250 ኣፍሪቃውያን ስደተኛታት ኣብ ከባቢ ሊብያ፣ 500 ድማ ኣብ ከባቢ ማልታ ጥሒሎም ዝብል ስግኣት ኣሎ።

ሓንቲ ጃልባ ኣብ ገማግም ባሕሪ ሊብያ ብምጥሓላ ኣማኢት ኣፍሪቃውያን ስደተኛታት ሞይቶም ክኾኑ ከምዝኽእሉ ይግለጽ ኣሎ።

ብመሰረት ሓበሬታ ሰበ ስልጣን ሓይሊ ባሕሪ ሊብያ ካብታ 250 ስደተኛታት ጽዒና ዝነበረት ጃልባ 26 ሰባት ጥራሕ ኢዮም ክድሕኑ ክኢሎም። ሓንቲ ክሳብ 250 ዝበጽሑ ናብ ኤውሮጳ ገጾም ዝጓዓዙ ስደተኛታት ጽዒና ዝተበገሰት ጃልባ ካብ ገማግም ሊብያ ብምጥሓላ ብዙሓት ካብቶም ኣብኣ ዝነበሩ ተሳፈርቲ ሞይቶም ይብል ወሃቢ ቃል ሓይሊ ባሕሪ ሊብያ።

እታ ጃልባ ኣብ ከባቢ’ታ ካብ ርእሲ ከተማ ትሩብሊ ንምብራቕ ኣብ ትርከብ ቶጆውራ ድሕሪ ምጥሓላ 26 ሰባት ጥራሕ ኢዮም ክድሕኑ ክኢሎም ይብል ወሃቢ ቃል ሓይሊ ባሕሪ ሊብያ ኣዩብ ቃሰም። ንሱ  ቀጺሉ፣

“ኣዝዩ ብዙሕ ሬሳታት ኢዩ ኣብ ባሕሪ ጸምበለል ዝብል ዘሎ” ክብል ንኣገልግሎት ዜና ሮይተርስ ድሕሪ ምሕባሩ እቲ ትሑት ዓቕሚ ዘለዎ ሓለዋ ገማግም ባሕሪ ካልኦት ብህይወት ክህሉዉ ዝኽእሉ ሰባት ከናዲ ዘኽእሎ ድሩት ጸጋታት ከምዘለዎ ብተወስኺ ገሊጹ። ብመሰረት ሓበሬታ እቲ ውሃቢ ቃል እቶም ዝበዝሑ ካብቶም ኣብታ ዝጥሓለት ጃልባ ዝነበሩ ስደተኛታት ኣፍሪቃውያን ምዃኖም ክፍለጥ ተኻኢሉ።

ኣብ ካልእ ተመሳሳሊ ፍጻመ 500 ዝኣኽሉ ስደተኛታት ኣብ ከባቢ ማልታ ምስ በጽሑ ተሳፊሮማ ዝነበሩ ጃልባ ብኻልእ ጃልባ ብምህራማ ናይ ሞት ሓደጋ ኣጋጢሙዎም ክኸውን ከምዝኽእል ሓደ ጉዳይ ማይግረሽን ዝከታተል ኣካል ገሊጹ።

ክልተ ብህይወት ዝተረፉ ፍልስጤማውያን ንኣህጉራዊ ውድብ ማይግረሽን (ኣይኦኤም) ከምዝሓበሩዎ እታ ጃልባ ብመደብ ኢያ በቶም ዘይሕጋውያን ኣሰጋገርቲ ደቂሰብ ከምትጥሕል ኮይና። ንሳቶም እቶም ኣሰጋገርቲ ኣብ’ታ ጃልባ ድሕሪ ዝተኸስተ ጎነጻዊ ግጭት ነታ ጃልባ ደይመደይ ኢሎም ከምዘጋጨዉዋ ይሕብሩ።

ወሃቢት ቃል ኣህጉራዊ ውድብ ማይግረሽን ክሪስቲን በርትየውም እቶም ክልተ ሰባት እታ ተሳፊሮማ ዝነበሩ ጃልባ ድሕሪ ምጥሓላ ድሕሪ ሓደ ማዓልቲ ብሓሙስ ከምዝድሓኑ ገሊጻ። እቶም ዝድሓኑ ሰባት ብድምር 9 ምዃኖም እውን ተፈሊጡ።

እቶም ዝድሓኑ ስደተኛታት ዝሃቡዎ ሓበሬታ ከምዘመልክቶ እታ ጃልባ ኣብ መጀመርያ ናይዚ ሒዝናዮ ዘለና ወርሒ ኢያ ካብ ዳምያታ ተበጊሳ። እቶም ኣብኣ ተሳፊሮም ዝነበሩ ስደተኛታት ከኣ ዜጋታት ሶርያ፣ ፍልስጤም፣ ግብጽን ሱዳንን ኢዮም።

ኣህጉራዊ ውድብ ማይግሬሽን ኣብ 2014 ዓ.ም 2500 ሰባት ኣብ ማእከላይ ባሕሪ ብምጥሓል ህይወቶም ከምዝስኣኑ ክእምት ከሎ መንግስቲ ጣልያን ብወገኑ ኣብዚ ሰሙን’ዚ ኣብ 2014 ዓ.ም ልዕሊ 100,000 ስደተኛታት ናብ ገማግም ሃገረ ጣልያን ከምዝብጽሑ ምግላጹ ጸብጻባት ኣገልግሎት ዜና ሮይተርስ የረድእ።