እቲ ዓመት ዓመት ኣብ ከተማ ስቶክሆልም ብህግደፍ ተማእኪሉ ዝግበር ፡ ብጉልባብ ህዝባውን ባህላውን ፈስቲቫል ፡ ሎሚ ዓመት ድማ ብስለስተ ዓበይቲ ወከልቲ መንግስቲ ኤርትራ ተወኪሉ ሓሊፉ። ንሳቶም ድማ ናይ ወጻኢ ጉዳይ ሚኒስተር ኣቶ ዑስማን ሳልሕ ፡ ኣደመንበር ማሕበር ደቂ ኣንስትዮ ወይዘሮ ልኡል ገብረኣብን ኣምባሳደር ተስፋሚካኤል ገራህቱን እዮም። መንቀላወጢን /ዋዕሮን ሶፍያ ተስፋማርያም ድማ ከምኣመላ በቲ ጉራማይለ ቋንቋኣ ንኽትላገጽን ከተዳምቕን ተቐልቂላ ኔራ። እቶም ዕሉላት ናይ ስካንዲናቪያን ወከልቲ ፡ ንማሕበረ ኮማት ኣብ ሓሸውየ ሊል ዘብልዎ ዘሎዉ ኣቶ ዮናስ ማናን ተኽለ መንጉስቱን ነሕልቑቶም ከሐጉሱ ስዋኣ ከምዝጠዓመላ ጸማቚት ስዋ ኮይኖም ሸነን ክብሉ ቀንዮም።

ናይ ሎሚ ዓመት ፈስቲቫል ህግደፍ ስቶክሆልም ካብ መጀመርይኡ ኣብ ዘይርጉእ ኩነታት እዩ ተኻይዱ።

1. ኣብ ውሽጢ ኣባላት ህግደፍን ደገፍቶምን ዘይምርድዳእን ዘይምርግጋእን ከምዝነበረን።
2. ንቅሓት ህዝብና ድማ ኣብ ዝለዓለ ጥርዙ በጺሑሉ ዘሎ ህሞት ኮይኑ፡ ወከልቲ ስርዓት ህግደፍ ዓመት መጸ ዝመባጽዕዎ ናይ ሓሶት ፕሮፖጋንዳ ሰብ ደኺሙ ምዃኑ ብጋህዲ ኣብ እንዳሻህታትን አዕሩክ ኣብ ዝራከቡሉን እንዳመስተታትን ዝገልጸሉ ኩነታት እዩ ተኻይዱ።

ቅድሚ ፈስቲቫል ምጅማሩ ተኽለ መንጉስቱ ወኪል ህግደፍ ኣብ ስካንዲናቪያ ንዕሉላት ኣባላት ህግደፍ ጎዛዝዩ ማለት ኣብ ውሽጢ ኣባላት ህግደፍ ሌላን ጉለላን ብምግባር ኣተፋኒኑ ፡ ገለን ደቂ ውሻጠ ገለን ደቂ ደገ ብምግባር ኣብ ውሽጦም ዘይምትእምማን ብምፍጣር ነንሕድሕዶም ከም ዝተሓላለዉ ብምግባር ፡ ንሱ ዝመረጾም ኣብ ውሽጢ ኤምባሲ ኤርትራ ንሓደ ሰለስተ ምሸታት ዕጹው ኣኼባ ብምግባር ኣብ ውሽጢ ኣባላት ህግደፍን ማሕበረ ኮማትን ሕምትኽትኽ ኣበሎም። ብኣውራጃታት ማለት ሓማሰን ሰራየ ኣከለጉዛይ ውሒዱዎስ ኣብ ወረዳታት ከይተረፈ ብምውራድ ፈላላዩ ስልቲ ብምጥቃም ፡ ብኻልእ ወገን ድማ ንገዳይም ተጋደልቲ ህዝባዊ ግንባር ኣብ ምፍልላይ ፡ ጽዩቕ ስልቲ ይጥቀም ከምዘሎ ኩሉ ዝፈልጦ ናይ ቅርዓት ምስጢር ኮይኑ ዘሎ ሓቂ’ዩ ኮይኑ ዘሎ። ተኽለ መንጉስቱ (ወዲ መንጉስቱ) ቅድሚ ሓያሎይ ኣዋርሕ ንሓንቲ ማሕበረ ኮም ኣብ ስቶክሆልም ኣብውሽጢ ኣባላታ ኣብ ዘጋጠመ ዘይምስምማዕ ፡ ኣብክንዲ ሽግር ዝፈትሕ ፡ ፍልልያት ብምግፋሕን ኣብ ሓደ ኣኼባ ብስም ስዉኣት ፡ ኣኼባ ጠጠው ከብል ኣብ ዝሓተትዎ ፡ ምሕጽንታ ስም ስዉእት ጥሒሱ ኣኼቡኡ ቀጸለ። ብዙሓት እምበር ዶ እቲ ስዉኣትና ዝወደቕሉ ዕላማ ይርድኦ እዩ? ብስም ስዉኣት ጠጠው ክብል ብዘይምኽኣሉ ፡ ኣብ ብዙሕ ህዝቢ ኣዛራቢ ኮይኑ ኣሎ።

