ዑቕባይ ገብረመድህን (ከምብሪጅ፡ ማሳቹሰትስ፡ ሰ.ኣ.)

ጥቅምቲ 11፡ 2013

ክሳብ መዓስ ኢና መርዚ ጥፋኣትና ክንሰቲ?!!!

ይኣክል! ይኣክል! ስቓይን ውርደትን ፍጹም ይኣክል ንበል ንሓዋሩ!!!

      ኣይ! ኣይ! ኣይ! ሕጂ ኸኣ ማእከላይ ባሕሪ (መዲተራንየን ሲ) ንሕስያ ዘይብሉ ናይ ኣማኢት ህይወት ግብሪ ሓቲታትና! መዕለቢ ዚሰኣኑ ህዝቢ ኴንና ረኺባትና ኢያ’ምበር ንመንዶ ተደጋጋሚ ብማኢታት ካብ ሓደ ህዝቢ ወሲዳ ትፈልጥ ኢያ?! ብዕለት 10-3-13 ክሳብ 360 ሰባት ኣጥፊእናስ፤ ነዛ ጽሕፍቲ ሒዘ ከለኹ፡ ሎሚ ዓርቢ፡ ዕለት 10-11-13 ኣስታት 200 ኤርትራውያንን ሶማልያውያንን ዝሓዘት ጃልባ ከም ዝተገምጠለት ኣብ ኣልጀዚራን ኣሰናን ዳግማይ መርድእ ምስ ነበብኩ፡ ንደቓይቕ ኣእምሮይ ደንዚዙ፡ ኣዒንተይ ፈዚዙ ክጽሕፍ ኣይከኣልኩን። እታ ካብ ድቕድቕ ጸልማት ስቕታና እተባራብረናን ከም ሓደ ህዝቢ እንምክተላን ካልኢት ደኾን ኣኺላ ትኸውን ክብል ንነፍሰይ ተወኪሰያ። ይግበረልና ጥራይ ኢየ ክብል ዝኸኣልኩ።

ነቲ ጠንቂ ጥፍኣትናን ዕንወትናን ብሓደ ማዕበልን ቅልጽምን ህዝቢ ምሒውና ደርቢናዮ እንተ ን ነብርዶ እዚ ኹሉ ኣበሳ ምወረድና’ዩ?! ዓለም ሓዘና እናገለጸት፡ ኤርትራዊ ሬሳ ከም ዓሳ እናተገፈፈ ኣብ መሬት ተሰጢሑ እናረኣየ –ዘይሕጋውያን ስደተኛታታት ካብ ቀርኒ ኣፍሪቃ- ኢሉ ከይሓፈረ ኣብ ቅድሚ ህዝብን ዓለም ኪዛረብ ኪሎ መንዶ ኣዒንትኻ ተደፈን፡ ኣፍካ ተለጐም ዝበሎ ኣሎዩ? ከም ልማዱ ብዱዕ ቃላቱ ካብ ምፍናው መን ከልከሎ? እዚ ድኣማዕበላዊ ናዕቢ ኣልዒሉ ምስ ኣገልገልቱ ኪጸራርጎ ዚግባእ ኩነትዶ ከይኮነ? ኣብ ወጻኢ እንነብር ካብ ሽምዓ ምውላዕ ሓሊፍና እንታይ ጌርና? ንግብሪ ክንዝቲ’ኳ ክሳብ ሕጂ ዘይተኣከብና! በዚ ድርብ ጥፍኣት ኣሓትናን ኣሕዋትናን  ዘይነደርና ድኣ ብምንታይ ኢና ናይ ሓባር ቁጠዐና ከነርኢ?! ካብ ሕሉፍ ታሪኽ ዘይመሃር ኪደግሞ’ዩ ዚነብር- ንዝተባህለ ብሂል ሓቅነቱ ከነረጋግጽዶ ንነብር ከየለና። ንነብሰና ብዕትበት ዓገብ ክሳብ ዘይበልናያ፡ ንሕልፈታትና ከነሕልፋ ብሓባር ከም ሓደ ህዝቢ ክሳብ ዘይመከትና ኸኣ ንሳ ኢያ እታ ዘይትለቅቕ ዕጫ ተኼላ ጥፍኣትና።

