ደማሒን ማሕለኻታቱን!

ሳልሳይ ክፋል፥

እዚ ኣብ ሃገርና ዘሎ ጉጅለ ሕሰም፡ ነዛ ወትሩ ዝሽቅጠላ፡ ኣፍ ብዙሓት ንምዕባስ ዘገልገለቶ ኣወናዋኒት ሓረግ፡ ማለት፥ ‘ዕላማና ኣውታርኪ (ርእስኻ ምኽኣል) እዩ!’ እትብል ስነ ሓሳብ ብምጉልባብ፡ ‘ኣብ መንጎ ሃብታምን ድኻን ዘሎ ጋግ ምጽባብን፡ ኣብ መንጎ ከተማን ገጠርን ዘሎ ፍልልይ ምምዕርራይን’ዩ ሓገራና (ትልምና፡ ውጥንና)!’ እኳ እንተበለ፡ ብግብሪ ግን ኣብ ኤርትራ፡ ፍልልይ ሃብታምን ድኻን፡ ከተማን ገጠርን ከም ሎሚ ጌሩ ርሒቡ ኣይፈልጥን’ዩ።

እዚ ውጽኢት’ዚ ኸኣ ምስቲ ኣውቶክራት ኤርትራ ኣብ 2011 ምስ ጉጅለ 15 ኣብ ግርጭት ዘእተዎ ማለት፥ ኤርትራ ሃገርና ብመገዲ ደሞክራሲ ተጓዒዛ፡ ብህዝቢ ዝተመርጸ መንግስቲ መታን ንኸየማሓድራ ኢሉ፡ ‘ህዝቢ ኤርትራ ካብ ኣተሓሳስባ ወገንነትን ሃይማኖትን ካልእ ድሑር ኣተሓሳስባን ወጺኡ ዝግባእ ንቕሓት ስለ ዘይወነነ፡ ሕጂ ግዜ ደሞክራሲ እዩ’ሞ ንዓ መራሕትኻ ምረጽ!’ ምባል ንሓድሕድካ ተናቖት ማለት ስለ ዝኾነ፡ ንቕሓቱ ክሳዕ ክብ ዘብል ምርጫ ኣይንገብርን ኢና!’ ኢሉ ዝመጎቶ ካብ ሓቂ ዝረሓቐ ምጒት’ዩ ዝመሳሰል። ምናልባት’ዚ ትንቢት ውልቀ መላኺ’ዚ ኣብ ሃገርና ኤርትራ ኪፍጸም ይኽእል’ዩ ኢሎም ዝኣምኑ ሰባት እንተልዮም ግን ከምቲ ኣቦዋት ዝበሉዎ፥ “ንመሸላ ዋላ፡ ንዓደቦ ዋዕላ!” ስለ ዝኾነ፡ ብህጹጽ ሃገራውን ሓድነታውን ዋዕላ ምግባር ናይ ግድን ከም ዘድሊ ክግንዘቡ ኣለዎም።

