ስርዓት ህግደፍ ኣብዚ ዓቕሉ ጸቡቡዎ ዘለወሉ በዳሂ እዋን፣ ካብ ሞት ንምድንጓይ ናይ ኮን’ዶ’ኾን ተግባራት በጋሚንዶ ናብ ምትግባር ካብ ዝኣቱ ኣይወሓደን። እዚ ብዘይካ ብስርዓተ-መሮርን ኣራዊታዊ ሕጊን  ብሕጊ ሕብረተ-ሰብ ዘይቅየድ ፋሉል ስርዓት፣ ሎሚ ኣብ ኣጋ ሞቱ ዶላራት ንምምእራር ሰፊሕ ናይ ኮንትራባንድ ስራሓት የካይድ ኣሎ።

ኣብ ናይ ኣጥፊእካ ምጥፋእ ስራሕ ኮንትራባንድን ቅንጸላ ንጹሃት አርትራውያንን ንነዊሕ ዓመታት ዝተሞከረ፣ ቅድም ኮሎኔል ዝነበረ ቀጺሉ ግን በቲ ዘመስከሮ ተኣማንነቱ ንኢሳይያስ፣ ናይ ብሪጋደር ጀነራል ማዕረግ ዝተቐበለ፣ ጠዓመ ጎይትኦም /መቐለ/ ምስጢራዊ መገሻታት ካብ ዝተሓሓዞ ነዊሕ ኣዋርሕ ገይሩ ኣሎ። ብሪጋደር ጀነራል ጠዓመ /መቐለ/ ብመንገዲ ደቡብ ሱዳንን ኡጋንዳን ኣቢሉን ካብ ቤት ጽሕፈታት ኤምባሲ ኤርትራ ከይተረፈ ተሓቢኡን ናብ ዲ. ረፑብሊክ ኮንጎ ይመላለስ ኣሎ።

ኣብዚ ስራሕ ኮንትራባንድ ኣልማዝን ወርቂን ዝተሓባበሩዎ ድማ ብብዙሕ መዳያቶም ዝተሓርዩን ብደቂቕ መንፊት ዝሓለፉን ኣብ ግዜ ብረታዊ ቃልሲ ኣባላት ቤት ትምህርቲ ሰውራ ካብ ዝነበሩ ተጋደልቲ ኢዮም። ብሪጋደር ጀነራል መቐለ፣ ኣብቲ ካብ ኤርትራ ተበጊሱ ብመንገዲ ደቡብ ሱዳንን ኡጋንዳን ዝመላለሰሉ ዘሎ ናይ ውራ-ውራ ግዜ፣ እታ ብስም ናስ-ኣየር እትፍለጥ ዋንነታ ንጹር ዘይኮነ ኣየር ኢዩ ዝጥቀም ዘሎ።

ካብቶም ብደቂቕ መንፊት ዝተመመዩ ኣባላት ቤት ትምህርቲ ሰውራ ነበር፣ ናብ ክፍሊ ሃገራዊ ድሕነት እናተሳሕቡ ናብ ዝለዓለ ስለያዊ ተግባራት ተመዲቦም ከም ዘለዉ ካብ ኣስመራ ዝረኸብናዮ ንጹር ሓበሬታ የመልክት። ኣብዚ ናይ ሞትን ሕየትን ህግደፍ፣ ክፍሊ ሃገራዊ ድሕነት ኣዝዮም እሙናት ንዝተባህሉ ኣብ ሜዳ ኣብ ክፍሊ ምልክትን ክፍሊ ስለያን ጸጥትን ናይ ቀደም ኦፐረተራት ዝነበሩ ተጋደልቲ’ውን ኣብ ትሕቲ ምክትታል ኮሎኔል ስምእን ገብረድንግል ይጥርነፉ ኣለዉ።

ካብቶም ናብ ዲ. ረፑብሊክ ኮንጎ ኣልማዝን ወርቂን ንምእራይ ምስ ብሪጋደር ጀነራል ጠዓመ /መቐለ/ ዝገሹ ዘለዉን፤ እቶም ናብ ክፍሊ ሃገራዊ ድሕነት ተሳሒቦም ኣብ ትሕቲ ኮሎኔል ስምኦን ዝተጠርነፉን ኣባላት ቤት ትምህርቲ ሰውራ ነበር፣ ናይ ዝበዝሑ ኣስማት ዱሮ በጺሑና ‘ሎ። ስለዚ ንኩሉኹም ማይ ቤት ትምህርቲ ሰውራ ሰቲኹም ዝዓበኹም፣ ኣብቲ ህዝቢ ኤርትራ ስለ ናጽነቱን ሓርነቱን ፈታኒ ኲናት ዘካይደሉ  ዝነበረ ግዜ ቃልሲ ብሕማም “ቃታ” ትፍለጡ ዝነበርኩም ሰራሕቲ ቅያ፣ ሎሚ ንዝመውት ዘሎ ስርዓት ህግደፍ ንምድሓን ኣብ ጽላሎት ኢሳይያስ ካብ ምኹላል ተቖጠቡ። እቲ ኣቦ ቤት ትምርቲ ሰውራ፣ እቲ ኣያ ፊተውራሪ ንዝነበረ ቢትወደድ ኣብርሃ ዝበልዐ ገበነኛ ኢሳይያስ፣ ብዘይካ ሞት ካልእ ዝግበኦ ፍዳ የለን’ሞ ኣብቲ ዕምሪ ኢሳይያስ ንምሕጻር ሪጋ ሒዝናሉ ዘሎና ፈለግ ቃልሲ ንክትጽንበሩ ምሕጽንታና ነመሓላልፍ።

ህግደፍ ኣብ ከምዚ ዝኣመሰለ ናይ ዝንግሪር ግዜ፣ ህላውነቱ ካብ ግዜ ናብ ግዜ ናብ ኣስጋኢ ኩነት ይወድቕ ስለዘሎ፣ ንኣዝዮም ኣስጋእቲ ክኾኑ ይኽእሉ ኢዮም ንዝበሎም ንንዊሕ ዓመታት ደስኪሎም ካብ ዝነበሩ ገዳይም ተጋደልቲ ‘ውን ይኣስር ኣሎ።