አረ ኣብ ውሽጢ፡ ብፍላይ ኸኣ ኣብ ወጻኢ እንርከብ ህዝቢ ኤርትራ ኣንታይ’ዩ ወሪዱና! ኣብ ክንዲ በቲ ታሪኻዊ ተኣምር ዘመዝገበ ጽንዓት ሓድነትና ሓርነትና ጨቢጥና ኣብ ቤትና ከቢርና ንነብር፡  ብዘይረብሑ ሕልፈታት ሃገር ስለምንታይ ተፋላሊና ንጥፍኣትና ርዒምና?!!!  ጠፍአ እናተባህለ ብጽንዓቱ ዝሰሰነ፣ ንርእሰ ሓያላን በዲሁ ካብ  ልፍንታዊ መግዛእቲ ብናጽነት መሰስ ዝበለ ህዝቢ ከመይ ኢሉ ሎሚ ብጻብዕ ብዝቝጸሩ ዘይረብሑ ጐሓላሉ ንጥፍኣቱ ይደንን?!

ሕሉፍ ሓሊፉኮ ኣብ ዓለም ዘይተራእየ ሎሚ ኣብ ውሽጢ ሃገር ብሽፍታዊ ስርዓት ህግደፍ ናይ ኣሕዋትን ኣሓትን በሕዋት ናይ ምሻጥ ዕዳጋ ተኸፊቱ፡ ኣብ ባንካታት ብወግዒ ገንዘብ ይኣቱ ኣሎ ክብሉኻ ትሓልም ከም ዘሎኻ ኮይኑ’ዩ ዝስምዓካ። ሕልሚ ግን ኣይኮነን፡ መዓልታዊ ፍጻሜ’ዩ፤ ልቢወለድ ግን ኣይኮነን፡ ግሁድ ሓቂ ኢዩ። ሎሚ ኤርትራ ከተዘንትዎ ኣማኒ ከይትስእነሉ ዘሰክፈካ ፍሉያት ናይ ሰብ ነጋዶ  ፍጥረት ኣፍሪያ ኣላ። እወ፡ ዝወዓለ ይንገርካ፡ ዝኸፈለ ይምከርካ-  ኢዩ። ከም እንስሳ ዘገዳም ኣብ መጻወዲያ የእቲዮም እናእወኻ ዋጋ ህይወትካ ንስድራ ቤትካን ቤተሰብካን ከም ትሓትት ዝገብሩ፡ ብህይወትካ ዋጋ ዕዳጋ ምግባር ከም ድማዕ ዝርእዩ፡ ከይተሰከፉ ኣብ ባንካ ኣቐሚጦም ብምርካብ ደሞዞም ካብ ሽፍታ ኢሳያስ ዝቕበሉ ኣረሜናውያን መሬት ተነዚሖማ ኣለዉ። እዞም ሎም ቅነ ኣብ ማእከላይ ባሕሪ ከም ቀዳሞት በማኢት ስኢናዮም ምኽንያት ውዑይ ሃገራዊ ሓዘን ኮይኖሙና ዘለዉ ንጹሃት ዜጋታት በዚ ዕዳጋ’ዚ ህይወቶም ገዚኦም ዝሰገሩ እኳዮም ኔሮም!!! ብተወሳኺ እቶም ኣብ ገማግም ሊብያ ኮይኖም ለካሚት ጃልባ ዘዳለዉ እኮ ነቶም 518 ተሳፈርቲ ነፍስ ወከፎም ሽሕን ሽዱሽተ ሚእትን ዶላር ኣኽፊሎም ኢዮም ናብ ሓደጋ ጥፍኣት ኣሳጢሖሞም። ከምኡውን ነቶም ሎሚ ዝሰዓቡ ክልተ ሚእቲ ግዳያት ምጥሓል ጃልባ። ካብቶም ብዕለት ሰለስተ ሓምቢሶም ካብ መዓት ዝወጹ ብዛዕባ ሓንቲ ወላዲት ንደቃ -ከጥፋኣኩምዶ ሒዘኩም መጺአ! – ዝበለቶ ክነግሩ ከለዉ ክትሰምዕ ኣእምሮኻ ደንዚዙ መንጸሮር’ዩ ዝሕዘካ።  እቲ ምጾታት ዘብል ካብዚ ዚኸፍእ ድዩ? ኤርትራውያን ንመጥፊኢና ኣብ ክንዲ ነጥፍእ ስለምንታይ ባዕልና ንጠፍእ ኣለና?!!!

