እቲ ንምልካዊ ስርዓት ኢሳይያስ ብወግዓዊ መግለጺ ብምዅናን፣ ኣብ ዝተፈላለያ ከተማታት ሕቡራት መንግስታት ኣመሪካ፣ ካናዳን ኤውሮጳን ሃገራዊ ምትእኽኻብ ዝጽውዕ ናይ ሓድነት ኣኼባታት ከሰላስል ዝጸንሐ ገዲም ተቓላሳይን ውፉይ ሃገራውን ዶር ተወልደ ተስፋማርያም (ወዲ ቫካሮ) ሎሚ ምሸት 12 ጥሪ ኣብ ለንደን ሰፊሕን ዕዉትን ህዝባዊ ኣኼባ ኣካይዱ።

ንሱ ኣብቲ ሰፊሕ ተሳታፍነት ህዝቢ ዝተራእየሉ ብዓይነቱ ዝተፈልየ ውዕዉዕ ኣኼባ፣ ንብልሹው ምሕደራ ስርዓት ህግደፍ ብኣብነታት ኣሰንዩ ብምቅላዕ፣ እቲ ሕጋውነት ዘይብልይ ምልካዊ ስርዓት ኢሳይያስ ኣብ ብህጹጽ ካብ ስልጣን ክእለ ከምዘለዎ ብዘየማትእ ገሊጹ። ነዚ ንሃገራዊ ድሕነት ኤርትራ ኣብ ሓደጋ ኣእትዩ ህዝብና ዝበታትን ዘሎ ስርዓት ብህጹጽ ክንኣልየሉ እንኽእል መንገዲ ሃገራዊ ሓደነት ምርግጋጽ ምዃኑ ብምምልካት ከኣ፣ ደለይቲ ፍትሒ ሃገራዊ ስምረት ብምርግጋጽ፣ ንምልካዊ ስርዓት ኢሳይያስ ኣብ ስልጣኑ ናይ ምውዳቕ ዕማሞም ብዘይወዓል ሕደር ከቃንዑዎ ተላብዩ።

እቲ ኣብ ልዕሊ ኤርትራውያን ማእለያ ዘይብሉ ግፍዕታት ብምፍጻም ንህዝቢ ኤርትራ በታቲኑዎ ዘሎ ውልቀመላኺ ኢሳይያስ ኣፈወርቂ ብገበን ጸረ ደቂሰብ ተኸሲሱ ኣብ ኣህጉራዊ ቤትፍርዲ ክቐርብ ጻዕርታት ክግበር ከምዝግባእ ‘ውን ኣዘኻኺሩ።

እቶም ካብ ለንደን ዝተፈላለያ ከተማታት ዓዲ እንግሊዝን ዝመጹ ተስታፍቲ፣ ነቲ ወዲ ቫካሮ ሃገራዊ ምትእኽኻብ ንምርጋጽ ወሲዱዎምዝ አሎ ሰናይ ተበግሶ ምሉእ ብምሉእ ከምዝድግፉዎን ንምዕዋቱ ከምጽዕሩን ኣረጋጊጾም። መስርሕ ስምረትን ሓድነትን  ኤርትራውያን ኣብ ምቅልጣፍ እትነጥፍ ግዝያዊት ኣወሃሃዲት ኮሚተ ‘ውን መሪጾም።

ነቲ ኣጋጣሚ ኣብ ጎኑ ፍትሕን ህዝቦምን ደው ኢሎም ድምጻውያን ወዲ ገባርን ሃኒ ምሕረታኣብን እዋናዊ ሃገራዊ ደርፍታ ብምቕራብ ኣማዕሪጎሞ ኣምስዮም።