ደሃይ ካብ ኤርትራ

ወልቀመላኺ ኢሳይያስ ኣፈወርቂ ኣብ ዝሓለፈ ሰሙን ብ 11 ሓምለ ኣብ መመረቕታ መበል 28 ዙርያ ሃገራዊ ኣገልግሎት ኣብ ቅድሚ ኣሽሓት ተመረቕትን ህዝብን ኣብ ዝገበሮ መደረ፣ ሚእታዊት ናይቶም ኣብ ሳዋ ተማሂሮም መልቀቒ ፈተና ገይሮም ዝሓለፉ ዝበሎም ተማሃሮ ክዝርዝር ክሎ፣ 14 ሚእታዊት ብዲግሪ፣ 10 ሚእታዊት ብዲፕሎም፣ 10 ሚእታዊት ድማ ብሰርቲፊኬት፣ ኢሉ ከብቅዕ፣ ኣብ ድምር ግን 60 ካብ ሚእቲ ኢሉ ኣስታት ፍርቂ ሓንዚፉ ብምውሳኽ ኣዘንቢዑ ኣንቢቡዎ።

እቲ ዝኸፍአ፣ ነቶም ተመረቕትን ዕዱማትን ዝኣርመሞም ከኣ፣ ይቕሬታ ኢሉ ጌግኡ ኣሪሙ መደርኡ ኣብ ክንዲ ዝቕጽል፣ ነቲ ኣብ ቅድሚኡ ዝነበረ ኣሽሓት ህዝቢ ረሲዑ ምስቲ ወረቐት ዘረባ ምቕጻሉ እዩ።

እዚ ንስነኣእምሮኣዊ ኩነታት ኢሳይያስ ዘንጸባርቕ ኩነታት ‘ዚ፣ ፈለማ ቲቪ-ኤረ ‘ውን ከምዘለዎ ስለዘመሓላለፈቶ፣ ኣብ ገገዝኡ ኮይኑ ንመደረ ኢሳይያስ ዝተኻታተሎ ሰብ፣ ቆልዑ ከይተረፉ፣ “ ኢሳይያስ ሎምስ ኣግሂዱዎ፣ ምስ ወረቐት ሃተፍተፍ ክብል ጀሚሩ” ክሳብ ዝብሉ ኮይኖም።

ነቲ ወልደፍደፍ ዓለም ብዓለሙ ምስ ሰምዖ ዝተበራበሩ መቃመምቲ ቲቪ-ኤረ ንምሸቱ ክእርሙዎ ፈቲኖም።

ይኹን ‘ምበር እቲ መአረምታ ነቲ ዕንወት ምሉእ ብምሉእ ክሕክሞ ኣይከኣለን። ከይተወድአ ጠልጠል ዝበለ ምሉእ ሓሳባት ኢሳይያስ ነቲ ጸገም ኣይሓብኦን።

ኣብቲ ቦታ ዝርከቡ ተዓዘብቲ ከምዝሕብሩዎ እቲ ጸገም ስነኣእሙራኣዊ ምዝንባል ኢሳይያስ ጥራይ ኣይኮነን። ኢሳይያስን ዓሻክሩን ኣብ ድሮ ናይቲ መመረቕታ ወትሩ ኣብ ሳዋ ተዓጽዮም ክሰኽሩ ስለዝሓድሩ ምዕሩይ ዘረባ ክዛረቡ ከሸግሮም ባህርያዊ እዩ።

እቲ ካብ ኩሉ ዘሕዝን እምብኣር፣ እቲ ብሃይማኖትን ስነምግባርን ዝልለ ህዝቢ፣ ስነኣእምሮኣዊ ምዝንባልን ስኽራንን ብዘሰነፎም ዝሩጋት ይምራሕ ምህላዉ እዩ።

እዚ ከምዚ ኢሉ ኸሎ፣ መመረቕታ መበል 28 ዙርያ ሃገራዊ ኣገልግሎት ኣይብሱል ኣይጥረ ገይሩ ሰኑይ 13 ሓምለ ብመኪና ናብ ኣስመራ ዝምለስ ዝነበረ ኢሳይያስ፣ ኣብ ከባቢ ጥንቁልሓስ ጽርግያ ስለዝተዓጽወ መሕለፊ ስኢኑ ስለዝተዓግተ፣ ብእግሩ ንኸረን ክድይብ ተቐሲቡ።

እዚ ዝኾነሉ ምኽንያት፣ ሰንበት ሰዓት 9 ናይ ምሸት፣ ኣብቲ ካብ ከረን ናብ ኣቑርደት ዝወስድ ጽርግያ ዘሎ ጸድፊ ጥንቁልሓስ ሓንቲ ካብተን ሲኖ-ትራክ ዝብሃላ፣ ፍርያት ማዕድን ቢሻ ንምምልላስ ብ ትራንስሆርን ዝዋፈራ ልዕሊ 450 ኩንታል ዝጽዕና ዓበይቲ ናይ ጽዕነት መካይን ኣብ ጥንቁልሓስ ተገልቢጣ መንገዲ ስለዝዓጸወት እዩ።

ነታ ናይ ጽዕነት መኪና ክትውግን እትኽእል ማሽን ኣብቲ ከባቢ ስለዘይነበረት፣ ክሳብ ንጽብሓይቱ ሰኑይ እቲ ጽርግያ ተዓጊቱ፣  ብወገን ከረንን ኣቑርደትን ብብዝሒ መኻይን ስለዝተዓጽዋ ኢሳይያስ መኪንኡ ኣብ ጽርግያ ገዲፉ ንኸረን እናተቛየቔ ብእግሪ ካብ ምድያብ ካልእ ምርጫ ኣይነበሮን።

ኢሳይያስን ዓሻክሩን ናብ ከረን ምስ ተቐልቀሉ፣ ሃንደበት ዝኾኖ ኣብ ዕዳጋ ዝነበረ ህዝቢ ኸረን ከኣ ንግፋ ዝተዋፈሩ ሰራዊት መሲሉዎ ተበቲኑ። ኢሳይያስ ከኣ ኣብ ሰሪና ሆቴል ብምዕራፍ ብናይ ምምሕዳር ከተማ ኸረን መኪና ናብ ኣስመራ ከይዱ።

ሓንቲ ካብተን ብሰንኪ ምግልባጥ ናይታ ሲኖ -ትራክ ዝተዓግተት ናይ ህዝቢ ኣውቶቡስ ‘ውን ኣብ ጥንቁልሓስ ተገልቢጣ፣ ይኹን እምበር መቝሰልቲ እንተዘይኮይኑ ኣብ ህይወት ዝበጽሐ ናይ ሞት ሓደጋ ኣይነበረን።