እታ ብህግደፍ ድምጺ ሓቂ እናተባህለት እትጽዋዕ ጋዜጣ ሓዳስ ኤርትራ፡ ኣብ ናይ 26 ታሕሳስ ሕታማ ዝወጻቶ ንመራሒ ሰሜን ኮርያ ነበር ዝምልከት ዘደንጹ ዜና ንመልከት።

ሰሜን ኮርያ፡ ቀቅድሚ ዕረፍቲ መራሒኣ ዝተራእዩ ተኣምራት

መራሒ ሰሜን ኮርያ ኪም ጆንግ ካልኣይ፡ ቅድሚ ምዕራፉ ኣብ ዝነበረ ሒደት ደቓይቕ፡ ኣብታ ሃገር ‘ወዝቢ’ ክትብሎም ዘየድፍሩ ኣገረምቲ ፍጻሜታት ከም ዝተኸስቱ መንግስታዊ ወግዓዊ ኣገልግሎት ዜና’ታ ሃገር ኣጋዊሑ። እቲ ኣገልግሎት ዜና ብቐዳም ኣብ ዘጋውሖ ወግዓዊ ሓበሬታ፡ ኪም ጆንግ ካልኣይ ቀቅድሚ ምዕራፉ ኣብታ ሃገር ዝረግፍ ዝነበረ ብርቱዕ ውርጪ ብቕጽበት ከቋርጽ እንከሎ፡ ኣብ ልዕሊ ‘ፓይክቱ’ ተባሂሉ ዝጽዋዕ ቅዱስ እምባ ዝነበረ ሰማያት ድማ ሃንደበት ናብ ቀዪሕ ተለዊጡ። ብዘይካ’ዚ፡ እቲ መራሒ ቅድሚ ዕረፍቱ ኣብ ዝነበራ ሒደት ደቓይቕ ኣብ ባቡር ተሰቒሉ ሰንጢቝዎም ዝሓለፈ ናብ በረድ ዝተለወጡ ቀላያት ብኡ ንብኡ ብርቱዕ ድምጺ ፈጢሮም ፈጋዕጋዕ ከምዝበሉ፡ ብዝሒ ዘለወን ናይቲ ከባቢ ፍሉያት ኣዕዋፍ’ውን ንሓወልቲ ወላዲ ናይ’ቲ መራሒ ክኾላኦ ከምዝወዓላ እቲ ኣገልግሎት ዜና ወሲኹ ሓቢሩ። ሰሜን ኮርያ ብኣመሪካ ንኸይትምብርከኽ ብዘተጻወቶ መዘና ኣልቦ ተራ ኣብ ህዝቡ ልዑል ኣኽብሮት ዝነበሮ ኪም ጆንግ ካልኣይ፡ ኣብ ጉዕዞ ናይ ባቡር እንከሎ’ዩ ብምኽንያት ሕማም ልቢ ሃንደበት ዓሪፉ።

ህዝቢ ኮርያ ኣብ ዓለም ዝመስከሮ ስቓይ፡ መከራ፡ ሕሰምን ጥሜትን ከም ዘሎ ዓለም ንዓለማ ትፈልጦ ጕዳይ ከም ዝኾነ ኩላትና ንፈልጦ ሓቂ’ዩ። እዛ ከም መንግስቲ ህግደፍ ኣብ ክንዲ ህዝባ ትቕልብ ኣብ ውድድር ናይ ኣጽዋር ተጸሚዳ ማዕረ ኑክሌራዊ ኣጽዋር ወኒና ኣላ እትብሃል ዕጽውቲ ሃገር፡ ህዝባ ብጥሜት ክሃልቕ ምስ ጀመረ፡ “እንተደኣ እኽሊ ረዲአትን ነዳድን ዘለጊስኩምለይ መማዕበሊ ኑክሌራዊ ኣጽዋር ዝኾነ መደበራት ኣይከዕንዎን’የ፡” ስለ ዝበለት፡ “ደሓን ጥራይ ኣዕንዊዮምበር ህዝቢ ኮርያ ህዝብና’ዩ፡” ብምባል ደቡብ ኮርያን ምዕራባውያን ሃገራትን ብሚልዮናት ቶናት ዝግመት እኽልን ነዳድን ክህባኣ ከም ዝጸንሓ ይፍለጥ። መቸም ኣብ ዓለም ንዘልኣለም ኣይንበርን’ዩ፡ እቲ ግኑን ውልቀመላኺ ኪም ጆንግ ሞተ ደኣ። ንሞቱውን መታን ኣድላዪ ምድላዋት ክግበር ተባሂሉ ንሳልስቲ ንደቂ ሃገር ይኹን ሞቱ ንዓለም ሞቱ ከይተነግረ ቀንዩ።