እዚ ዝፈጠሮ ዘይምትእምማን ፡ ፈስቲቫል ስቶክሆልም ኣብውሽጢ ኣዳራሽ ፈስቲቫል በቶም ካብ ጀርመን ከፊሉ ዘምጽኦም ብርቱዕ ሓለዋ ምንባሩ፡ ዝሰርሕ ሰብ ከምዘይነበረን እቶም ወዲ መንጉስቱ ዘቕርቦም ኣሰለፍቲ ማለት ኣስተናገድትን ኣብ መሸጣ ተዋፊሮም ዝነበሩ ብድኻም ንድኻም ከምዝተወድኡ እቲ ስራሕ ድማ ጋሕማጥ ከምዝነበር ይፍለጥ። ወላኳ ኣማኑኤል (ወዲ ሸቃ) ከም ኣመሉ ኣብ ኣለናልኪ ወብሳይት ዝጸሓፎ ፡ ፈስቲቫል ስቶክሆልም ከቀናጅዎ እንተፈተነ ኣብ ባይታ ከምኡ ኣይነበረን።

ኣማኑኤል ወዲ ሸቃ ካብ ተላዕለ ፡ ኣብ ጸብጻቡ ዘቕረቦ ሓሶታት ሰብ እንታይ ይብለኒ ከይበለ ፡ ከይሓፈረ ሕቶታት ብጉቡእ ተመሊሱ ንዝበሎ ገለ ካብቲ ሕቶታትን መልስታቱን ኣብ ታሕቲ ተጻሒፉ ስለዘሎ ኣብ ታሕቲ ተመልከት። ተሳታፋይ ፈስቲቫል ስቶክሆልም ከምቲ ናይ ኣማኑኤል ወዲ ሸቃ ዘቕረቦ ዘይምንባሩ ብዙሕ መርትዖታት ክወሃብ ይከኣል’ዩ። ሓደ ካብኡ ፡ ነባራት ተቐማጦ ስቶክሆልምን ከባቢኣን ምስ ስርዓት ህግደፍ ተደናገጽቲ ዝነበሩ ኣብ’ቲ ፈስቲቫል ብብዝሒ ከምዘይነበሩን ፡ ንዓዲ ኣብ ዝመላለስሉ እዋን ኩነታት ሃገሮም ናብ ዝኸፍኤ ደረጃ ይኸይድ ምህላዉ ስለዝተገንዘቡ ፡ ተሳትፎኦም ኣብ ፈስቲቫላትን ኣኼባታትን የሕጽሩ ምህላዎም፡ ገለ ዝደፈሩ ድማ መንግስቲ ምትዕርራይ ክገብርን ንሕዝቡ ክሰምዕን ኣሎዎ ብምባል ፡ ኣብ ባይታ ዘሎ ኩነታት ኣልዒሎም ሕቶታት ኣብ ምሕታት በቒዖም። ዝተሓተተ ሕቶታት ድማ ይምስክሮ’ዩ። ኣብቲ ፈስቲቫል ዝተሳተፉ ብዘይካ እቶም ዕሉላት ህግደፋውያንን ተኸተልቶምን ማለት ወላ ትንፈር እምበር ጤል’ያ ዝመትከሎም ብቲፎዞ ዝርእዩዎ ፡ ዝበዝሑ ኣብ ናእሽቱ ከተማታት ሽወደን ዝነብሩ ፡ ጽምዋ ዝተበልዑን ናእሽቱ ቆልዑ ዘለውዎምን ምንባሮም ኩሉ ዝረኣዮ ሓቂ’ዩ።

