ኣብዚ አዋን’ዚ ፡ ህዝቢ ኤርትራ ብጠቅላላ  ዕድመኡ ንመርዓ፡ ንካልኣይ ደረጃ ትምህርትን  ስድራቤት ንምሕጋዝ ን ዝበጽሐ ኤርትራዊ መንእሰይ  ድማ ብፍላይ፡ ካብ መኣዲ ትምህርቲ ተሰናኺሉ ዕጫኡ ንግዱድ ዕስክርና፡ ስደትን ሕሰም መነባብሮን ኮይኑ’ሎ ።  እቲ ኣዝዩ ዘሕዝን ግን፡ ኣብ ጎደናታት ኣስመራ፡ ኤርትራውያን ኣብ ገዛእ መሬቶም ጓኖት እቶም  ብስም ደምህት ዝፍለጡ  ዕሱባት ሓለውቲ ስርዓት ኢሳያስ ድማ ከም ደቂ ዓዲ ተኣሚኖም ኣብ ልዕሊ ህዝብና ስውርን ሓድሽን መግዛኣቲ ይፍጽሙ ኣለዉ። እዚ ተርእዮ’ዚ ከኣ፡ ውልቀ- መላኺ ኢሳያስ ዕድሚኡ ንምንዋሕ ኢሉ ዝፍሓሶ ተንኮል ኢዩ። ብግልባጡ ግን፡ ስርዓተ ኣልቦ ኢሳያስ ክሳብ ክንደይ ብህዝቢ ኤርትራ ተፈንፊኑ ከምዘሎን ብኤርትራዊ ከምዘይተኣማመንን መረጋገጺ እዩ።

• ዕላማን መንነትን ደምሒት ብዘየገድስ፡ ህዝብና ብጥሜት ሓለንጊ እናተገርፈን ብሕጽረት መንበሪ ኣባይቲ፡ ኤለክትሪክ፡ ዝስተ ማይ እናተሳቐየን እንከሎ፡ ኣባላት ደምህት ጮማ ክበልዑ፡ ኣብ ዝወቀበ ኣባይቲ ክቅመጡን ካልእ ማእለያ ዘይብሉ ጉንዖታት ክግበረሎምን ከጋይጹን ምርኣይ፡ ሕድሪ ስውኣት ከም ምጥላም’ዩ ዝቁጸር። ኤርትራዊ፡ ንመግዛእቲ ኢትዮጵያ ጸሪጉ ብሰላምን ክብረትን ክነብር እምበር፡ ድሕሪ ናጽነት ሓድሽ ኣደራዕን ከጋጥሞን ብባዕዳውያን ክሰራጠን ድሌቱ ኣይኮነን፡
• ኣባላት ደምህት፡ ነቲ ካብ ሕሱም ኣገዛዝኣ ስርዓት ኢሳያስ ንምንጋፍ ዝፈትዋ ሃገሩ ሕቆኡ ሂቡ ክስደድ ዝቅሰብ ዘሎ ኤርትራዊ፡ ኣብ ብሎኮታትን ዶባትን ኤርትራ መንነት ወረቀት ክሓቱ፡ ከሰራጥዩን ክኣስሩን እንከለዉ ዘበንያ ግርምቢጥስ ማይ ንዓቀብ ጥራይ ዘይኮነ ክልተ ሞት እዩ።
• ዓድኻ ክዝመት ዓይንኻ ኣይትተዓመት ከምዝብሃል፡ እቲ ብኣረሜናዊ ኢሳያስን ኤርትራውያን ሃወርያታቱን ኣብ ልዕሊ ህዝብና ዝፍጸም ዘሎ ይቅረ ዘይብሃሎን  መዳርግቲ ዘይርከቦን ገበን ከይኣክል፡ ብመወቀፎም ዘይፍለጥ ባንዳታት ክርገጽን ክብሩ ክግሃስን እንከሎ፡ ወለዲ፡ ኣሕዋትን ደቂ ስውኣትን “ስውኣትና ኣይስምዑን ኣይርኣዩን” ኢሎም ከማርሩን ጥርዓኖም ናብ ስውኣቶም ከቅርቡ እንክለዉን፡ እቶም ሕድሪ ስውኣት ዝተቀበልና የለናን ዲና? ዋላስ ሃገር ትጥፋእ፡ መቃብር ስውኣትና ይረገጽን መዐንደሪ ጓኖት ትኹን እዩ ምርጫና?

ጽላል ካብ ሕቡራት መንግስታት ኣመሪካ