ውልቀ መላኺ ኢሳያስ እቲ ንበረኻ ዝወፈረሉ ዕላማ ንደሞክራሲያውያን ደቀባት ብምሕቃቕን ሓድሕድ ኲናት ብምውላዕን ንዓወት ሰውራና ከቘልዕ ዝነበሮ መደብ ብጽንዓትን መስዋእትነትን ጀጋኑ ፈሺሉዎ፡ ድሕሪ ናጽነት ነቲ ካልኣይ ናይ ምዕናውን ምጽናትን መደቡ  ከይወዓለ ከይሓደረ ከም ዝተተሓሓዞ ኣዒንትና ዝዓመትናሉ ሓቂ ኢዩ። ድሕሪ ናጽነት ውልቀ መላኺ ኢሳያስ ናብቶም ዘይጸዓዱሉ ቀንዲ ጸላእቱ መንእሰያት ከተኵር ግድነት ኢዩ ኔሩ። ካብ ነዊሕ ጊዜ ዝሓንጸጾ መደብ ትርጉም ኣልቦ ኲናታት ወሊዑ ኸኣ ዓሰርተታት ኣሽሓት ወለዶታት ኣጥፊኡልና፤ ዝተረፉ ካብ መኣዲ ትምህርቲ እናመንዘዐ ኣብ መዓስከር ወፍሪ ባርነት ዳጒኑ ናይ ምጽናትን ምልማስን  መንእሰያት ተግባሩ’ውን ዳርጋ ዛዚሙዎ። ዝተረፈ ባዕልና ሒዝናሉ ኣለና፤ ዘቲና ዘይነፍሪ ምስ ኮንና ዝብድሆን ዝኣልዮን ሓይሊ ከም ዘይትንስእ ተኣማሚኑ ኣፍ ልቡ ገቲሩ ኣብ ቅድሚ ህዝብን ዓለምን ዓጀውጀው ይብል ኣሎ። ህዝቢ ናይ ምጽናት ሃገር ናይ ምዕናው ተግባሩ ብሰሪ እናረአና ምዕማትና፡ እናሰማዕና ምጽማምና ካብ ዝተጸበዮ ንላዕሊ ዝሰመረሉ እመስለኒ። ከምቲ ንመደረጋሕ እምኒ ኣብ ገምገም ኣብጺሕካ ምስ ደፋእካዮ ባዕሉ ዚንከራሮ፡ ንሕና’ውን ብስቕታናን ግብራዊሓድነት ዘይምዕጣቕናን፡ ባዕልና ተዋሳእቲ ጥፍኣትና ኴንናሉ ኣለና።

እዚ ግርምቢጥ ተርእዮ ኢዩ ኸኣ ንኹነታት ህዝብን ሃገርን ኤርትራ ብግቡእ ዚገልጽ ቃላት ንኽትረክብ ዝሕርብተካ። እወ! ኩነታት ልዕሊ ዓቕሚ ቃላት ካብ ዚዓርግ ነዊሕ እዋን  ሓሊፉዎ’ዩ። ብርዒ ካብ ሴፍ ትሕይል ዚብል ብሂል ቃል ብግብሪ ምስ ዚስነ ጥራይ’ዩ ሓቅነቱ ዚረጋገጽ። እምበር ዚፈሰሰ ቀለም ድኣ መዓስ ውሒዱ።