ኣማኑኤል ወዲ ሸቃ ዘቕረቦ ቁጽሪ ተሳተፍቲ 14000 ይኸውን ዝበሎ ካብ ሓቂ መገዲ ዓመት ዝረሓቐ እዩ። እስከ ንዕኡ ደስ ክብሎ ንእመነሉ፡ በል ወዲ ሸቓ ሰራቒ መባእ ባዕሉ ይለፋለፍ ከምዝበሃል፡

• ማሕበረ ኮማት ናይ ተንዳ ክራይ ተባሂሉ ከባቢ 15000፡00 SEK ከፊሎም ፡ ዝሽየጥ ንብረቶም ንኣዋሃሃዲት በዓላት ኣረኪቦም ፡ እቲ ኣታውታት ናብ በዓል ወዲ መንጉስቱ ኣታዊ ኮይኑ። ወላ እኳ ጽጹይ ጸብጻብ እንተዘይሃለወና ፡ ህዝብና ሓሻሺ ስለዝኾነ ፡ በቲ ዝኣተወ ዝርካቡ ብዙሕ ገንዘብ ከምዝኣቱ ንምግማቱ ኣየጽግምን እዩ።
• ናይ መእተዊ ጥራይ 14000 x 400 SEK = 5,600,000:00 SEK እንተኮይኑ፡

ኣብዚ ፈስቲቫል ዝኣተወ ገንዘብ ኣበይ ክኣቱ እዩ? ብስም ባህልን ማሕበረ ኮማትን ስለዝዳሎ፡ ማሕበረ ኮማት እንታይ ክምቀላ እየን? ኣብዚ 15 ዓመታት ዝኣተወ ገንዘብ ኣብምንታይ ውዒሉ? ኤርትራዊ ማሕበረሰብ ኣብመላእ ዓለም ኣብዝተሰደደሉ ፡ ቤተክርስቲያን ዘይብሉ ፡ ባዕሉ ዝውንኖ መኣከቢ ኣዳራሽ ዘይብሉ ፡ መስጊድ ዘይብሉ ተሪፉ ዘሎ ፡ ማሕፉዳ ህግደፍን ናይ ውሑዳት ተበለጽትን ጁባ ይመልእ ከምዘሎ ዘዘራርብ ጉዳይ ኮይኑ ኣሎ። ኣማኑኤል ወዲ ሸቃ መልሲ ይህልወካ ዶ ይኸውን?

ኣካየድቲ ማሕበረ ኮማት ሕተቱ! ሕተቱ!