ምኽንያቱ፡ ደማሒ ኢሳያስ ኣፈወርቂ፡ ነዚ ‘ኣይነቐሐን’ ዚብሎ ዘሎ ህዝቢ ንምንቃሕ፡ ኣብዚ ውሽጢ 22 ዓመት ዝኾነ ይኹን ዚገበሮ ነገር ስለ ዘየለ፡ ‘ኣይነቐሐን!’ እናበልካ ዕድመ ስልጣንካ ምንዋሕ ይኣክል ኪብሃል ይግባእ። ብኣንጻሩ ግን ነቲ ዘየለ’ሞ ኣሎ ዚበሎ ትሕተ ሃገራውነት ክውን ንምግባር፡ ብውሽጢ ውሽጢ ከሳውሮን ከናኽሶን’ዩ ጸኒሑን ዘሎን። ኩሉ ከም ዚፈልጦ ከኣ እዚ ጉጅለ’ዚ ፍጥር ካብ ዝብል ኣትሒዙ፡ ርእሱ ክኢሉ ኣይፈልጥን’ዩ። ኣብ ግዜ ሰውራ፡ እቲ ለዋህ ህዝቢ ኤርትራ፡ ካብ ዘይብሉ ጾሙ እናሓደረ፡ ካብታ ዝርካባ ድራር ዕለቱ እናመቐለ’ዩ ቀሊቡዎ፤ ብድሕሪ ናጽነት ከኣ ዝተፈላለየ ሓገዝ ካብ ህዝቢ ኤርትራን ካብ ገበርቲ ሰናይን እናረኸበ’ዩ ትልኽ ዝብል ዘሎ! እንተኾነ እዚ ጨካን መላኺ፡ ብንዋት ንዝሓገዙዎ ለጋሳትስ ይትረፍ፡ ነቶም ብህይወት ዝተበጀውሉ ጀጋኑ ሰማእታትውን ከይተረፈ ብምኽሓድን ብምጥላምን ነታ መስዋእቲ ዝኸፈሉላ ሃገር ብምልእታ ናብ መዓሙቕ ጸላም እናእተዋዶ ንገበርቲ ሰናይ ከመስግኖም ኢሉ!

ጃንዳ ህግደፍ ምስቲ ኩሉ ግዜ ኣብታ ናይ ብሕቲ ኣልቡሙ ዝኾነት፡ ንሱ ዝመረጾ ስእሊ ጥራይ ገንጺሉ ዘርእየላ ኤሪ ቲቪ ቀሪቡ፡ ደጋጊሙ ‘ብጽፍርና ንስርሕ ኣለና!’ ብምባል፡ ህዝቢ ንምትላል ዚሕሱዎ ቃል፡ መታን ምስቲ ኣብ ባይታ ዘሎ ሓቂ ከይጋራጮዎ፡ ይዕበ ይንኣስ ነቲ ብስም ህዝቢ ኤርትራ ዚወሃቦ ሓገዛት ገበርቲ ሰናይ፡ ንህዝቢ ገሊጹሉ ኣይፈልጥን’ምበር ማእለያ ዘይብሉ ሓገዝ’ዩ ካብ ደገ ዚረክብ። ከምቲ “እንዳባ ከይሲ እንተ ነፍዑ ብነፍጢ፡ እንተ ሓመቑ ብሸፍጢ!” ዝብሉዎ ግን ገንዚ ህግደፍውን ብሓይሊ ብረትን ብሸፈጥን’ዩ ንዝርኣያ ኣዒንቲ ክሽፍነን ዝፍትን። ግን ከምቲ፥ “ዓገብ ዘይብል ንጎይታኡ፡ መከራ ይረክብ ምሳኡ!” ዚብሃል፡ ኣንቱም ደገፍቲ ህግደፍ ዝኾንኩም ዜጋታት፡ ጽባሕ ንግሆ ለኻኺምኩም ከይጠፍእ፡ ኣብ እዋኑ ዓገብ ክትብሉዎ እምሕጸን።

ኣብዚ ቀረባ ግዜ ጥራይ’ኳ ውድብ መግብን ሕርሻን ሕቡራት ሃገራት፡ ኣብ ወፍሪ ምውሓስ መግቢ ዚውዕል፡ ንሕርሻ ሃገርና ዘገልግል፡ ብሚልዮናት ዚቑጸር ገንዘብ ንጃንዳ ህግደፍ ሓገዝ ከም ዘበርከተ ሓቢሩ ኣሎ። እዚ ግን ከምቲ ልሙድ ንህዝቢ ኤርትራ ኣይተገልጸሉን። ምኽንያቱ፡ ‘ዓለም ብምልእታ ጸላኢትካ’ያ!’ እናበሎ፡ ተገምጢሉ ‘ሓገዝ ሂባትካ’ ክብሎ ስለ ዘሸግሮ። በዚ ድማ ህዝቢ ሓቂ ከይፈለጠ፡ ‘መንግስትና’ኮ ንበይኑ ብጽፍሩ’ዩ ሃገር ክሃንጽ ሒዂ ዚብል ዘሎ!’ ብምባል፡ ምስኡ እናተደናገጸ ዕድመ ስልጣን መላኽን ሕሰሙን የናውሕ ኣሎ። ሎሚ ደኣ ከም ቀደሙ የለን’ምበር ሓገዝ ናይ ቀዛፊ፣ ንግስነት ቀጠር፣ ኤውሮጳዊ ሕብረትን ልምዓት ውድብ ሓድነት ኣፍሪቃንውን ከምኡ በብግዜኡ ሓገዛቶም ኣበርኪቶሙሉ’ዮም። ናይዚ ህያው ጭብጥታት ስለ ዘሎ ከኣ ነቲ ዚጠራጠር ሰብ መረጋገጺ ክሕበሮ ይከኣል’ዩ።

