቶ ገይረን ኢየን። ድሕሪኡ ድማ ብዙሕ ግዱስ ዜጋ በብዓቕሙ፡ ብጽሑፍን ብኣፍን፡ ክልቲኦም ወገናት ጸገንትን ኣኽረርትን፡ ማለት፡ “እቶም “ኣብ ኩሉ ኩነታትና ሕማቕ ስለዘሎና ኣካይዳን ነመሓይሽ።” ዝበሉን፡ እቶም ““እዚ እተቕርቡዎ ዘለኹም ሕቶ ግዜእን እዋኑን ኣይኮነን።” ብምባል ዝሓንገዱን፡ ኣብ መኣዲ ጠረጴዛ ከቢቦም ጉዳዮም ብዘተን ልዝብን ኪፈትሑ ጸዊዑን ተማሕጺኑን።

እንተኾነ  ሕማቕ ኣጋጣሚ ኬይኑ ፕረዚደንት ኢሳይያስ ከም መራሒ ሰውራን ሃገርን ኣብ ክንዲ ረጊኡን ሰኺኑን ጉዳይ ሃገርን ህዝብን ብምቕዳም ነቲ ጉዳይ ብዘተን ልዝብን ዝፈትሖ፡ ሓይልን ዓመጽን ስለዝተጠቕመ እታ ወርሒ ተስፋን መስተርሆትን ዝነበረት መስከረምና ዘሕዝን ታሪኻዊ ስሕታን ኪትስንድ ተገዲዳ።

ፕረዚደንት ኢሳይያስ ነቲ ሃገራዊ ባይቶ ዝተቐበሎን ዘጽደቖን ሕቶ ምእዋጅን ምስግጋር ደሞክራሲያዊ መንግስቲ ነጺጉ ብሓይሊ ምስጨፍለቖ ህዝቢ ኤርትራ እቲ ዝጸንሖ ናይ ዘተን ልዝብን ተስፋ በኒኑ ርእሱ ከድንን ተቐሲቡ። እቶም ለውጥን ጽገናን ዝጠለቡ መራሕትን ካድራትን ጥራሕ ዘይኮኑ፡ እቶም ፕረዚደንት ልቢ ከዕቢን፡ ምስቶም ናይ ዓመታት መቓልስቱ  ንዘለዎ ፍልልያት ኣብ ጠረጴዛ ብዘተን ልዝብን ኪፈትሖን ዝመኸሩ ሽማግለታት እውን ከይተረፉ ኣብ ማሕቡስ ተዳጒኖም። ድሕሪ’ዚ ፍጻሜ’ዚ ከኣ ሃገርና ኤርትራ ኣብ ትሕቲ ሓደ ጨፍላቕን መላኽን ሓይሊ ከምዝወደቐት ጋህዲ ኮነ። እተን ከም ሕሱም ዝተመነናየን ዕለታት ሕድገትን ድሕነትን፣ ዕለታት ዕርቅን ፍትሕን ከኣ ዛጊት ደቢነንን ጸልሚተንን ይርከባ ኣለዋ።

ስርዓት ህግደፍ ነቲ ንነዊሕ እዋን ፈኸም ኪብል ጸኒሑ፡ ኣብ 2001 ዝነቶገ ላዕለዎት መራሕቲ ዝተጸንበሩዎ ሕቶ ለውጢ፡ ከም ኩሎም ቅድሚኡ ዝተራእዩ ምንቅስቓሳት ሓደ ስም ኣጠሚቑ ከነኣእሶን ኪዝልሎን ስለዝደለየ፡ ሓንሳብ ናይ ሓደ ኣውራጃ ምንቅስቓስ ከምስሎ፡ ንሓንሳብ ካብ ሓላፍነት ምስተኣልዩ ናይ ዝኾረዩ ከምስሎ፡ ንሱን ጉጅሉኡን ስረኦም ምስፈትሑን ንሳሕል ከዝልቑ ምስ ወሰኑን ካብ ፍጹም ስዕረትን ዕንወትን ኣድሒኖሙዎ ክነሶም ከም ኣመሉ ነቲ ክብርን ጽቡቕ ስም ኪጨውን ብተሰዓርነት ኪኸስስ፡ ካልእ ሳዕ ብውዲትን ሽርሕን ከጸልሞም ፈቲኑ፡  ሳላ ብሕታውያን ጋዜጣታት ” ሃየ ንጨባበጥ – ኹሉ ጭቢጢ ብጭብጢ ይቕረብ” ተባሂሉ፡ ብኹሉ ምስ ፈሸለን ምስተቐልዐን ኣፎም ኪዓብሶም ምእንቲ ጣቓ መጥቃዕቲ ግብረ ሽበራ ኒውዮርክ ተጎልቢቡ ብ18-19 መስከረም ዓፊኑ ቐይዱዎም።

