ፕረዚደንት ዶናልድ ትራምፕ መበል 45 ፕረዚደንት ኣመሪካ ብምዃን ሎሚ 20 ጥሪ 2017 ቃለ-ማሕላ ፈጺሙ።

ንሱ ኣብ ጽምብል ቃለ-ማሕላኡ ኣብ ዘስምዖ መደረ፣ ኣመሪካ ፋብሪካታት ዝባደሙላ፣ ገበናት ዝሳዕረረላ፣ ስርዓተ- ትምህርቲ ዝወደቐላ ሃገር ኮይና ምህላዋ ብምጥቃስ፣ ዘበነ ፕረዚደንትነቱ ኣብታ ሃገር ለውጢ ከምጽእ ምዃኑ ተመባጺዑ።

ፕረዚደንት ትራምፕ ዘስምዖ መደረ፣ ንምስሊ ኣመሪካ ዝድውን፣ ብዓቢኡ፣ ነቲ ካብ እዋን ፕረዚደንታዊ ምርጫ ኣትሒዙ ክሳብ ‘ዚ እዋን ‘ዚ ኣብቲ ሕብረተሰብ ተኸሲቱ ዘሎ ፍልልይ ናይ ምጽጋን ኣመት ዘይብሉ፣ ናብ ደገፍቱ ዝቐንዐ ሰንኮፍ መደረ ምንባሩ ገሊጾም።

ብደረጃ ዓለም ክርአ ኸሎ ‘ውን፣ መደርኡ፣ ኣህጉራዊ መሪሕነት ኣመሪካ ዕሽሽ ብምባል ናብ ውሽጢ ዘተኮረ፣ ጸቢብ ሃገራውንት ዘንጸባርቕ ቃና ዝበጽሖ ምንባሩ ኣመልኪቶም።

ኣብቲ ኣብ ዋሺንግተን ዲሲ ዝተኻየደ ጽምብል ንምስታፍ፣ ጸዓዱ ኣመሪካውያን ዝበዝሑዎም ከም ፕረዚደንት ክምረጽ ብድምጾም ዝሓገዙዎ ኣሽሓት ደገፍቱ ክርከቡ ከለዉ፣ ንመሪሕነት ፕረዚደንት ትራምፕ ከም ስግኣት ዝረኣዩዎ ካልኦት ኣሽሓት ተቓውሞኦም ክገልጹ ውዒሎም።

ፕረዚደንት ዶናልድ ትራምፕን ፕረዚደንት ነበር ባራክ ኦባማን ስልጣን ብሰላም ይለዋወጡ

ኣብቲ ኣጋጣሚ፣ ፕረዚደንታዊ ስልጣኑ ሎሚ ዘረከበ ባራክ ኦባማ ሓደ ካብቶም ምስ ልዑል ህቡብነቶም ስልጣን ዝለቐቑ መራሕቲ ኣመሪካ ኮይኑ ክፋኖ ከሎ፣ እታ መዋዳድርቲ ፕረዚደንት ዶናልድ ትራምፕ ዝነበረት ሂላሪ ክሊንተን ምስ ብዓል ቤታ፣ ፕረዚደንት ነበር ቢል ክሊንተን ኣብቲ ጽምብል ተሳቲፋ።

ኣብ ሕብረተ ሰብ ኣመሪካ ዝተኸስተ ፖለቲካዊ ፍልልይ ምረቱ ብዘየገድስ፣ እቲ ምስግጋር ስልጣን፣ ከምቲ ንሓያለ ዓመታት ዝጸንሐ ፖለቲካዊ ያታ እታ ሃገር ብሰላም ተፈጺሙ።

22 ዓመታት ፕረዚደንት ጋምብያ ኮይኑ ዝጸንሐ ያሕያ ጃምዕ ዛጊት ንምሩጽ ፕረዚደንት ኣዳማ ባሮው ስልጣን ካብ ምርካብ ይሕንግድ

ብፍላይ ብመንጽር ‘ቲ ኣብ ምዕራብ ኣፍሪቃዊት ሃገር፣ ጋምብያ፣ ንምርኽኻብ ስልጣን ብዝምልክት ኣብ መንጎ ‘ቲ ኣብ ምርጫ ተሳዒሩ ክንሱ ዛጊት ስልጣን ምርካብ ኣቕቢጹ ዘሎ ፕርዚደንት ነበር ያሕያ ጃምዕን ምሩጽ ፕረዚደንት ኣዳማ ባሮውን ተኸሲቱ ዝቐነየ ፖለቲካዊ ቅልውላው ክርአ ኸሎ፣ ዋላ ‘ኳ ኣብ ኣመሪካ በብግዚኡ ጸብለል ኢሎም ዝርኣዩ ፖለቲካዊ ምፍሕፋሓት እንተለዉ፣ ሃገራዊ ቅዋምን ድልዱላት ፖለቲካዊ ትካላት ኣመሪካን ዘተኣማምኑ ውሕስነታት ‘ታ ሃገር ምዃኖም ዘማትእ ኣይኮነን።