ከም ዝዝክር ድሕሪ’ቲ ኣሰቃቒ ህልቂት ዕሸላት መንእሰያት ኤርትራ ኣብ ላምፔዱሳ ህዝብና ካብ ቅድሚ ሕጂ ብዝሓየለ ሕራነ ቁጥዐኡ ሰማይ ዓሪጉ ጠንቂ ናይዚ ኩሉ ኣበሳ ክኣ ስርዓት ህግደፍ ምዃኑ ብምስትብሃልን ካብ ስሩ ንምምሓዉን ብዙሓት ተበግሶታት ክቀላቐሉ ተራእዮም ኣለዉ፣ እቲ ምንታይ ህልቂት ላምፔዱሳ ኣብ ታሪኽ ብዓይነቱ ዝፈለዮ ነገር እንተነይሩ ኣብ ቅድሚ መላእ ማሕበረ ሰብ-ዓለም ዘጋጠመ ኩነት ምንባሩን ልዕሊ ኹሉ ክኣ ብመራኸቢ ብዙሃን ክቃላሕ ብምኽኣሉን ኢዩ።

ብዝኾነ እዚ ዝቀላቐል ዘሎ ተርእዮታት ከምቲ ኣቐዲሙ ዝተጠቕሰ ኣብ ልዕሊ እቲ ኣቐዲሙ ዝጸንሐ ንፍትሒ ዝጽውዕ ምንቅስቓሳት ተወሲኹ ነቲ ልኡም ዝጸንሐ ሕልና’ውን ኣበራቢሩ ብዓይነቶም ዝተፈላለዩ ውዳበታት ዘለዎም ምንቅስቓሳት ክርኣዩ ኣኽኢሉስ ብኣብነት ክጥቀሱ ዝኽእሉ እኳ ከም “ንስመር ንሰፊሕ ምትእኽኻብ ኤርትራውያን ንፍትሓዊ ስርዓት” ብወዲ ቫካሮ፣ “ማሕበር ተጋደልቲ ህ.ግ. ነበር ንለውጢ ዓዲ እንግሊዝ”፣ ከምኡ’ውን “መድረኽ ንሃገራዊ ዘተ” ካልእን ዝኣመሰሉ ኢዮም።

ዝኾነ ውደባ፡ ህዝቢ ዝማእከሉ ምስ ዝኸውን ተቐባልነቱን ኣድማዕነቱን ርዱእ ይመስለኒ። ካብኡ ብምብጋስ’ምበኣር እዞም ዝቀላቐሉ ዘለዉ ተበግሶታት ንስርዓት ህግደፍ ንምውዳቕ ክንቃለስ ኢና ክሳብ ዝበሉ ክተባብዑን ክድገፉን ዝግባእ እመስለኒ፣ ግን ክኣ ብኣንጻሩ ብስም ህዝቢ እናተሓለቕካን እናሸቀጥካን ንገለ እናኣቕረብካን ንገለ እናግለልካን ዝግበር ምትእኽኻብ እንተኾይኑ ግን ካብ ጥቕሙ ጉድኣቱ ከምዝን ኢዩ። እዚ ዘብለኒ ዘሎ እዞም ብስም “መድረኽ ንሃገራዊ ዘተ” ዝብል ስያመ ተበጊሶም ዘለዉ መራሕቲ ህዝባዊ ግምባር ነበር ኢና ዝብሉ፣ ብዐንደ ርእሱ ኩሉ ኣካያይዳኦም  ካብታ ቀደም ንፈልጣ ሚስጢራዊትን ነጻሊትን ህግ ዘይፍለዩ፣ ሕጂ’ውን እቲ ከም ባህሊ ዝወሰድዎ ዘይግሉጽን ኣግላልን ባህርያቶም ዘተግብሩ ዘለዉ ኮይኖም ይረኣዩኒ ። ንኣብነት ኣብ ዕለት 19 ጥሪ ኣብ ሰሜን ሎንዶን ንሳቶም ዝደለይዎም ሰባት ጥራይ ብሕርያ ሕቡእ ኣኼባ ምግባሮም ዘቃልዕ ጽሑፍ ወጺኡ ምምባሩ ዝዝከር ኢዩ። ሕጂ ክኣ ዝሓለፈ ከይኣክል “ዳሕራዮም እምበር ገደደ” ክብል ኣርእስቲ ሂበዮ ዘለኹ፣ ብስንበት ዕለት 02 የካቲት 2014 ዓ.ም ኣብ ሂልቶን ሆቴል ወግዓዊ ምቛም ማሕበሮም ንምእዋጅ ኣብ ዝተዓደመ ኮንፈረንስ ኣብዚ’ውን ብሕርያ ዝተዓደሙ ሰባት ጥራይ ምምባሮም ክዕዘብ ኪኢለ። ኣብዚ ኣጋጣሚ እዚ ናተይ ኣብኡ ምስታፍ’ውን እንተኾነ ካብ ፈለምኡ ኣብ ኩሉ ኣካይዳኦም ኣወዳድበኦምን፡ ዕቃበን ዘይዕገበትን ስለ ዝነበረኒ ብቐንዱ’ን  ብውልቀ ኣብ ልዕሊ እቶም መራሕቲ ናይ ሃገራዊ ዘተ ዘይምእማን ጥርጣረታትን ኣብ ሊዕሊኦም ስለ ዘሎኒ ፡ብሓደ ካብቶም ዝቐርቡኒ ወደብቲ እቲ ኮንፈረንስ ተዓዲመ ዝስምዓካ መታን ክትሓትት ተባሂለ ኣብኡ ዝተረኸብኩ ኢየ።