ሕጂ ድማ ህዝቢ ኤርትራ ኣብቲ ኣዝዩ ህቡብ መራሒኡ ውልቀማላኺ ኢሳያስ ዘለዎ እምነት ከም ዝጸንዕ ንምግባር ግዲ ተሓሲቡ፡ እታ ምንጪ ሓሶትን ምድንጋርን ምዕፋንን ዝኾነት ሓዳስ ኤርትራ፡ እዚ ኣብ ላዕሊ ሰፊሩ ዘሎ ሓደ ሕጻን ቈልዓ ክግምቶ ዝኽእል ሓሶት ከም ህያብ ናይ ልደትን ሓድሽ ዓመትን ቀሪባትልና። ዓለም ብዛዕባ ሓድሽ ተክኖሎጂ፡ ቍጠባዊ ምዕባለ፡ ስነህንጻ፡ ስነጥበብ ወዘተ ይዛረብ ይጽሕፍ ኣሎ። እንዳ ጃህራ ድራሮም ህግደፋውያን ድማ መሳኪን፡ ቍምነገር ተረኺቡ፡ ሓቃቶም ከኣ ዝሕግዞም መሲሉዎም፡ “ኣብ እከለ ሃገር ከምዚ ዝበለ ቅያ ኣጋጢሙ! እዚ ተርእዮዚ ኣብኡ ካብ ኣጋጠመ፡ ኢሳያስ’ውን ከምኡ ውልቀመላኺ ስለ ዝኾነ፡ ኢሳያስ ኣብ ዝሞተሉ ግዜ’ውን፡

‘ሃንደበት ጸሓይ ጸልማት ተኸዲናስ ክሳብ ኢሳያስ ዝቕበር ድማ ንሰለስተ ሰዓታት ምሉእ ኤርትራ ካብ ቃሮራ ክሳብ ሰንዓፈ፡ ካብ ግርማይካ ክሳብ ዳህላክ ጸልማት ወሪሱዎ፡ ኣብ ኤርትራ ዘለዉ ሩባታት ከም ቅጽበት ኣብ ዘለዉዎ ክደርቁ ከለዉ፡ ኣኻውሕ ኤርትራ ፈጋዕጋዕ ብምባል ኣውያቶም ብምስማዕ ከም ሕሱም ነቢዖምን ምእባድ ኣብዮምን። ኣእዋም፡ ዓርኮብኮባያት፡ ድማታት፡ ኣዋሊዕ ኤርትራ ድማ ኣቝጽልቶም ነጽዮም ናብ መሬት ኣርጊፎሞስ  መሬት ሕብራ ተቐዪሩ። እንስሳታት ኤርትራ ድማ እዚ ለዋህ ኣቦና ምስ መን ሓዲጉና ይኸይድ ኣሎ ብምባል ብጓሂ ሕርር ኢሎም እናነብዑ ናብ ኣስመራ ኣምሪሖም። ባሕሪ ኤርትራ ብወገኑ ኣብ ከባቢ ዳህላክ ብርቱዕ መጋርያ ብምእጓድ ሃልሃልታ ስለ ዝፈጠረ ብስንክ’ቲ ብርቱዕ ዋዒ ኣብ ስዑዲያን የመንን ዝርከባ ፋብሪካታት ሃንደበት ካብ ስራሕ ደው ኢለን። ሽዑ መራሕቲ ስዑዲን የመንን ኢሳያስ ከም ዝሞተ ተረዱኡዎም፡ ሎሚ ሓደ ዓቢ ሰብ ሓሊፉ ብምባል ቀብሪ ንመዓስ ምዃኑ ክሓቱ ናብ ኣስመራ ክድውሉ እንተ ፈተኑ፡ ናይ ምሉእ ዓለም መራሕቲ ሃገራት ይድውሉ ስለ ዝነበሩ፡ መስመር ተታሒዙ ክሰልጦም ኣይከኣለን። እዚ ተርእዮ’ዚ ወዝቢ ዘጋጠመ ዘይኮነ ገለ መልእኽቲ ከም ዘለዎ ዓበይቲ ዓዲ ኣውኪኦም፡”

ተባሂሉ ክጽሓፍ ምዃኑ ኣይንዘንግዕ። ካብ ህግደፋውያን እንታይ ክንጽበ ንኽእል። ጕዳይ ሃገር የሎን ብዘይካ ኢሳያስ በሊዑ ሰትዩ፡ ጠሪጡ፡ ፈስዩ! ነገር ተወዲኡ። ብዛዕባ ዅሉ ንሱ ክሓስበልና ስለ ዝኾነ ሓንጐልና ኮፍ ኣቢልናዮ ክንጸንሕ ንኽእል ኢና። ፍጹም ሕንኽ ዘይብሉ ሰባት ስለ ዝኾኑ፡ ጽባሕ ንግሆ በቕሊ ወሊዳ ክብሉና ምዃኖምን ርዱእ’ዩ።፡ ስለዚ፡ ካብ ሕጂ ተቐሪብና ንጽናሕ። እቲ ኣነ ዝገርመኒ፡ ህዝቢ ብውሽጡ ይኽዕቦም ከም ዘሎ ከስተውዕሉ ዘይምኽኣሎም’ዩ! ገለ እራይ ምራይን ተረፍ መረፍ ናይ ኢሰፓን ንኸምስሉ ምስኣቶም ሆ! እንተ በሉ፡ “ደጊፎም እንተላሃዩዋስ ዘላ መሲሉዋ” ከም ዝብሃል ኣለና ኢሎም ይሓስቡ ይህልዉ። ብሓቂ ዝሕዘነሎምዩ!

ብሩኽ ልደትን ሰናይ ሓድሽ ዓመትን ይግበረልና! ውድቀት ንህግደፋውያን፡ ሰላምን ዓወትን ንህዝቢ ኤርትራ!

ዘመን በራኺ ኖርወይ