ዝኸበርክንን ዝኸበርኩምን ደቂ ሃገርና፥ ዕለት 07/04/2019 ኮሚቴ ሓድነት ኤርትራውያን ንፍትሒ ሰፊሕ ኣኼባ ጸዊዑ ምንባሩን፥ ብርክት ዝበሉ ኤርትራውያን ተቀማጦ ሎንዶንን ከባቢኣን ከምዝተሳተፉዎን ዝዝከር ኢዩ። ኣብቲ ኣስታት 700 ኤርትራውያን ዝተሳተፉዎ ህዝባዊ ኣኼባ፡ 22 ሓደስቲ ኣባልላት ኮሚቴ ከምዝተመርጹ እውን ትዝክሩዎ ትኾኑ። ምስቶም ዝጸንሑ ኣባላት፡ ብጠቕላላ 30 ዝኣባላታ ኮሚቴ ሓድነት ኤርትራውያን ንፍትሒ ቆይማ ኣላ ማለት ኢዩ።

እቶም ህዝቢ መሪጹ ዝመዘዞም ኣባላት ኮሚቴ ሓድነት ኤርትራውያን ንፍትሒ – ሎንደን፡ ምስቶም ናይ ቅድም ተሓዊሶም፡ ብምልኣት፡ ብዕለት 27/04/2019 ስሩዕ ኣኼባ ኣካዪድና። ኣብዚ ኣኼባዚ ኮሚቴና፡ ቅድም ክብል ዝመምናዮም ስራሓት ገምጊሙ፡ ናይ ቀረባን ርሑቅን መጻኢ መደባት ስራሕ ከኣ ተሊሙ።

ኣብዚ ኣብ ምዕራባዊ ሎንዶን ዝተኻየደ፡ ምሉኣት ኣባላት ዝተረኽብሉ ኣኼባ ነዚ ኤርትራውያን በጺሕናዮ ዘለና ውዕዉዕ ናይ ለውጢ መድረኽ፡ ብግቡአ ብምግንዛብ፥ ኩነታት ዝጠልቦ ህጹጽነትን ሓላፍነታውን ዕማማትን ቀዳምነታቱን ሰሪዑ፡ ኣድላዪ ምውድዳባት ገይሩ ድማ ህዝቢ ዝጽበዮ ዕማማት ከሰላስል ወሲኑ።

ኮሚቴ ሓድነት፡ ኣብ ሓጺር ግዜ ዝዕመም ፍሉይ ስራሕ ኣቐዲሙ ከኣ፥ ነዚ ዓመት መጸ ኣብ 24 ግንቦት እንጽንበሎ ሃገራዊ ናይ ናጽነት በዓልና ዝምጥን፡ ዝክሪን ኣበዓዕላን ንምውዳብ መደባት ሓንጺጹ ንዕዑ ተወሃህድ ሓይሊ ዕማም መዚዙ ኣሎ።

በዚ ኣጋጣሚ ኮሚቴ ሓድነት ኤርትራውያን ንፍርትሒ፥ ንኹሉ ግዱስ ዜጋ፡ ብፍላይ ድማ ንሕዝቢ ሎንደንን ከባቢኣን ዕድመን ምሕጽንታን የቕርብ ኣሎ። ብምልኡ ኤርትራዊ፡ እንኮላይ እቶም ኣብ ካልእ ከተማታት እትነብሩ፡ ነዚ ክቡር ሃገራዊ በዓል`ዚ ዝመጣጠን ጽንብል መታን ክንቅርብ ብዝከኣለኩም ክትሕግዙና ብትሕትና ንሓትት። ብዘይ ዕቃበ ሓገዝኩም፥ ብሞራል፡ ብንዋት፡ ብጥበባዊ ስርሓትን ካልእን ኣድላዪ ምውሳእ ክትከብሩ ንጽውዕ።

እቲ ጽንብል ዝግበረሉ ቦታን ዕለትን ዝገልጽ ዝርዝር ሓበሬታ ኣብ ቀረባ መዓልታት ንህዝቢ ክነፍልጥ ኢና። ንሕጻናትን፡ ንዓበይትን ዘሐጉስ መዓልቲ ክንቅርብ መዲብና ኣለና፡ ክትሳተፉ ድማ ብኽብሪ ንዕድም።

ኣሕዋትኩም ኮሚቴ ሓድነት ኤርትራውያን ንፍትሒ – ዓባይ ብሪጣንያ

ሎንደን 27 ሚያዝያ 2019