ከም ዚፍለጥ ጉጅለ ደማሒ፡ ክሳዕ’ዚ ቀረባ እዋን፡ ብጉልባብ ምኽዛን ውሕስነት መግቢ፡ ነቲ ኣብ ህዝብና ዘሎ ንሓድሕድካ ናይ ምትሕግጋዝ ጭዋ ባህሊ፡ ኣብ ፈቖዶ መገድታት ማእገት (ፈታሽ፡ ኬላ) እናደኮነ ክሳብ ሓሩጭን ቢሑቕን ከይተረፈ ካብ ህዝቢ ብምምንዛዕ፡ ንብዙሓት ብኣሕዋቶም ክርድኡ ዝግብኦም ድኻታት ከም ዘጥመየ በሰላኡን ዘኸተሎ ጸገምን ጌና ካብ ዝኽርና ስለ ዘይሃሰሰ ብቐሊሉ ዚርሳዕ ኣይኮነን። ካብ ዓውዲ ዓዃይ እናቀመዐ (እናመንዘዐ) ዝኣከቦ እኽሊ ኸኣ እቲ ዝበዝሕ ኣብ ጥቕሚ ከይወዓለ ሰኣን ግቡእ ኣተሓሕዛ ብነቐዝ ከም ዝባኸነ ናይ ኣደባባይ ምስጢር’ዩ።

ጃንዳ ህግደፍ ዘይበለሎ ውርዙይ ባህሊ ህዝቢ ኤርትራኸ እንታይ ኣሎ!? ነቲ መሰረት ምዕባለ ዚኾነ ምምሃር ምስትምሃር’ኳ ፍጹም በሊሉዎ ዘሎ። እቲ ኣብ ቀዳማይ ደረጃ ዚስራዕ ዓውደ ፍልጠት (subject) ቅሳነት ስለ ዘየለ እቲ ካልእውን ኪህሉ ኣይክእልን’ዩ። ምኽንያቱ፡ መሰረት ከይሃነጽካ ቤት ክትሃንጽ ስለ ዘይከኣል! መሰረት ትምህርቲ ኸኣ ከምቲ ኣቐዲሙ ዝተገልጸ ቅሳነት’ዩ። ቀዳማይ ዓውደ ፍልጠት (subject) ቅሳነት ሙኻኑ እናተፈልጠ ግን ጃንዳ ህግደፍ ብሃብቲ’ዛ ሃገር ዋላ እንኮውን ይኹን ቀሲኑ ዝመሃር ዜጋ ኣይፈጠረን። ኩሉ ሰረቱ ኣብ ሑጻ’ዩ። ሃገርና ኤርትራ ኣብ ግዜ ህግደፍ ትምህርቲ ንሃልኪን ንምድንጋርን እንተዘይኮይኑ ከምቲ ቀደም ኣብ እዋን መግዛእቲ ሃይለስላሴ ተፍርዮ ዝነበረት ዘተኣማምኑ ምሁራት ከተፍሪ ከም ዘይከኣለት ንኹሉ ብሩህ’ዩ። እዚ ኸኣ ሓንጎል ኤርትራዊ ካብ ናይ ሎሚ ናይ ሽዑ በሊጹ ዘይኮነስ  መነባብሮን ቅሳነትን ኤርትራዊ ካብ ናይ ሎሚ ናይ ሽዑ ኣዝዩ ዝሓሸ ስለ ዝነበረ ጥራይ እዩ።