ንዘቕረበሎም ክሲ ዝድግፍ ዝኾነ ይኹን ዘተኣማምኖ ጭብጥን መርትዖን ስለዘይብሉ፡ “ደርሆ ጻሕቲራ እትረኽቦ..” ከምዝበሃል ሓሶቱን ጠቐንኡን ርዝነትን  ሚዛንን ስለዘይብሉን፡ ዝኾነ ኣዚሩ ኪሓስብ ዝኽእል ሰብ ብቐሊሉ ኪመምዮን ከለልዮን ስለዝኽእል፡ ንኸምስል እኳ ኣብ ቦታ ሕግን ፍርድን ከየቕረበ ብስዉር ኣብ ጎዳጉዲ ቀይዱዎ ኣሎ።

ኢሳይያስን ጉጅልኡን ኣፎ እዞም ጀጋኑ ስለዝዓበሱ ንኹሉ ነገረ ዘደቀሱ መሲሉዎም ” ኣብ ፈቐዶ ኣኼባታት፡ ንብጾትና ካባና ንላዕሊ ዝሓልየሎም የብሎምን ጽቡቕ ኣለው!” እናበሉ ብሸሓጢ ቓላት ልቢ ግሩሃት ከደናግሩ ፈታቲኖም ኢዮም። ግን ሎሚ ትማሊ ኣይኮነን። ሎሚ ከም ትማሊ ስልጣንን ሓይልና ናይ ዝሓዙ ድምጺ ጥራሕ ኣይኮነን ዝስማዕ። ደሃይን ሃለዋትን እቶም ንፍትሕን ሓርነትን ዝሞጎቱ ጀጋኑና ዋላ  ካብ ሸላታት ዒላዒሮ እውን እንተኾነ ኣይተሓብአናን።

እቶም በብእዋኑ ካብቲ ስርዓት ዘምለጡ ሓለውቶም ዝነበሩ  ዋርድያታት ዝሃቡዎ ናይ ዓይኒ ምስክርነት፡ ከምቲ ሰበይቲ እምበር ኣደ ትብሎ ንኸይከውን እኳ እንተተመነና፡ ካብዚ ጨካን ስርዓት እዚ ፍትሕን ምሕረትን ርህራሀን ሕድገትን እንጽበዮ ኣይኮነን። እትረፍ ኣብቲ ልዕሊ 40 ዲግሪ ሴንቲግሬድ ዝበጽሕ ሙቐትን ከቢድ ጸቕጢ ኣየርን ዘለዎ ሰናጭሮ ዒላዒሮ ተቐይድካ፣ ኣብቲ ቦታ ከም ድላይካ እናተንቀሳቐስካን  እናተናፈስካን እውን እንተኾነ ኪሊማ ዒላዒሮ ዝጽወር ኣይኮነን። ስለዝኾነ  ህዝቢ ኤርትራ ነዞም ጀጋኑ እዚኣቶም ዋላ ብህይወት ይሃልዉ ኣይሃልዉ ከም ሰንደቑን ሰማእታቱን ተቐቢሉዎም ኢዩ።

ህዝቢ ኤርትራ፡ ብሰንኪ’ቲ ፈጺሙ መሰል ዘየፍቅድ ጨፍላቒ  ስርዓት ዋላኳ ኣብ ጎደናታት ወጺኡ  ድምጹ ከስምዕ ዕድል እንተሰኣነ እዞም ፍትሒ ተነፊጉዎም ኣብ ማኣሰርቲ ዝበልዩ ዘለዉ ጀጋኑኡ ንዘልኣለም ኣብ ልቢ ቦታ ከምዝሃቦም ኣረጋጊጹዎ ኢዩ።