ተሳተፍቲ እቲ ኮንፈረንስ ኣብ መንጎና ክልተ ወጻእተኛታት ዝርከቡና ካብ 25 ክሳብ 30 ዝቑጽርና ኢና ዝነበርና፣ ኣብዚ ብኣቦወንበርነት ኣቶ ዓንደብርሃን ወልደጊዮርጊስን ኣቶ ዓብደላ ኣደምን ዶር ኣሰፋው ተኸስተን ዝተመርሐ ኮንፈረንስ ናይ ሓንቲ ገጽ  ጋዜጣዊ መግለጺ ድሕሪ ምንባብ ናብ ሕቶን መልስን ብምእታው ሽዱሽተ ሕቶታት እተን ክልተ በቶም ወጻእተኛ ጋዜጠኛታት ዝተሓታን ካልኦት ኣርባዕተ ሕቶታት ድሕሪ ምሕታትን ምምላስን መራሒ ኣኼባ ኣቶ ዓንደብርሃን ወልደጊዮርጊስ ናይ ሽሂ ዕረፍቲ ክንገብር’ሞ ድሓር ተመሊስና ክንቅጽሎ ብምባል ኣኼበኛ ናብ ናይ ሻሂ ዕረፍቲ ከም ዝወጽእ ገበረ። በዚ ክኣ ኣብቲ ናይ ሻሂ ቦታ ብታሕቲ ታሕቲ ኣኼባ ተወዲኡ ኢዩ ዝብል ወረ ነዝሑ’ሞ ኩሉ እቲ ኣኼበኛ እዋእ! “ከመይ ኢሉ? ሕቶታትና ከይሓተትና ድኣ ከመይ ዲዩ ነገሩ?” ኢሉ ብምዕዝምዛም ነንሓድሕዱ ክጠማመት ስለ ዝጀመረ ። እቲ በዳህቲ ሕቶታት ክመጽኡኒ ይኽእሉ ኢዮም ኢሉ ዝሰግአ ኣቶ ዓንደብርሃን ብኡ ንብኡ ነቲ ኣኼበኛ ካብ ናይ ሽሂ ዕረፍቲ ድሕሪ ምምላሱ “በሉ ኣይትሓዙለይ ዓንተቦ ኣኼባና ተወዲኡ’ዩ ክብል ነይሩኒ ተጋግየ ኢየ፣ ሕጂ ተኾነ ኣኼባና ኣብዚኣ ወዲእና ኢና” ብምባል ነቲ ኣኼበኛ ከይሓተተን ዝስምዖ ከይተዛረበን ኣኼባ ብዘይ መደምደምታ ብምርጋጥ ከምዝብተን ገይርዎ።

ትዕዝብተይ፣- ከምቲ ኣቐዲመ ዝጠቐስክዎ ካብተን ዝተሓተታ ሕቶታት እተን ክልተ በቶም ወጻእተኛ ጋዜጠኛታት ዝተሓታ ኢየን፣ ኣብቲ ግዜ ናይ ሻሂ ዕረፍቲ  እቶም ወጻእተኛታት’ውን ናብ ዋኒኖም ከይዶም ኢዮም፣ እንተኾነ ብድሕርኡ እቲ ዝዓደምዎ ህዝቢ ዝመሰሎ ኸሓትት ዝግብኦ ብምንፋግ ኣኼባና ወዲእና ኢና ምባሎም ብቐድሙ’ውን እቲ ኤርትራዊ ዕዱም ከም መታሓፍስቲ ድኣ’ምበር፡ ብቐንዱ፡ በቲ ቕድሚ ሕጂ ዝተዋህመና ምጽወታ  ንንቀሳቐስ ኣሎና፡ ህዝቢ ንእክብ ኣሎና እሞ ፡ ሕጂ’ውን ሓገዝኩም ኣይፈለየና ንምባል ወጻእተኛ ጋዜጠኛታት ኣኪብካ ርአዩልናን፡ መስኩሩልናን ምጽወታ ንኽንረክብ ሓግዙና ንምባል ዝተጸውዔ ኣኼባ ደኣንበር፡ ብጉዳይ ሃገርን ህዝብን ኤርትራ ፈዓራ ሃሊይዎም ከም ዘይኮኑ ኢየ ክርዳእ ኪኢለ። እምበር በዚ ሎሚ ጊዜ ህዝቢ ኤርትራ ካብ ኩሉ እዋን ንላዕሊ ጨኒቕዎ ኣብ ዘለወሉን ራህዋ በየን ትመጽእ ኢሉ ኣብ ዝጽሊየሉ ፈትልን መርፍእን ኣላጊብካ ሃገርን ህዝብን ተድሕነሉ እዋን ድኣ’ምበር ብኣመጻጽእኡ ዘይፍለጥ ገንዘብ ኣብ ብዓል ሓሙሽተ ኮኾብ ሂልቶን ሆቴል ኣኼባታት ምዕዳም ብስም ህዝቢ ምልጋጽ ስለ ዝኾነ ዓገብ ክብሃል ክክኣል ኣለዎ።

ዓወት ንደሞክራሲያዊ ቃልሲ!

ውድቀት ንጸበብትን ኣግለልትን!

ቴድሮስ ተኽለ

ሎንዶን።