አብ ዕለት 22 ለካቲት 2015 ደለይቲ ፍትሒ ነበርቲ ዓዲ እንግሊዝ አንጻር አምባሳደር ስርዓት ህግደፍ ዓዉት ሰላማዊ ሰልፊ አካይዶም። አምባሳደር ስርዓት ህግደፍ አብ ከተማ ሸፊልድ አኼባ ኽገብር ምኻኑ ቅድሚ ክልተ መዓልቲ ናይቲ አኼባ ተፈሊጡ። ነበርቲ ሸፊልድ ንስለፍትሒ፤ ንስለህዝቢ ብሓባር ድምጽና ነስምዕ ዝብል ጸዋዒት ምስ አመሓላለፉ ኩለን ጥርናፈታት ንአባላተን አብ ውሽጢ ሓጺር ግዜ ጎስጒሰንን አሳቲፈንን።

ከባቢ ሰዓት ሓደ ድሕሪ ቀትሪ  ወዲ ውጹዕ ህዝቢ ናብ’ቲ ድምጺ ህዝቢ ዘስምዓሉ በጺሑ፤ ንስለህዝቢ ኤርትራ ክሳብ 5:30 ድሕሪ ቀትሪ ነቲ እግርኻ ዝቆርጽ ቁሪ፤ አጆኻ እዚ መስዋእቲ ምእንቲ ህዝቢ’ዩ እንዳተባሃሃሉ ተጻዊሩ፤ እቲ ዝዘንብ ዝነበረ ዝናብ አብ ነብሱ አዕሲሉ። ውጹዓት ደቂ ህዝቢ ከምዚ እንዳበሉ ጨዲሮም፤ ስርዓት ሓላፊ እዩ ህዝቢ ግን ነባሪ’ዩ! ገንዘብ ህዝቢ ናብ ህዝቢ! እሱራትና ይፈትሑ! ውልቀመላኺ ይተዓሎ! ሓውኻ/ኺ አበይ አሎ/ላ! ዝብሉ ህዝባውያን ሓረጋት ነቶም አራእሶም አድንን እንዳበሉ ዝአትዉ ዝነበሩ አብ እዝኖም አቃሊሕናሎም። መብዛሕትኦም ውሽጦም ከምዚትንከፉ ድማ ንአምን ምኽንያቱ እቲ ሓቂ ከም ጸሓይ ብርሃን ተወሊዑ ስለዘሎ። ፈትዮም ጸሊኦም ኩነታት ህዝቦም ክስምዖም ናይ ግድን’ዩ።

ድሕሪ ሰለማዊ ሰልፊ እቶም ካብ ኩሉ ከተማታት ዓድንግሊዝ ዝተአኻኸቡ ደቂ ውጹዕ ህዝቢ አብ ሬድሲ ካፈ ተአኻኺቦም ውዕሎኦም ገምጊሞም። አቦ መንበር ስምረት ንኡስ ጨንፈር ሸፊልድ አቶ ኢስማዒል ዓብደላ እድሪስ ናይ እንቃዕ ድሓን መጻኹም ድሕሪ ምስማዕ፤ ሎሚ’ውን ከምቀደምና ብሓድነት ንናይ ሓባር ጸላኢና ክንምክትን ነቶም ጌና ምስኡለና ዝብሉ ኤርትራውያን አውያት ህዝብና ከነስምዕ ምብቃዕና ብስም እቲ ውጹዕ ህዝቢ ኤርትራ የመስግነኩም ኢሉ። ብምቅጻል ንህግደፍ ተዓዊትናሎም ኢና፤ አብ ውሽጢ ካብ ዝአተዉ ብጾትና ከምዝሓበርዎ ካብ 40 ተሳተፍቲ ዘይበዝሑ ምንባሮምን ህላወ ደቂ አንስትዮ አዚዩ ከምዝጎደለን ሓቢሩ። ብምቅጻል ካብ ተሳተፍቲ ብዙሕ ንመጻኢ ጉዕዞ ቃልሲና ዘሐይል ብዙሕ ሓሳባት ፈሲሱ። ከም ህዝቢ ሓቢርና ክንቃልስ ንቅሓት መሰረታዊ ፖለቲካዊ ቃልሲ ምኻኑ ብምርድዳእ ውድበይ ውድብካ ከይበልና ማዕረ-ማዕረ እቲ ንገብሮ ቃልሲ ንቅሓት ተቃላሳይን ህዝብን ዘደንፍዕ ናይ ሓባር ስራሕ ክንሰርሕ ብምርድዳእ፤ ነቲ ብነጻ አዳራሽ ክንእከበሉ ዝፈቀደልና ወናኒ ሬድሲ ብምምስጋን ብዝክረሰማእታት ዘተና ወዲእና።

ስእላዊ መግለጺ

ፍትሒ ይንገስ

ደለይቲ ፍትሒ ሸፊልድ

ዓባይ ብሪጣንያ