ሓደ ካብቲ ፈንጊ ህግደፍ ዝፈሸለሉ ወፍሪታት ወፍሪ ኣብ መንጎ ሃብታምን ድኻን ዘሎ ጋግ ምጽባብ’ዩ። እቲ ቃል ብሓቂ ኪስረሓሉ ዚግብኦ ቅዱስ ቃል’ኳ እንተኾነ፡ ዘውጊ (ጭፍራ) ህግደፍ ግን ንኻልእ መደብ ኢሉ’ዩ ሓንጺጹዎ። እቲ ዕላማ፡ ንኹሉ ህዝቢ ኤርትራ ኣግኒስካ (ኣድኪኻ) ኣብ ትሕቲኡ ከም ዝምብርከኽ ምግባር’ዩ ነይሩ። ነዚ ንምትግባር ከኣ ንነዳይ (ንድኻ) ብኩፖን፡ ንተጃር (ንሃብታም) ከኣ ዝተፈላለዩ ቀይዲታት እናምጻእካ ስራሑ ብምዕንቃፍ፡ ከም ዚደኪ ብምግባር ኣብ ማሕለኻ ኩፖን ምእታው’ዩ ኔሩ። እንተኾነ እዚ ስጉምቲ’ዚ ምሉእ ብምሉእ ኣይሰረሐን። ምኽንያቱ ሎሚ፡ ኣብ ታሪኽ ሃገርና ተራእዩ ዘይፈልጥ፡ ኣብ መንጎ ሃብታምን ድኻን ዘሎ ቅርበት፡ ናይ ሰማይን መሬትን ርሕቀት’ዩ ፈጢሩ ዘሎ።

ገለ ሰባት ኣዝዮም ባእልዮም (ሃብቲሞም) ውሉድ ሰብ ብዝመስላ፡ ማይ ዘይጠዓማ መኻይን እናቀያየሩ፡ ኣብ መርጡል (ቪላ) እናተቐመጡ፡ መቊዓል (ጮማ ስጋ) ክሳዕ ኮራርምቶም ዘሕሞም እናሓየኹ ብዊስኪ ክጉጽጎጹ ከለዉ፡ ገለ ድማ ፌቴሌኔ (ድኻ መደኽደኽ) ኮይኖም፡ ኣብ ኣግነት ተኾርሚዮም፡ ጳኲሲማ (ዚነቐጸ ሕብስቲ፡ ባኒ) ኣብ ውጩ (ብማይን ብበርበረን ዝተሰርሐ ጸብሒ ድኻታት) ኣጥሊቖም ክሓይኩ፡ ኮራርምቶም ዝስበሩ ዘለዉ ቁጽሪ የብሎምን! ናይዚ ጭቡጥ ምስክርነት ንምርካብ፡ ናብዛ ሎሚ ብምልኪ ትሕመስ ዘላ ሃገርና ኤርትራ ኬድካ፡ ብዓይንኻ ብምርኣይ ከተረጋግጾ ትኽእል ሓቂ’ዩ። “ኣሓ ሕማቕ ጓሳስ ኩሉ ይሃርመን!” ከም ዚብሃል ከኣ ኤርትራዊ ሎሚ ብሰንኪ ህግደፍ ኩሉ ዘጓጥጠሉን ዘጋፍዖን ሕሱር ዜጋ ኮይኑ ኣሎ። ሕሉፍ ሓሊፉ ከም እንስሳ፡ ብህይወቱ፡ ኣካላቱ ጠቢሕካ ኮላሊቱ እናውጻእካ ክሽየጥን ክልወጥን ጀሚሩ ኣሎ! እዚ ሕስረትን ውርደትን ኤርትራዊ ግን ካብቲ ኣብ ሃገሩ ልክዕ ከም እንስሳ ቈጺሩ ብንዕቀት ዝዝልሞ (ዝረግጾ) ዘሎ ስርዓት ምልኪ’ዩ ዚጅምር።

