ኤርትራውያን ተቐማጦ ሃገረ እስራኤል ስነ-ስርዓት ዝኽሪ ግዳያት ናይ ባሕሪ ላምፐዱዛ ኢጣልያ ኣኻይዶም። እዚ ብኤርትራውያን ደለይቲ ፍትሒ ብሓባር ዝተዳለወ ብዕለት12/10/2013 ዝተኻየደ ክሳብ ልዕሊ ሓሙሽተ ሽሕ ዝኸውን ህዝቢ ዝተሳተፎ ዝኽሪ ኣብ ዝተኻየደ ስነ-ስርዓት ብዝተፈላለየ መደባት ተዘኪሩ።

 ኣብ’ቲ ዕለተ ዝኽሪ፣

ü  መራሕቲ ሃይማኖት መንፈሳዊ ጸሎትን ቃላትን ሂቦም፣

ü  ናይ ሓባር መግለጺ ደለይቲ ፍትሒ ተነቢቡ፣ ኣብ’ቲ ዝወጸ መግለጺ፣ መንግስተ ሰማይ ንግዳያት ጽንዓት ንህዝቢ ኤርትራ ብሓፈሽ ንስድራ-ቤት ግዳያት ድማ ብፍላይ ብምምናይ፣ “ነቲ ጠንቂ ናይ’ዚ ናይ ላምፐዱዛ ኢጣልያን ኣብ ዝተፈላለየ ቦታን ግዜን ኣብ ልዕሊ ኤርትራዊ ዜጋ ዝወረደን ዝወርድን ዘሎ ህልቂ ዝኾነ; ዘይሕጋዊ ስርዓት ጉጅለ ህግደፍ ብምኹናን; ነቲ ኣብ ልዕሊ ህዝቢ ኤርትራ ዘለዎ ሸለልትነትን ዘይተወካልነትን ዘጉልሐ፣ ኣብ ልዕሊ’ቶም ኤርትራውያን ግዳያት ኣስካሕካሒ ሓደጋ “ዘይሕጋውያን ስደተኛታት ቀርኒ-ኣፍሪቃ” ዝብል ብመራኸቢ ብዙሃኑ ዝዘርግሖ ኣነዋሪ ናይ ኣቃጫጭ ቃላት ንመንነቱ ዘነጸረ እዩ።” ኢሉ። እቲ መግለጺ ብምቕጻል፣” ህዝቢ ኤርትራ ነታ ኣሽሓት ብሉጻት ደቁ ከፊሉ ዘምጽኣ ሃገር ቀሲኑ ክነብረላ እንተኾይኑ ፣ ነዚ ጨፍላቒ ውልቀ መላኺ ስርዓት ወጊድ ኢሉ፣ ሕጋውን ህዝባውን መንግስቲ ዘለዋ ዴሞክራስያዊት ኤርትራ ክምስርት ይግባእ።” ኢሉ።

ü  ነቶም ብዝተፈላለየ ምኽንያታት ምስ’ዚ ስርዓት’ዚ ዝደናገጹ ድማ፣” ኣካል ናይ’ቲ ፍታሕ እንተዘይኮንኩም ጠንቂ ናይ’ቲ ሽግር ምዃንኩም ፈሊጥኩም ናብ’ቲ ውጹዕ ህዝብኹም ክትውግኑ ኣጥቢቕና ንጽውዕ።” ኢሉ።

ü  ኣብ መወዳእታ እቲ መግለጺ፣ ንህዝብን መንግስትን ሃገረ ኢጣልያ ስለ’ቲ ኩለ-መዳዊ ምትሕብባሮም ኣመስጊኑ።

ቀጺሉ ነቲ ኣጋጣሚ ዘንጸባርቕ ግጥምታትን ደርፍታትን ቀሪቡ። ኣብ’ቲ ኣጋጣሚ ጋዘጠኛታት ናይ ዝተፈላለያ መራኸቢ ብዙሓን እስራኤል ተረኺቦም ኔሮም። ኣብ መወዳእታ ስነ-ስርዓት ዝኽሪ ብጸሎትን ዝኽረ ሰማእታትን ተፈጺሙ።

ካብ ኤርትራውያን ደለይቲ ፍትሒ ኣብ እስራኤል።