ፕረዚደንት ኢሳይያስን ጉጅለኡን ነዞም ሰባት ኣብ ሸላታት ስለዝዓጸዉዎም ድምጾምን ሕቶኦምን ዝተረሰዐ ይመስሎም ይኸውን፣ ጠቒሮም ጠቓቒሮም ጸለሎ ስለዝቐብኡዎም እቲ ዘቕረቡሎም ናይ ሓሶት ክሲ ዝተኣምነ ኮይኑ ይስመዖም ይኸውን፣ ምናልባት እውን “ወዲ ሰብ ረሳዓይ ኢዩ!” ብዝብል  ብሂል ምስልን ስእልን እዞም ጀጋኑ  ካብ መስኮት ተሌቪዥን ሓኺኾም  ካብ ልብን ቀልብን ህዝብን ዘርሕቖዎ ይመስሎም ይኸውን፡ ግን ልዕሊ ምስሎም ሓሳባኦም ልዕሊ ስእሎም ሕልናኦም ድሮ ኣብ ልቢ ህዝቢ ስለዝሰረተ ዝገበረ እንተገበረ ኪዕወት ኣይከኣልን እዩ።

እዞም ሕቶ ዘልዓሉ ደለይቲ ለውጢ  ቅድሚ መስከረም 2001 ኣብ ዝነበረ ታሪኻዊ ፍጻሜታት ምስ ፕረዚደንትን፡ ከም  ብጾትን መቓልስትን ኬይኖም ብሓባር ውዑይን ዝሑልን ዘሕለፉ ጀጋኑ ኢዮም። ይኹን እምበር ንሕሉፍ ጀግንነቶምን ተወፋይነቶምን ኪሒድካ ካብ ታሪኽ ኪትሓኮም ምፍታን ድሕረትን ሕስረትን ኢዩ። ምናልባት እውን ራዕድን ሻቕሎትን ዝፈጠሮ ጭንቀት ኪኸውን ይኽእል።

ዝኾነ ይኹን ክስን ክሱስን ኣብ ናጻ ቤት ፍርዲ ቐሪቡ ሓቅነቱ ተመስኪሩ እቲ ክሱስ በዳሊ ኬይኑ ኪሳብ ዝርከብ ብሕጊ ናጻ ኢዩ። ክሲ ብጭብጥታትን መርትዖን ወይ ድማ ብነብሰ- እምነትን ንስሓን ምስተረጋገጸ ጥራሕ ከኣ’ዩ እቲ ክሱስ እንተስ ብተግሳጽን ማዕዳን እንተስ ንዝፈጸሞ በደላት ዝመጣጠን መቕጻዕትን ፍርድን ተዋሂቡዎ ከም ገበነኛ ዝተሓዝ። እንተዘይኮይኑ፡ ድምጹን መልሱን ከይተሰምዐ፡ ንዝቐረበሉ ክስታት ኣብ ቅድሚ ናጻ ቤት ፍርዲ ቐሪቡ ከይሞጎተ፡ እቲ ከሳሲ ብዝበየነሉ ፍርድን መቕጻዕትን ጥራሕ ገበነኛ ኢኻ ተባሂሉ ኣብ ጎዳጉዲ ኪበሊ ፈጺሙ ኣይግባእን ኢዩ። እንተኾነ ካብ መላኽን ዓማጽን ፍትሕን ርትዕን ኪትጽበ ስለዘይከኣል ኣብታ ሞዴል ኣፍሪቃ ኪትከውን ዝተመነናያ ክቡር መስዋእቲ ዝኸፈልናላ ኤርትራና ይረአ እነሆ።

እቲ ፈጺሙ ኣብ ነብሱ ዘይተኣማመን፡ ብዝፈጸሞ ሃገራዊ ክሕደትን ገበንን ወትሩ ኪብህርር ዝነብር ወገን ድማ ኢዩ ንምስልን ስእልን ንስምን ድምጽን ዝኸሓዶም ብጾቱ ኪርኢ ዘይደሊ። ወትሩ፡ ምስ ስእሎምን ምስሎምን እናኽጋጠም እቲ ዝፈጸሞ ገበንን ክሕደትን ስለዝረኣዮ እትረፍ ኣብ ሜድያ ካብ ዝርእዮ ስእሎምን፡ ብሓሳብ ካብ ዝቐርጾ ጽላሎቶም ከይተረፈ እውን ይርዕድን ይስንብድን ኣሎ።

እትረፍ ኣብ ዕለተ ዝኽሮም ኣብ ነፍሲ ወከፍ ዕለት እውን እንተኾነ  ስሞምን ስእሎምን ምዝርጋሕን ምቅላሕን ብሞየኦምን ጀግነቶምን ምዝራብ ንመላኺ ስርዓት ኢሳይያስን ጉጅለኡን ስለዘየቕስኖም ኪንዝክሮምን ከነድምቖምን ኣገዳሲ ኢዩ።

