ዘይኤርትራዊ ስነ-ምግባር ስነ-ጥበባውያን ኤርትራ ንኹንን!

 ህዝቢ ኤርትራ ድሕሪ’ዚ ናይ ላምፐዱሳ ህልቂት ኣማኢት ኤርትራውያን ኣሕዋት ኣብ ከቢድ ሓዘንን መልቀስን ይርከብ ኣሎ። ልብኻ ዝትንክፍ ገዓርን ብኽያትን ኣዴታት፡ ኣቦታት፡ ኣሕዋት፡ ኣሓትን፡ ቤተሰብን መሓዙትን ናይቶም ዝተጎድኡ ዜጋታትና ኣብ ኩሉ ዓለም ይስማዕ ኣሎ።

ደረፍቲ ኤርትራ ግን ኣይግድን! ኣብ ልዕሊ ሬሳ ኣሕዋትኩም ጓይላ ተኺልኩም ክትላሃዩ ምርኣይ ጽያፍን ዘይኤርትራዊ ስነ-ምግባርን እዩ። ወዲ ትካቦ፡ዳዊት ሽላን፡ ዘይነብ በሽር ዝርከቡዎም ኣብ ኣትላንታ ሬሳታት ኤርትራውያን ካብቲ ዝዋሓጦ ቀላይ ከይወጸ፡ ሓመድ ኣዳም ከይለበሱ ክደርፉ ሓዲሮም ሰሚዕና። እዚ ኣእምርኡ ዝሰሓተ እንተዘይኮይኑ ጥዑይ ሰብ ክገብሮ ዘይከእል ሰብኣውነት ዝጎደሎ ኣጸያፊ  ስነ-ምግባር እዩ። ኣብ ሱዕዲ ዓረብውን ደረፍቲ ሕልንኦም ዝሰሓቱ ደገፍቲ ኢሰያስ ኣኪቦም ኣብ ልዕሊ ሬሳታት ኣሕዋቶም ክስዕስዑ ቀንዮም፡ ከምኡውን ኣብ ሳዋ ሄለን መለስ ትርከቦም ደረፍቲ ብኣስገዳድ ዕሸላት ወተሃደራት ኣኪቦም ክጭፍሩ ተሰሚዖም።  ብኹሉ ዓይነት መዐቀኒ እዚ ዘሕንኽን ነውርን እዩ። በዚ ዘሕፍር ሕልና ደረፍቲ ኤርትራን ኣጫፈርቶምን ከኣ ብዙሕ ኤርትራዊ ሕልንኡ ተጎዲኡን ተቖጢዑን ይርከብ።

ስነ-ጥበብ ንባህልን ክብርን ህዝብታት፡ ንታሪኽን ዝናን፡ ንምረትን ሓጎስን፡ ንተስፋን ፍቕርን ክገልጽ እዩ ዝግባእ። ብስስዐን በለጽን ፍርሒን ዝዓወሩ ስነ-ጥብኛታት ኤርትራ ግን ቀታልን ደመኛን ህዝቢ ኤርትራ ንዝኾነ ውልቀ-መላኺ ክውድሱ መሪጾም። ሕሉፍ ሓሊፉ ኣማኢት ንጹሃት ኤርትራውያን ኣብቲ ንምሉእ ዓለም ዘሰንበደ ሓደጋ ብሓንሳብ ኣብ ዝጠፍኡሉ፡ ጓኖት ናይ ሓዘን መዓልታት ኣብ ዝኣወጅሉ እዋን ክትጭፍሩ ምርኣይ ኣብ ህዝብን መንእሰይን ኤርትራ ዘለኩም ክቱር ንዕቀት ኣርኢኹም ኣለኹም። ንታሪኽኩም ድማ ክፉእ ሓድጊ ትገድፉ ምህላውኩም ክትፈልጡ ይግባእ።

ኤምዲሰመ ነዚ ዘይኤርትራዊ፡ ኢሰብኣዊ፡ ኣጸያፊን ስነ-ምግባርኩምን ብትሪ ይኹንን። ንህዝቢ ኤርትራን ንስድራ ቤታት ምውታት ይቕሬታ ክትሓቱ ድማ ይጽውዕ። ካብዚ ዝፈጸምኩምዎ ዓቢ ጌጋ ተኣሪምኩም ድማ ኣብ ጎኒ ፍትሕን ርትዒን ደው ኢልኩም ቃንዛን ሃረርታን ህዝብኹም ከተዝይሙን ከተቃልሑን ንእትፍጽምዎ ዘለኹም በደልውን ክትክሕሱን ታሪኻውን ሞራላውን ሓላፍነትኩም ክትስከሙ ነዘኻኽረኩም።

ኣብዚ ዝሓለፈ መዓልታት ወዲ ትኳቦ ንስርዓት ኢሰያስ ራሕሪሕዎ ኣሎ።  ህቡብነት ወዲ ትኳቦ ኣብ ግምት ብምእታውን፡ ብሞይኡ ዓቢ ኣበርክቶ ክገብር ከምዝኽእል ብምእማንን፡ ኣብ ጎድኒ ውጹዕ ሕዝቡ ዀይኑ  ነዚ ስርዓት ንምእላይ ኣብ ዝግበር ቃልሲ ኣወንታዊ ተራ ክጻወት  ንላቦ። ካልኦት ስነጥበበኛታትውን ኣሰሩ ክስዕቡን ካብ ምስቲ ዓማጺ ስርዓት ኣብ ጎድኒ ውጹዕ ህዝቦም ክስለፉ ንጽውዕ።

ኩሉ መንእሰይ ኤርትራ ድማ ንኹሎም እዞም ብስስዐን፡ ክቱር ፍርሒን ተኣሲሮም  ዋጦት ኢሰያስን ስርዓቱን ክኾኑ ዝመረጹ ክትኩንንዎምን ኣብቲ ዝኣጉድዎ ዳንኬራታትውን ከይትሳተፉ ንምሕጸን። ንኹሉ ፍርያቶምውን ክትሕሰምዎ ይግባእ። ብኣንጻሩ ንኹሎም እቶም ብዓቕሞም፡ ስቓይን ምረትን ህዝቦም ዘቃልሑ ዘለዉ ሰብ ሕልና ስነ-ጥበባውያን ሃገርና ብኹሉ ዓቕምና ክንድግፎምን ከነተባብዖምን ንላቦ።

ጽንዓትን ደበስን ንዝተጐድአ ህዝብና

ኤርትራዊ ምንቅስቓስ ንዲሞክራስን ሰብኣዊ መሰላትን (ኤምዲሰመ)

30 ጥቅምቲ 2013

ደቡብ ኣፍሪቃ