እቲ ዓሚቝ ምስጢር ህይወት እንታይ ምዃኑ ንምግላጽ ዓቕሚ ናይዚ ጽሑፍ ኣይኮነን። ኮይኑ ግን፡ ካብ ተመክሮን ትዕዝብትን እንቐስሞ ነገር እንተ’ሊዩ፡ ምስጢር ህይወት ኣብ ኩሉ መኣዝኑ ብሕጊ ናይ ባህሪያውን ሰብኣውን መንኰርኰር ለውጢ ዚግዛእ፡ ዘይቋረጽ ቃልሲ ዘሰንዮ ምዃኑ ኢዩ። ኣብ መንጎ ህይወትን ሞትን ዘሎ ባህሪያውን ሰብኣውን ለውጢታት ብጊዜ ይዕቀን፣ ብናይ ጊዜ ምቅይያራት ከኣ ይልለ።  ንኹሉ ጊዜ ኣሎዎ ዝበሃል ከኣ ኣብዛ ዓለምና ካብ ጊዜ ወጻኢ ዚፍጸም ነገር ከም ዘይህሉ የረድኣና። ምስጢር ሓድነት ንሓያላን በዲህና ጐይቶት መሬትና ክንከውን ዘኽኣለና ክነሱ ግን ከመይ ኢሉ ሎሚ ንኤርትራውያን ጓና ኾይኑና፡ ከም ደቂ ዛግራ ፋሕ እናበልና መንገዲ ጥፍኣትና ንጐዓዝ ኣለና? ሓቢርካ ዘይምምካት ተባታቲንካ ምጥፋ ከም ዘስዕብ ካብ መን ኢና ትምህርቲ ክንደልየሉ?

ንኹሉ ጊዜ ከም ዘሎዎ መጠን፡ ከምቲ ንወለዶታት ወይ ዓሰርተታት ዓመታት ኣብ ከብዲ መሬት ኪጕህር ዝጸንሐ እሳተ ጎመራ ሓደ መዓልቲ ዚትኰስ፡ ኣብ ዚተፈላለየ ኵርናዓት ዓለም  ንዓሰርተታት ዓመታት ኣብ ከብዲ ህዝቢ ፈኸም ኪብል ዚጸንሐ ጓህን ሕርቃንን እዋኑ ኣኺሉ ሓንሳብ ምስ ተንስኤ ዘይድፋእ፡ ንድሕሪት ዘይምለስ ማዕበል ህዝቢ ይኣክል ስቓይ! ይኣክል ጸቕጥን ሓሳርን! እምቢ ንጭቆና መርሓባ ንሓርነትን ማዕርነትን ይብል ኣሎ።

ህዝቢ ኤርትራኸ ድኣ? ነዚ መኣዲ ህዝባዊ ማዕበል ንለውጢ ጀመርቲ ክንከውን ዚነበረና፡ ስለ ምንታይ ኢዩ ዛጊት ዘይተጸምበርናዮ? እዚ ኹሉ ብዓሰርተታት ኣሽሓት ኣብ ፈቐዶ መሬት ስደት ዚሳቐን ዚሓስርን ዘሎ፡ ኣብታ ብረቱ ደርቢዩ ዝወጸላ ሰዓት ንሓደ ኣብ ጥቓኡ ዚህሉ መራሒ ለኪሙ እንተ ዚወጽእ ዛጊት ጠንቂ ስደት ኣብቂዑ መንእሰይ ኣብ ሃገሩ ቀሲኑን ኰሪዑን ይነብር ምሃለወ ክብል ከንቱ ሕልሚ ትሓልም ኣለኻዶ የብለኒ?

ንኹሉ ጊዜ ከም ዘሎዎ ንምርዳእ ካብ ተመክሮ ህይወት እንቐስሞ ዓቢ ትምህርቲ ኮይኑ፣ ፍጻሜታት ከየቕለብናሎም ምስ ዚሓልፉና ግን ዕዳ ከም ዘሎዎ እዚ ሕጂ ህዝቢ ኤርትራ ኣብ ትሕቲ ፋሺስታዊ ውልቀ ምልኪ ዘሕልፎ ዘሎ፡ ብቑዕ መግለጺ ቃላት ዘይርከቦ ስቓይን መከራን፡ ከርተትን ሞትን ንባዕሉ ምስክር ኢዩ። ከም ህዝቢ ንናጽነትና ከቃላጥፉ ንሓርነትና ከውሕሱ ዚኽእሉ ዘምለጡና ምቹኣት ኩነታት ቀለልቲ ኣይነበሩን። ግን ከምቲ ብቕድሜኻ ዝውሕዝ ማይ ናብ መስኖ ኣሊኻ መግብኻ ክንዲ ተፍርየሉ፡ ስቕ ኢልካ ኪፈስስ ብምርኣይካ ጠንቂ ድኽነትካን ዓጸቦኻን ትኸውን፡ ለውጢ ንምምጻእ ዓቢ ተኽእሎ ዚህበካ ሳሕቲ ጥራይ ዚርከብ ዕድል ስቕ ኢልካ ምስ እተሕልፎ፡ ዝኸፍአ ኩነታት ከም ዚስዕብ እነሆ ኣብ ቅድሜና ንርእዮ። ናይ 93 ምንቅስቓስ፡ ድሒሩ ምህራም ኣካለ ስንኩላን፡ እቲ ስራዊት ሓርነት ዝበሃል ዝነበረን ህዝብን ሰሚሩ ለውጢ ከምጽኣሉ ዚኽእል ዝነበረ ምቹእ ኣጋጣሚታት’ዩ ኔሩ። ከይተጠቐምናሉ ኪሓልፍ ሓዲግናዮ። እነሆ ኸኣ ዘይከኣል ፍዳኡ።