ስለዚ፡- ንኣባላት ማእከላይን ሃገራውን ባይቶ ሚኒስተራትን ጀነራላትን እሱራት ዒላዒሮ

1. ኣቶ መሐመድ ሸሪፎ  ሚኒስተር ሚኒስትሪ ዞባታት

2. ኣቶ ሃይለ ወልደትንሳኤ (ድሩዕ)  ሚኒስተር ንግድን ኢንዱስትርን

3. ኣቶ ጴጥሮስ ሰሎሙን ሚኒስተር ሚኒስትሪ ሃብቲ ዓሳ

4. ጀነራል ዑቕበ ኣብርሃ ሓለቃ ስታፍ ኣብ ሚኒስትሪ ምክልኻል

5. ሜጀር ጀኔራል ብርሃነ ገብረእግዚእብሄር ሓላፊ ዑቑር ሰራዊት

6. ኣምባሳደር በራኺ ገብረስላሰ ሚኒስተር ሚኒስትሪ ዜና ነበር

7. ኣቶ ሳሊሕ ኬክያ ሚኒስትሪ መጓዓዝያ

8. ብሪጋደር ጀነራል እስጢፋኖስ ስዩም ሓላፊ ፋይናንስ ምክልኻል

9. ኣቶ ጀርማኖ ናቲ  አማሓዳሪ ዞባ ደ/ቀ/ባሕሪ

10. ወ/ሮ አስቴር ፍስሓጽየን ሓላፊት ዕዮን ሰብኣዊ ድሕነትን ዞባ  ዓንሰባ

11. ኣቶ ሓምድ ሑመድ ኣባል ማእከላይ ፈጻሚት ሽማግለ ህግደፍን ሃገራዊ ባይቶን ሚኒስትሪ

 

ንዲሞክራሲያዊ ምስግጋር መንግስትን ምምስራት ቁዋማዊ ስርዓትን ዝደገፉ ኣብ መስከረም 2001 ዝተቐየዱ ገዳይም ተቓለስቲ ሓርነት

12. አቶ ኣልኣዛር መስፍን ኣወሃሃዲ ፕሮጀክትታት ልምዓት ኣብ ሚኒስትሪ ዞባዊ ምምሕዳር

13. ኣቶ ፎርኦን ወልዱ ሚኒስትሪ ንግድን ኢንዱስትርን

14. አቶ ተስፋይ ጎሞራ ሰራሕተኛ ሚኒስትሪ ወጻኣኢ ጉዳያት

15.  ኣቶ ስራጅ ኢብራሂም ወጻኢ ዝምድናታት

16. ኣቶ ኪዳነ ገብረኣብ ወዲ ቐሺ  ኦዲተር ኣብ ጀነራል ኦዲተር ኦፊስ

17. ወ/ሮ ሚርያም ሓጎስ ሓላፊት ሲነማታት

18. ኣቶ እድሪስ  ኣቡዓረ  ዳይረክተር ጀነራል ኣብ ምኒስትሪ ዕዮን ሰብኣዊ ድሕነትን

19. ኣቶ ኪሮስ ተስፋሚካኤል ዓወር ዳይረክተር ጀነራል ኣብ ሚኒስትሪ ቱሪዝም

20. ኣቶ ተስፋገርግስ አማሓዳሪ ንኡስ ዞባ ጸሮና

21. ኣሕመድ ሑመድ ሰራሕተኛ ኤምባሲ ኣመሪካ

23. አቶ ዓሊ ሰራሕተኛ ኤምባሲ ኣመሪካ

24. ኣቶ ሳህለ ወዲ ኢታይ ኣኽባሪ ሕጊ

25.  ኣቶ መሓሪ  ኣውቲስታ ( ንግዝይኡ ዝነበሮ ቦታን ጽፍሕን ዘይተፈልጠ)

26.  ኣቶ ኢሳያስ  (ንግዝይኡ ዝነበሮ ቦታን ጽፍሕን ዘይተፈልጠ)