እቲ ቀጺሉ ዚጥቀስ ዛዕባ፡ ኣብ መንጎ ከተማን ገጠርን ዘሎ ፍልልይ ምጽባብ’ዩ። ጋላ (ጭፍራ) ህግደፍ ኣብዚኣ፡ ምሉእ ብምሉእ ተዓዊቱ’ዩ ክንብሎ ንኽእል ኢና። ምኽንያቱ ሎሚ፡ ካብታ ካብ ከተማታት ዓለም ብመልክዓን ቅዲ ህንጻታታን ኣብ ራባዓይ ደረጃ ዝተሰርዐት ምጭውቲ ከተማና ኣስመራ ጀሚርካ፡ ብዘይካ ሓደ ክልተ ከተማታት፡ እተን ዝተረፋ ብምሉአን ብኹሉ ምሉ ማለት፡ ብትሕተን ልዕለን ቅርጺ፡ ፍጹም ገጠር’የን መሲለን ዘለዋ። እቲ ካብ ገጠር ዝፈልየን ምልክታት ማለት፡ ኣፍላጢስ (ቅጥራን)፣ ቡምባ ማይን መብራህትን ነበረ ኪብሃል ቀሪቡ ኣሎ። ዕንወት ዲማታት (ጥንታዊ ህንጻታት) ኣብ ኩሉ ይረአ ኣሎ። ኣብ ገጠራትውን እንተኾነ ብዘይካ’ተን ካብ ክልተ ሰለስተ ኣዋርሕ ንላዕሊ ዘየገልግላ ብገበርቲ ሰናይ ዝተዃዕታ ቂሪናት (ዒላታት) ካልእ እንታይ ዝገበሮ ነገር ኣሎ እዩ’ሞ ምስ ከተማ ኪማዓራረ!? ስለዚ፡ ልክዕ ከምቲ ንሃብታም ብምሕላኽ ማዕረ ድኻ ዝሰርዖ ከምኡውን ነቲ ገጠር ናብ ደረጃ ከተማ ክብ ብምባል ዘይኮነስ፡ ነቲ ከተማ ናብ ደረጃ ገጠር ለጠቕ ብምባል’ዩ ኣማዓራሪዩዎ ዘሎ።

ክንደይ ዓድታትድየን ካብ ክልተ ሰለስተ ኪሎ ሜተራት ካብ ከተማ ዘይርሕቓ ክንሰን እሞ ኸኣ ንኤለትሪክ ዚኸውን ገንዘብ ካብ ውሽጥን ደገን ዝቕመጡ ደቀን ገንዘብ ብምውጻእ፡ ወጻኢታተን ክሽፍና እናኸኣላ ከለዋ፡ ‘“transmitter” (ኣተሓላለፊ፡ ዘርጋሒ) የለን!’ ብምባል፡ ካብ ብርሃን ሓሪሙወን ዘሎ! ካልእ ይትረፍ ከምቲ ቀደም ደርግ ዝገብሮ ዝነበረ ማለት፡ ብምጽወታ ስርናይ፡ ዓዓዶም ከልምዑ’ኳ ዕድል ኣይፈጠረሎምን። ኣባጽሕ ዓዲ ቀቀሚዑ (መመንዚዑ) እናወሰደ፡ ነዚ ከም ቃህም (ጻጸ) ሓዀተ ዝኾነ ህዝቢ ኣደንቊሩ፡ ተስፋ ዝቖረጸ ዓዲ ውዒል ጌሩዎ ኣሎ። ‘ቅድሚ ጉዕዞ ህንጸት ምጅማርና ጽዕነትና ንወድን?’ ኢሎም ንዝመኸሩዎ ፋህማት (መስተውዓልቲ) ኸኣ መልሱ ቅንጸላ ኮይኑ። “ንሓርማዝ ኣይትምከል (ሳዕሪ ኣይትዕጸድ) ንዘይጸግበልካ፡ ንዓሻ ኣይትምከር ንዘይሰምዓካ!” ዝበሉ ወለድና ከምዚ ምስ ረኸቡ’ዮም።