እሞኸ ድኣ እንታይ ንግበር? ኣቦታት ብሓያል ፍትሓዊ ባህሊ ዓቂቦም ዘጽንሑልና፡ በዕጽምትን ደምን ስዉኣት ንናጽነት ዝተጸምበለት ሃገር ኣዒንታን ብርካን ዝኾኑ መንእሰያታ ከሲራ ክትምህምን ትም ኢልና ክንርእያ?! ደጊምስ ኣይንውዕሎን ግዲ፣ ታሪኽና ታሪኽ ሕልፈታት ኪኸውን ኣይንፈቅድን ንኸውን ግዲ! ኣንጻር ስርዓት ህግደፍ ንቃወም ኢና እናበልካ ንዓመታት ብጓል ዘረባ/ጫሌዳ ዘረባታት እናተሰሓሓብካ ንስቓይ ህዝብኻ ምንዋሕከ ምስ ምንታይ ኢዩ ኪጽብጸብ? ብልሓቱ እንታይ ኢዩ? ብዙሕ ከይበልኩ ተቓዋሚ ጨቋኒ ስርዓት ህግደፍ ኢየ እናበልካ ሓድሕድካ ኪትመናጨት ወርቃዊ ጊዜ ተጥፍእ እንተ ድኣ ዄንካ ሓልዮት ህዝብኻ ዘይምህላውዶ ኣይእምትን? ይኣክል ዕሽነት! ብዘይ ውህደትን ስኒትን ኪመጽእ ዝኽእል ለውጢ፡ ኪትከል ዚኽእል ፍትሓዊ ስርዓት የለን። ህርፋን ዕሩቕ ስልጣን ሳዕቤና መርዚ፡ ጸበባን ጥፍኣትን ከኣ ፍሬኣ ምዃኑ ርኢናያ ኣለና። እሞ ነዚኣስ ትፍንፍና’ምበር ትብህጋዶ?

ኣብ ቦትኣስ ህዝብኻ ብዝባረኸልካ ኣገልጊልካ ጽቡቕ ታሪኽ ገዲፍካ ምሕላፍ፡ ብውዑይ ንብዓጥ ፍቕሪ ህዝብኻ ክትፋኖን ኣብ ልቢ ህዝብኻ ብጽቡቕ ክትዝከር ክትነብርን ሳሕቲ ብውሑዳት ዚርከብ ዕድል ክንጽገዎ ምትምናይ ይምረጽ። ሰናይ ዕጥቂ ጥራይ ኢዩ ዚሓትት።  ከም ህዝቢ ኣብ ትሕቲ ብርሃን ሓርነት ክንስስን ምእንቲ ብሓደ ድምጺ ብስሙር ቅልጽም ንፍትሒ ደው ንበል። ህዝቢ ሰሚሩ ምስ ዚቃለስ፡ ኣብ ርእሲ’ቲ ናይ ገዛእ ርእስና ተመክሮ፡ ህዝቢታት ሰሜን ኣፍሪቃ ብዘይ ክማህ ጽንዓት ዘካየዶ ኣብነታዊ ቃልሲ ብዝወሓደ ክሳራ ተኣምር ኪስራሕ ከም ዚከኣል ኣብ ግብሪ ርኢናዮ ኣለና። ስለዚ ክቡራት ኣሕዋትን ኣሓትን፡ ተራና ነጸብቕ ዕጫና ምእንቲ ኪጽብቕ!