ብኻልእ ወገን ድማ መንግስቲ ህግደፍ ብድጎማ እዩ ዘካይዶ ፈቲቫላት ዝብል ተባራሪ ወረ ድማ ይንዛሕ’ዩ፡ እዚ ድማ ነቶም ሰረቕቲ ክጥዕመሎም ዝነዝሕዎ ካብ ምቁጽጻር ንኸምልጡ ምዃኑ ዝእምቱ ኣይተሳእኑን።

ግደ ሓቂ ክንዛረብ ግን ናይ ሎሚ ዓመት ፈስቲቫል ስቶክሆልም ፡ ዝበዝሑ ቆልዑን ስድራቤት ቆልዑን ጥራይ ምንባሮም ኩሉ ዝተዓዘቦ ኮይኑ ፡ ብግምት ካብ ዝሓለፈ ዓመት ብ 25% ዝወሓደ ሰብ እዩ ኔሩ።

ኣብ ስካንዲናቭያን ብፍላይ ፡ ኣቶ ዮናስ ማና ፡ ተኽለ መንጉስቱ ፡ ሲራክ ፡ ብርሃነ ጥላሁን ፡ ኣለም ተኽለገርግስን ቴድሮስ ጎይትኦምን ተሓተቲ ምዃኖምን ሕሳብ ኣብ ምውርራድ ብዙሕ ሽርሕታት ከምዝገብሩ ናይ ኣደባባይ ምስጢር እዩ። ኣብዚ ንነዊሕ ዓመታት ዝተገብረ ፈስቲቫላት ዝኣተወ ገንዘብ ብጉቡእ ቁጽጽር ተገሩ እንተዝኸውን ነዚ ኣብ ላዕሊ ዝተጠቕሰ መገልገሊ ኤርትራዊ ሕብረተሰብ ንምጥራይ ኣኺሉ ዝተርፍ ምኾነ። ውሑዳት ብዘይካ ግላዊ ጠቕሞም እንተዘይኮይኑ (ብጉልባብ ፖለቲካዊ መርገጽ) ናይ ህዝቢ ረብሓ ዘይዓጦም ከለዉ ኤርትራዊ ማሕበረ ኮማት ክዓብያን ክሰፍሓን ንኹሉ ኤርትራዊ ብዘይ ኣፈላላይ ክእክባን ክጣበቓን ኣይክእላን እየን።

ዘራግማይ ከሎ ጽሩይ ማይ ኣይስተን ከምዝብሃል ፡ ኤርትራዊ ሕብረተሰብ ኣብ ስደት ፡ (ከም ኩሎም ስደተኛታት ካልኦት ዓለታት) ብዘይ ኣፈላላይ (ተቓዋሚዶ ደጋፋይዶ ተበሃሂሉ ካብ ዝመናጨት) ባህሉን መንነቱን ዝተፈላለይ እምነቱን ዓቂቡ ፡ ከምዚ ኣብ ምዕቡል ዓለማት ዝነብርዎ ዘሎዉ ክንነበር ምተኻእለ ኔሩ። ሳላ ስደት ድማ ቤትትምህርቲ ከይከድካ ብኣካል ኣብ ምዕቡል ሕብረተሰብ ብምንባርና ፡ ካብቶም ኣብ ኣፍሪቃ ዝነብሩ ህዝብታት ተመሲሖም ዘይድረሩ ፡ ዕድል ዘይረኸቡ ፡ ኣብ ዝሓሸ ደረጃ ምዕባለ ምሰጎምና ኔርና ንሃገርና ድማ ናብ ምዕባለ ፡ ደሞክራሲ ፡ መሰል ደቂ ሰባት ዝኽበረሉ ጎደና ንኽትጓዓዝ ምሓገዝና ኔርና።