ኣየነይቲ ብገረብ ዝተሸፈነት፡ መገድታታ ዝጸረገት፡ ህንጻታታ ዘሐደሰትን ዝለመዐትን ዓዲ ኣላ ኣብ ኤርትራ? ኣብ ህግደፍ ብዘይካ ሓይሊ፡ ስያሳ (ብልሓት ኣመሓዳድራ) ዚብሃል የለን! ካልእ ይትረፍ እዚ ንልዕሊ 10 ዓመት ካብ ኩሉ ነገር ተሓሪሙ፡ ብኸንቱ ዝኣርግ ዘሎ ኣስታት 400,000 ዝኸውን ኣብ በረኻ ኣስፊሩዎ ዘሎ መንእሰይ ኤርትራ’ኳ ብውሕዱ፡ ኣብ ዓመት ሓሓንቲ ገረብ ተኺሉ እንተዘጽድቕስ እዛ 124,000 ትርብዒት ኪሎ ሜተር ዝፍሓታ፡ ብኲናት ዝዓነወት ሓዳስ ሃገርና ነቲ ናይ ቀደም ምስላ ብምምላስ፡ ኣብ ዝሓጸረ ግዜ ጡና (ብኣግራብ ዝጸልመተ ቦታ፡ ጸሓይ ዘይኣትዎ ገራብ ቦታ) ንሙዃን ምበቐዐት ኔራ። እንተኾነ እዚ ብዓል ምሉእ ዓቕሚ ዝኾነ መንእሰይ’ዚ ብዘይካ እግሪ ጉዕዞ እናበልካ ብሸንኮለል ምድካሙን ቅስሙ ምስባርን እንተዘይኮይኑ ካልእ ዚኾነ ዚረአን ዚጭበጥን ልምዓት ንኽፍጽም ዕድል ኣይሃቡዎን።

“ናትና ኢልናዶ ዘይናትክን ክንህበክን፡ ከም እሾኽ ዳንዴር መትሓዚ ዘይብልክን!” ከም ዚብሃል፡እቶም ‘መንግስታና’ እናበሉ ዘይናቱ ምስሊ ብምሃብ ምሳኡ ዝደናገጹ ዘለዉ ዜጋታትና ንኣዕናዊ ተግባራቶም ደጊሞም ክሓስብሉን ሕሉፍ ክግምግሙን ከም ዘለዎም ከዘኻክር ዝደሊ። “ሓዊ ሓደው ኣንዲድካ ሙማቑ፡ ሓደው ኣጥፊእካ ምርሓቑ!” ስለ ዚኾነ፡ ነዚ ጉጅለ ሕሰም’ዚ ቀልጢፍኩም ሓዲኡ ክትገብሩዎ ክትክእሉ ኣለኩም። ምስዚ ጨካን በላዒ ሰብ ጉጅለ ተጸጊዕካ ንህዝቢ ካብ ምብዳል ክትቁጠቡ ይግባእ። ምኽንያቱ፡ “ምስ መሰረት ኣይትጻላእ ንጥንቲ ዚኾነካ፡ ኣብ ኳና ኣይትጸጋዕ ፈሪሱ ከይሰብረካ!” ስለ ዚኾነ፡ ምስቲ መሰረትኩም ዚኾነ ህዝብኹም ተጸግዑ! ከምኡውን ባዕልና ዋናታት ከለና ካልእ ሰብ ንመሰልና ክጣበቐልናን ክቃለሰልናን ክንሓስብ የብልናን። ምኽንያቱ፡ “ሰብ ኣሓን ይሃድሙ፡ ሰብ ቈራብቲን ይዋግኡ!” ከም ዝብሃል፡ ዋናታት ሃገር ከለና ጓኖት ክቃለሱልና ኣይንጸበ’የ ክብል ደልየ።

