ዕለት፡ 23.04.15

ዝኽሪ ንግዳያት

ኣብ ዝሓለፈ ቅንያት ብደቡብ ኣፍሪቃ ዝጀመረ ኣብ ልዕሊ ንጹሃት ስደተኛታት ዝቐንዐ ግፍዒ ከም ዝተፈጸመ ኣብ ማዕከናት ዜና ክንከታተሎ ቀኒና ኔርና። እንተኾነ፡ ንበዓል በርቂ ሓዊ ደብሶ ከም ዝብሃል ናይቶም መብዛሕትኦም ኢትዮጵያውያን ካልኦት ዜጋታት ኣፍሪቃ ምንባሮም ዝንገረሎም ዜጋታት ደም ከይነቐጸ ከሎ፡ ብስም ዳዕሽ ዝፍለጥ ኣስላማዊ ምንቅስቓስ’የ ዝብል ጕጅለ፡ ኣብ መንጎኦም ሰለስተ ኤርትራውያን ዝርከቡዎ ሰለስተ ዜጋታት ከም ዝቐዘፈ ዘስካሕክሕ ቪድዮ ኣሰንዩ ገሊጹ። ኣብ ሳልስቱ ድማ 350 ኤርትራውያን ዝርከቡዎም ስደተኛታት ኣብ ማእከላይ ባሕሪ ከም ዝጠሓሉ ኣፈኛ ሕቡራት ሃገራት ገሊጹ። ኣብ ከምዚ ኵነታት ጽላል ኤርትራውያን ኣብ ኖርወይ ንደሞክራስያዊ ለውጢ ነቶም ግዳያት መንግስተ ሰማይ የዋርሶም፡ ንቤተሰቦም ድማ ጽንዓት ይሃቦም ብምባል ልባዊ ሓዘኑ ይገልጽ።

ጠንቂ ናይዚ ዅሉ ስቓይን ኣረሜናዊ ምጥፋእ ህይወትን እቲ ኣብ ኤርትራ ዘሎ ኢሰብኣዊ ምልካዊ ስርዓት ስለ ዝኾነ ድማ ኩላትና ደለይቲ ፍትሒ ቅልጽምና ኣተሓባቢርና ኣንጻር መላኺ ጭፍራ ህግደፍ ክንቃለስ ጻውዒቱ ነቕርብ።

ጽላል ኤርትራውያን ነበርቲ ኖርወይ ንደሞክራያዊ ለውጢ

ሙሴ ዳኘው ኣቦ መንበር