ኤርትራውያን ኣብ ክንዲ ኣብ ዘዝተኣጉደ ጓይላ ፡ ከም ዛርቲ ዝሓዘና እንሽረጥ ፡ ኣብ ጓይላ ስለዝሳዕሳዕካ ንሃገርካን ንህዝብኻን ዓቢ ኣበርክቶ ዘወፈኻ ዝመስለና ኣይውሓድናን። ጉዳይ ህዝብናን ሃገርናን ንኤርትራ ኣንዳተመላለስና ንርእዮ ስለዘሎና ፡ ንመራሕትን ተሓተትን ክመጹ ከሎዉ ክንሓቶምን ጉቡእ መልሲ ክህቡ ክንድርኾምን እዩ ዝግባእ እምባር ፡ ጓይላ ኣቲኻ ምስዕሳዕን ምጥቓዕን ክንዲ ፍረ ኣድሪ እኳ ንሃገርን ህዝብን ኣይሕግዝን እዩ። ብኣንጻሩ ፡ መብራህቲ ብዘይምህላዉ ፡ መነባብሮ ህዝቢ ዓመት መጸ ካብ ሕማቕ ናብ ዝኸፍኤ ኩነታት ምምርሑ ፡ (ኣብነት ናቕፋ ምስ ናይ ዓለም ባጤራ ተወዳዲራ ዋጋ ዘይብላ ምትራፋ) ፡ ኤርትራዊ ሃገሩ ገዲፉ ንስደት ምምርሑ (ድራር ዓሳን መጻወቲ በደዊን ምዃኑ) ፡ ብኣሽሓት ናብ ጸላኢትና እንብላ ኢትዮጵያ ምውሓዙ ፡ ተሓጒስናልኩም ኣሎና ዘስምዕ እዩ። ኣብ ስደት እትነብሩ ቀዲምኩም ዝወጻእኩም ኩኑ ድሒርኩም ፡ ኣብ ኤርትራ ኣሕዋት ወይ ኣሓት እንተኔሮምኩም ብዘይ ሓገዝኩም ከምዘይወጹ ባዕሉኩም ስለእትፈልጥዎ ሓሶት ከምዘይትብሉ ርግጽ’ዩ። እቶም ኣብ ዝተፈላለይ ዓመታት ማለት ኣብ ዘዝተረደኣኩም እዋን ናብ ምሕታት ዘብቐዓም በዚ ኣጋጣሚ ጉቡእኩም ጌርኩም ንብለኩም።

ካብ’ቲ ሕቶታት

1. ኣነ ቅድሚ ሰሙን ኣቢለ እየ ካብ ኤርትራ መጺአ፡ ወዲ ባጽዕ እየ ድማ፡ ኣብ ባጽዕን ከባቢኣን ዝሕረስን ዝፈርን ነገራት የለን፡ ካብ ባሕሪ ማለት ዓሳ ገፊፉ እዩ እቲ ህዝቢ ዝነብር፡ ን 7 ዓመታት ዝኣክል ባሕሪ ተዓጽዩ ፡ ዓሳ ገፊፉ ሂወቱ ንኸይመርሕ ህዝቢ ባጽዕ ተኸልኪሉ ፡ መን’ዩ እቲ ዝኽልክል ዘሎ ኢለ ኣብ ዝሓተትኩሉ ፡ እቲ መንግስቲ እዩ ዝብል መልሲ ረኺበ። ዓሳ ክገፍፍ ዝተረኽበ ሰብ ድማ ካብ 1 ክሳብ 2 ዓመት ይእሰር ወይ ድማ ናይ መቕጻዕቲ ገንዘብ ከፊሎም ይወጹ። ስለምንታት’ዩ መንግስቲ ንህዝቢ ዘባሳብስን ዝገፍዕን ዘሎ? ዝኣቶኹሞ መብጽዓ ስለምንታይ ዘይተተግብሩዎ? በለ ሓታቲ።

መልሲ ናይ ወጻኢ ጉዳይ ሚኒስተር ፡ ዑስማን ድማ እዚ እትብሎ ዘሎኻ ዝፈልጦ ነገር የብለይን ብምባል ካብ ጥዑይ ምምላስ ክሃድም ምስፈተነ፡ ነዚ ዘይትፈልጥ እንተኾንካ ድኣ እንታይ ደሊካ መጺእካ ዝብል ግብረ መልሲ ካብ ሓታታይን ህዝብን ምዕዝምዛም ተራእዩ ፡ መልሲ ናይቲ ሚኒስተር ኣብቲ ህዝቢ ቁጠዐ ፈጢሩ እቲ ህዝቢ በብሓደ ክወጽእ ጀሚሩ። (ሓታቲ ፡ ወዲ ባጽዕ)