ከምዚ ከማይ ተስተውዕሉ እንተሊኹም፡ ሎሚ ፈንጊ ህግደፍ ነታ ሰባት ንምህማል ኢሉ ዕረ ኣብ 1994 ዝተጠመቓ ህግደፍ ትብል ስሙ ኣመና ፈንፊኑዋ ኣሎ። ምኽንያቱ ሎሚ። ነቲ ኣቐዲሙ ዝሸፈተ ልቢ ኤርትራዊ ንምምላስ በቲ ሓደ ወገን፡ በቲ ካልእ ሸነኽ ከኣ ነቲ ተሰኪሙ ካብ በረኻ ናብ ቤት ዘእተዎ ሓርበኛ ዳግም ምድንጋጹ ንምኽሳብ ኢሉ፡ ኣብ ኩሉ ሰሚናራቱ ኣብ ክንዲ ህግደፍ ‘ህዝባዊ ግንባር’ እናበለ’ዩ ንነብሱ ዝጽውዕ ዘሎ። ከምዚ ምስ ረኸቡ’ዮም ድማ ወለድና፥ “ነብሪ ዓይኑ ሓመመ፡ ማሕስእ ክትመርሖ ለመነ!” ኢሎም ዝመሰሉ።

ኣቱም ሰባት፡ ክንደይ ኢለ እየ’ሞ ጉድ ናይዚ ጉጅለ ፈያት (ሸፋቱ) ክገልጽ! ከምቲ ኣቦታትና ክምስሉ፥ “ስሙ ኣጥፊኡ ስም ኣቦኡ ዘጥፍእ፡ ይሃቦ ኲናት ዚደፍእ!” ዝበሉዎ ነዚ እኩይ ጽቡቕ ስምና ዘጥፍእ ዘሎ ሰብ ከኣ ገለ ዘጥፍእ ይፍጠረሉ እናበልኩ ንሎሚ በዚ ክሰናበተኩም፡ እዚ ኣነ ዝገለጽኩዎ ክፍኣት ህግደፍ ካብ ባሕሪ ብጭልፋ’ዩ። እስከ በሉ ንስኻትኩም ከኣ ትፈልጡዎ እናመላእኩም ብምንባብ፡ ነዚ፡ ነዛ ኣይሂ ደም ኣፍሲስና፡ ተሰዊእና፡ ሰንኪልናን ተንከራቲትናን ዝረኸብናያ ሃገርና ንምጥፋእ ዚቃለስ ዘሎ ብዓል ሸነብ (ኣብ ላዕላይ ከንፈር ዚበቘለ ዕሙር ጭሕሚ) ዚኾነ ሂትለር መኪትና፡ ካብ ምጥፋእ ነድሕና። ነዛ ኣብ ክሳድ መላኺ ኣትያ ዘላ ጊንታሮ (መሽቀቕ) ኸኣ ብሓባር እናሰሓብና ኣጸቢቕና ነጽብባ። ከም ገሪስ (ሰንሰለት) መግዛእቲ፡ ገሪስ ምልኪውን ኪብተኽ’ዩ! ፌዋ (ዝቦኽበዀ ገረብ) ሩሕ የብሉን! ዓወትና ዳርዩ (ቀሪቡ) እዩ! ሓቅን ርትዕን ንሓሶትን ሸርሕን ስዒረን ክዕወታ ምዃነን ዚጠራጠር ሰብ እንተሎ ኸኣ ሕሉፍ ታሪኽ ህዝቢ ኤርትራ ደጋጊሙ ከንብብ ጥራይ እየ ክላበዎ ዝደሊ። ምኽንያቱ፡ ዳይቅ (ድፋዕ) ሓቂ ይሸራረፍ’ምበር ፈሪሱ ስለ ዘይፈርስ፡ ውዒላ ሓዲራ ነቲ እንምነዮ መሰልን ክብርን ኪውን ንምግባር ንኹሉ ፈንጢሳ ክትዕወት ሙዃና ጥርጥር የለን!

ተ     ፈ     ጸ     መ።