ተቐማጦ ኣስመራ ኣገልግሎት ማይ ከይረኸቡ ብዙሕ ገንዘብ ክኸፍሉ ይግደዱ ከምዘለው ምንጭታትና ካብታ ከተማ ሓቢሮም።ኣብታ ከተማ ንልዕሊ ሓደ ዓመት ማይ ዘይረኸቡ ሰባት ናይ ቆጻሪ ኣገልግሎት ዘይከፈልኩም ብዝብል ምስምስ ካብ ዓቕሞም ንላዕሊ ብገንዘብ ይቕጽዑ ከምዘለው ተፈሊጡ።ምምሕዳር እታ ከተማ ቅድመ መጠንቀቕታ ከይሃበ ነቶም ክኸፍሉ ዘይክእሉ ሰባት መስመር ክቁረጽ ኢዩ ብምባል ከምዘፈራርሕ ዝጠቐሱ እቶም ምንጭታት ጥርዓኖም ዘቕርቡሉ ቤት ጽሕፈት እውን ከምዘየልቦ ሓቢሮም።ኣብ ኣስመራ ንጎሮሮኦም ብገንዘቦም ማይ ስሓ(ብጀሪካን)ዝሽየጥ ማይ ክገዝኡ ዓቕሚ ዘለዎም ብመቑነን ከምዝረኽቡ ይፍለጥ።

እዚ ከምዚሉ ከሎ እቶም ብቦንድ ኣባይቲ ዝሃነጹ ኣብ ወጻኢ ዝቕመጡ ኤርትራውያን ኣባይቶም ኣገልግሎት ኤለትሪክ ክረክብ ነፍስወከፍ ሰብ 3000(ሰለስተ ሽሕ)ዶላር ክኸፍሉ ከምዝተገደዱ ገሊጾም፡፡ ዝተኣዘዝዎ ገንዘብ ዝኸፈሉ ዛጊት እቲ ኣገልግሎት ኤለትሪክ ብዘይምርካቦም የንጸርጽሩ ከምዘለው ተረጋጊጹ።

እዚ መሰረታዊ ጠለባት ኣገልግሎት ማይን ኤለትሪክን ከቕርብ ዘይክኣለ ጉጅለ ህግደፍ ኣብ ዝሓለፈ ሒደት ኣዋርሕ ዝገበሮ ዋዕላ ወፍሪ፡ ገንዘብ ህዝቢ ንምዝማት ዝኣለሞ ወዲት ከምዝኾነ ነቲ ስርዓት ብቐረባ ዝፈልጥዎ ወገናት ርእይቶኦም ሂቦሙሉ ኢዮም።