2. ሎሚ ኣብ ሃገርና መብራህቲ የለን ፡ ህዝብና ኣብ ጸልማት ይነብር ኣሎ። ኣደታት ካብ 6 – 8 ደቀን ከፊለን ጻመአን ኣይረኸባን ። ጻዕዳ ነጸላ ገረንን ዘርጊሐንን ክልምና ይውዕላ ኣለዋ ፡ ንሕና ድማ ቦንድ ገዚእና 10 ዓመታት ኣሕሊፉ ፡ ኣይ መሬት ወሲድና ገዛ ክንሰርሕ ኣይ ስድራና ክንሕግዝ ኮንና ኣሎና ፡ እዚ ደይኮነን እቲ ሓቂ። ድፍረታን ትብዓታን ርእዩ ምሉእ ህዝቢ ደጊፍዋ።
3.  ንሕና ንሰርሕን ንምኽትን ኣሎና ኣብዚ፡ ንሱኹም ከ ጉቡእኩምዶ ትገብሩ ኣሎኹም? ኣለም ተኽለገርግስ ተቐቢሉ ሕጂ ግዜ ይብልናን ኢሉ መሊሱ። ሓታቲት ዋላ ፍርቂ ለይቲ ይኹን ፡ እንታይ ክገብር ድዩ መጽዩ ክምልሶ ክኽእል ኣሎው በለት። (ሓታቲት ፡ ሪታ)
4. ቅድሚ ወርሒ ኣቢለ እየ ካብ ኤርትራ መጺአ፡ ካብ ኣስመራ ናብ ባጽዕ ኣብ ዝወረድናሉ ምስ ደቀይ ሳላ ገንዘብና እኹል ዝብላዕን ዝስተን ተቐሪቡልና ፡ ካብ ባጽዕ ኣብ ዝተመለስናሉ እዋን ጽርግያታት ክሰርሑ ዝረኸብናዮም መንእሰያት ሓፈሻዊ መነባብሮኦም ሓቲትናዮም ። ነዚ ክንሓትት ዝደረኸና ምኽንታት ድማ ኣብ ገጾም ዝንበብ ዝነበረ፡ ሕሰምን መከራን ስቓይን ፡ መሰንገለታቶም ዝወጸ መንእሰያት ብምርኣይና እዩ። ሕጂ ፡ ስለምንታይ ኢኹም መንእሰያት ተሳቕዩ? ስለምንታይ እዩ ደሞዝ ዘይግበረሎም? ስለምንታይ እዩ ስድራቤቶም ክኣልዩ ዘይኽእሉ? ሓቆም እንድዮም ደኣ መሪርዎም ፡ ካብ ሃገሮም ወጽዮም ቀለብ ኣሞራ ዝኾኑ ዘሎዉ፡ እዚ ድዩ እቲ መብጽዓ? እታ መዓልቲ እቲኣ ኣነን ደቀይን ነብስና ዝጸላእናላ መዓልቲ እያ። (ሓታቲ ፡ መምህር ገብረሂወት ገብረመድህን ሰንጋል)

መልሲ ናይ ወጻኢ ጉዳይ ሚኒስተር ዑስማን ሳልሕ፡ ሓሳዊ ኢኻ ይብሎ። ህዝቢ ጫውጫው ይብል’ሞ። ጫውጫው ምስ በዝሔ ኣላዩ መድረኽ ዝኽሪ ስውኣት ጌሩ ክዓጽዎ እንተፈተነ እቲ ህዝቢ ግን በብሓደ ገዲፍዎ ክወጽእ ጀሚሩ።

ዓወት ንህዝቢ ኤርትራ!

ሕድሪ ስውኣትና ብቓልሲ ክኽበርዩ!

ዘለኣለማዊ ዕረፍቲ ንስውኣትና!

ካብ ፡ ደለይቲ ሰላም ኣብ ሃገርናን ስኒት ኣብ መንጎ ህዝቢ ኤርትራን

ሽወደን