ዜና ካብ ከተማ ጎተንቦርግ ሽወደን

ትማሊ ሰኑይ ዕለት 23 መስከረም 2013 ዓ.ም  ን12 ዓመታት ብዘይ ፍርዲ ኣብ ቤት ማእሰርቲ ዲክታቶርያዊ ስርዓት ህግደፍ ዝሳቐ ዘሎ ሽወደናዊ ጋዜጠኛ ዳዊት ኢስቕን ካልኦትን ብዝምልከት  ኣምንስቲ ኢንተርናሽናልን፡ ጋዜጠኛታት ብዘይ ዶብ ዝተባህለ ማሕበር ጋዜጠኛታትን፡ ደለይቲ ፍትሒ ዝኾኑ ኤርትራውያንን፡ ዘዋደድዎ  ንፍትሕን ሰላም ዝጽዉዕን፡ ንኣረሜናዊ ተግባር ዲክታቶርያ ስርዓት ህግደፍ  ዘጋልጽን ውዕዉዕ ኣኸባ ተኻይዱ።

እቲ እኸባ ዝተኻየደሉ ቦታ ኣብቲ ዝዓበየ ናይ ትያትር ኣድራሽ  ናይቲ ከተማ  ኪኸውን ከሎ፡ ኣብቲ ኣኸባ ንእሽተይ ሓዉ ንጋዜጠኛ ዳዊት ኢሳቕ፡ ኢሳያስ ኢሳቕ ሰፊሕ መብርሒ ኣብ ርእሲ ምሃቡ፡ ብጋዜጠኛታት ንዝቐረበሉ ሕቶታት መሊሱ። ኣብ ርእሲ እዚ ጓል ሓፍቱ ንእሱር ጋዜጠኛ ስዩም ጸሃየ ዝኽነት መንእሰይ ቨነሳ በርሀ  one day Seyoum ብዝብል ኣርእስቲ ብዛዕባ ኣኮኣ ስዩም ጸሃየ ብዝምልከት ሰፊሕ መግለጺ ኣቕሪባ ብጋዜጠኛታት ንዝቐረበላ ሕቶታት’ውን መልሲሻ። ብተወሳኺ መንእሰይ ቨነሳ በርሀ ብዛዕባ ኣኮኣ ስዩም ጸሓየ ብዝምልከት ዶኮመንታሪ ፊልም ትሰርሕ ከም ዘላን ኣብዚ ቀረባ እዋን እታ ፊልሚ ኣብ መድረኽ ክትረአ ምዃናን ኣብቲ ኣኸባ ሓቢራ ኣላ።

ኣብ ርእሲ እዚ ኣብቲ ኣኸባ ዝተፈላለዩ ጋዜጠኛታትን፡ ኣባላት ፖለቲካውያን ፓርትታን፡ ወከልቲ ናይ ዜና ማዕከናትን ከምዝተረኽቡ ተሓቢሩ። ኮምኡ እውን ብማሕበር መንእሰያት ንለውጢ ከተማ የተቦሪ፡ ህግደፍ ኣብ ልዕሊ እሱራትን ብሓፈሻ ድማ ኣብ ልዕሊ ህዝቢ ኤርትራ ዘካይዶ ዘሎ ምልካዊ ምሕደራ ዘጋልጽ ሰፊሕ መብርሒ ቀሪቡ። ኣብዚ ዳኒኤል ለማ ዝተባህለ ሽወደናዊ ሙዚቀኛ ምስ ጉጅለኡ  ተረኺቡ ነቲ ኣኻባ ዝያዳ ብዕዉትን ዉዕዉዕን መንፈስ ክዛዘም ዓቢ እጃም ከም ዝነበሮ ተረጋጊጹ ኣሎ።

ዕዉት ኣኸባ ከተማ ዮተቦሪ ሽወደን