ኣብ መስከረም 2001 ምስ መራሕቲ ሃገርን ግንባርን ሓቢሮም ዝተቐየዱ ጋዜጠኛታት

27. አቶ ስዩም ጸሃየ ሓላፊ ተለቪዥን ኤርትራ ነበር ፍሪላንሰር ሰኣላይን ጸሓፍን

28. ፍስሃየ ዮውሃንስ ጀሽዋ መስራትን ኣዳላውን ጋዜጣ ሰቲት

29. አቶ ዳዊት ኢሳቕ  መስራትን ኣዳላዊ ጋዜጣ ሰቲት

30 ኣቶ ሰይድ ዓብደልቃድር ካብ ጋዜጣ ኣድማስ

31. ኣቶ ዮሱፍ መሓመድ ዓሊ ካብ ጋዜጣ ጽጌናይ

32. ኣቶ ኣማኑኤል ኣስራት ካብ ጋዜጣ ዘመን

33. ኣቶ ተመስገን ገብረየሱስ ካብ ጋዜጣ ቀስተ ደበና

34. ኣቶ ማቴዎስ ሃብተኣብ ካብ ጋዜጣ መቓልሕ

35. ኣቶ ዳዊት ሃብተሚካኤል ካብ መቓልሕ ከምኡውን

36. ኣቶ መድሃኔ ሃይለ ካብ ጋዜጣ ቀስተ ደበናን፡

ካልኦት ቅድምን ድሕርን መስከረም 2001 በብእዋኑ ዝተቐየዱ ደለይቲ ለውጥን ፍትሕን ጋዜጠኛታት ከምኡ እውን ጽልዋን ተሰማዕነትን ኣለዎም ዝበሃሉ ካብ ንቡር ስርሖም ደስኪሎም ኣብ ሓውሲ ሓለዋን ምክትትታልን ዝነብሩ ዘለዉ ዜጋታትና፡ በዛ  ብስም ኤርትራውያን እሱራትና  እንዝክራ ዘሎና ንኹሎም ቅድምን ድሕርን ናጽነት ዲሞክራሲያዊ ሕቶ ለውጢ ስለዘቕረቡ ጥራሕ ዝተቐየዱን ፍትሒ ዝተነፍጉን ዜጋታትና እናዘከርና ኪወግሕ ሙዃኑን ጽባሕ ንግሆ ኣብታ ብሓርነት እተተንፍስ ኤርትራ ብኽብሪ ከምእንራኸብ ኪንገልጸሎም ንፈቱ።

እቶም ኣብዚ ደም’ዚ ተቖማጢዖም ዘለዉ ፕረዚደንትን ውሑዳት ተሓባበርቶምን ከኣ ጽባሕ ንግሆ ብደም ንጹሃት ከምዝሕተቱ ኪፈልጡ ኣለዎም። እዚ ጭውያን ዓፈናን’ዚ ናይ ውሑዳት ተበለጽቲ ናይ ራዕዲ ስጉምቲ እምበር ናይ ባይቶን መንግስትን ጉዳይ እውን ኣይኮነን። ዋላኳ ዳሕራይ ኢሳይያስን ጉጅለኡን ንዑ ኣተሓጡኡና ብምባል ባይቶ ኣኪቦም ሕጋዊ ከምስሉዎ እንተፈተኑ፡ እዚ ደምዚ ኣብ ውሑዳት ፈጸምቱ ዝጠቓለል ገበን ኢዩ።  ስለዚ  ውዒልካ ሓዲርካ ምጽብጻብ ስለዘይተርፍ፡ እቲ ዓማጺ መላኽን ጉጅልኡን  ኣብ ቅድሚ ሕጊ ቐሪቦም ብህይወት እዞም ጀጋኑ ኪሕተቱ ኢዮም። ስለዚ ነፍሲ ወከፍ ኣብዚ ጉዳይ እዚ ኪዋሳእ ዝሕተት ዘበለ ሰብ ኣቐዲሙ ኪሓስብን ኪመራመርን እንተኺኢሉ ነብሱ ከርሕቕን ከግልልን እንተዘይከኣለ ከኣ ኪጥንቀቕን ኪዕቀብን ንመክርን ንጽውዕን።

ኤርትራውያን ተቓለስቲ ደለይቲ ለውጢ

ዘልኣለማዊ ዝኽሪ ንሰማእታትና ክብርን ሞገስን ነቶም ምእንቲ ፍትሕን ሃርነትን ከቢድ ዋጋ ዝኸፈሉን ዝኸፍሉ ዘለዉ ኣርካናት ዜጋታትና!