ክቡራት ደቅ ሃገር ኣብ መወዳእታ ክብሎ ዝደሊ፡ ቅድሚ ሕጂ’ውን ከይሰልከኹ ዝበልኩዎ ክደግም፡ ዘቲና ከነድምዕ ምእንቲ ቅድሚ ኹሉ ብመንነትና እንልለየሉ ቋንቋናን ባህልናን ነኽብር። ንኹነታት ኤርትራ ዝምልከቱ ዘካራኽሩ ኣገደስቲ ጽሑፋት ብቛንቋ እንግሊዝኛ ኪጸሓፉ ጸኒሖም ኢዮም፣ ይጸሓፉ’ውን ኣልዉ። ምንም’ኳ መብዛሕትኡ ኣብ ወጻኢ ዚርከብ ህዝቢ ኤርትራ ዚዋስኣሉን ብዚለዓለ ዚረዳዳኣሉን ቋንቋ ትግርኛ እንተ ኾነ፡ ንኤርትራ ብዚምልከት ብቛንቋ እንግሊዝኛ ምጽሓፉ ኣበር የብሉን።  እቲ ዕላማ ናይቶም ዚጽሕፉ ነቲ ዚበዝሐ ብሓሳብ ንምብጻሑ እንተ ድኣ ኾይኑ ግን እንግሊዝኛ ባዕዲ ቋንቋ ከም ምዃኑ መጠን፣ ብናይ ሓሳባት ምትሕልላፍ ኣብ ልዕሊ ሃገራዊ ቋንቋታት ኪስራዕ ኣይኽእልን’ዩ። ስለ ርትዒ ንምዝራብ፡ ብእንግሊዝኛ ይኹን ብኻልእ ቋንቋታት ዚቐርቡ ሃገር ጠቀስ ጽሑፋት ብውሑዱ ናብ ትግርኛ ተተርጒሞም ይቐርቡ እንተ ዚነብሩ’ኳ፡ ኣብ ጽፍሒ ምውህሃድ ኣረኣእያታት ዝያዳ ጥቕሚ መበርከቱ፤ ኣብ ብስለት ኣተሓሳስባ ኸኣ እጃም ምሃለዎም እብል። ካብኡ ዚተርፈ፡ ጌጋ ይኽለኣለይ እምበር፡ ከምዚ ትዕዝብተይ ኣብ ውሱናት ዚተሓጽረ ዕላል ምሁራት ጥራይ ኮይኑ ዝተርፍ ዘሎ እመስለኒ። ከምቲ ለባማት ዝመሰሉዎ “ላምሲ ብኢዳ ዝቐርባስ ብእግራ ትሓክኽ “” ከይኸውን ክላቦ እደሊ። ነቶም ኣብ ሃገራት ስደት ዚተወልዱ ደቅና ገዲፍና፡ ካብ ቋንቋ ሃገር ቋንቋ ባዕዲ ኢየ ዝመልኽ ምባል ከኣ ዘዅርዕ ኣይኮነን። ኣብ ሓደ እዋንስ እኮ ቋንቋ ሃገር እንግሊዝኛ ኪኸውን ይሓይሽ ዚብል መስደመም ርእይቶ ኣብ ጽሑፍ ተራእዩ ኢዩ፤ ስለ’ቲ ክብሪ መሰል ናይ ርእይቶ ሓርነት ክትሰምዖ  ግድን’ዩ፡፡ ግን ጽባሕ ኤርትራ ምስ ወግሓላኸ ምስቲ ብሃገሩን ብቛንቋኡን ኒሕ ዝውንን ህዝቢ ብኸመይ ኢየ ክዋሳእ ኢልካ ምሕሳብ የድሊ። መንነት ከኣ ብዘይካ ባህልን ቋንቋን ካልእ መለለዪ ከም ዘይብሉ ምስትውዓል ይግባእ። ባዕዳዊ ቋንቋ ንባህልን ያታን ሃገር ከም ዘጥፍእ ስምብራቱ ገና ዘይጠፍአ ታሪኽ መግዛእቲ ኢትዮጵያ ባዕሉ ዝምስክሮ ኢዩ፡፡

ዘለዓለማዊ ዝኽሪ ንስዉኣትና!

ዝጠፍኡ ዜጋታትና ዘለዓለማዊ ዕረፍቲ ይቀበሎም?

ህዝቢ ኤርትራ ብሓርነትን፡ ሰላምን ራህዋን  ይደበስ!!!