ወሰኽ ደሞዝ ብምጥላብ ኣብ ኣይቨሪኮስት ናዕቢ ዘለዓዓሉ ወተሃደራት ሰለስተ ዓበይቲ ከተማታት ተቖጻጺሮም ኣብ ዘለዉሉ እዋን ኣብታ ምዕራብ ኣፍሪቃዊት ሃገር ዘይምርግጋእ ከይክሰት ሻቕሎት ተፈጢሩ ከምዘሎ ሮይተርስ ሓቢሩ።

ብመሰረት ‘ቲ ሓበሬታ፣ እቲ ካብ ዋና ከተማ ኣቡጃን 350 ኪሎሜተር ርሒቑ ዝጀመረ ናዕቢ ናብ ካልኦት ከተማታት ኣብ ዝላብዓሉ ዘሎ እዋን ሓይልታት ጸጥታ መዓስከራቶም ለቒቖም ይሃድሙ ኣለዉ። ኣብ ዋና ከተማ ኣይቨሪኮስ ኣቡጃን ከምዝብጽሑ ‘ውን ይንገር።

ኣይቨሪኮስት ኣብዞም ዝሓለፉ ዓሰርተታት ዓመታት ተደጋጋሚ ወተሃደራዊ ዕልዋታት ኣጋጢሞማ እዮም። ይኹን’ምበር እዚ ናይ ሎሚ ወተሃደራዊ ናዕቢ ኣብ መሰረታዊ ናይ መነባብሮ ሕቶታት ዘተኮረ ምዃኑ ተዓዘብቲ ‘ቲ ኸባቢ ይእምቱ።

ሎሚ ቀዳም ኣብ ሰዓታት ድሕሪ ቀትሪ ፕርዚደንት ኣይፈሪኮስ Alassane Ouattara፣ ሕቶታት ናይቶም  ወተሃደራት ሰሚዑ ምስቶም ኣብ መላእ ‘ታ ሃገር ናዕቢ ዘለዓዓሉ  ወተሃደራት ኣብ ስምምዕ ከምዝበጽሐ ብምግላጽ፣ እቶም ኣብ ምንቅስቓስ ዘለዉ ወተሃደራት ናብ መዓስከራቶም ክምለሱ ብትዊተር ጻውዒት ከዘመሓላለፈ ቢቢሲ ይጠቅስ። እንተኾነ፣ ብወገን ‘ቶም ኣድማ ኣልዒሎም ዘለዉ ወተሃደራት ዛጊት ዝተሰምዐ  ሓቅነት ናይዚ ምዕባለ ‘ዚ ዘረጋግጽ መገለጺ የልቦን።