“ካብ ትም ምባልሲ ምጅማር መሪጽና”

ቃል ሃይለ ወልደትንሳኤ (ድሩዕ)

ቅድሚ እታ ሚኒስተራትን ላዕለዎት ሓለፍቲ ህ.ግ.ደ.ፍ.ን ኣብ ቀይዲ ዝኣተዉላ  ዕለት ማለት  መስከረም 18, 2001 ዓ.ም.፡ ኩሎም በቢወገኖም ኣብ ዝተፈላለያ ኣብ’ቲ ግዜ’ቲ ዝነበራ ጋዜጣታት ኤርትራ፡ መግለጺ ሂቦም ነይሮም’ዮም። ሓደ ካብኣቶም ናይ ወጻኢ ጉዳይ ሚኒስተር ዝነበረ ሃይለ ወልደትንሳኤ (ድሩዕ) እዩ ነይሩ።  ሃይለ ካብ’ቲ ሰፊሕ መግለጺኡ፡ ብዝያዳ ከተኩረላ መሪጸ ዘሎኹ እዛ “ካብ ትም ምባልሲ ምጅማር መሪጽና” እትብል ኣበሃህላኡ እያ።

እዞም ሚኒስተራትን ላዕለዎት ሓለፍቲ ህ.ግ.ደ.ፍ.ን ዝነበሩ ሰባት፡ ኣብ’ቲ ነዊሕ ብረታዊ ቃልሲ ይኹን ኣብ’ቲ ድሕሪ ዓወት ዝተተኽለ መንግስቲ ቀንዲ ብጾት ኢሳያስ ምንባሮም ኩላትና እንፈልጦ ጉዳይ እዩ። ኢሳያስ ብጾተይ ዘይብል ጠላም ምዃኑ ካብ ተመኩሮኦም ኣጻርዮም ይፈልጡ ነይሮም እዮም። እዚ እንዳፈለጡ ግን ነታ ዝወሰድዋ ስጉምቲ ክወስዱ መሪጾም። ኣብ’ቲ ግዜ’ቲ እዩ ሃይለ ምስ ተሓተተ “ካብ ትም ምባልሲ ምጅማር መሪጽና” ዝበለ።

ብተረድኦይ፡ እዛ ኣበሃህላ እዚኣ እትሕብሮ ነገር እንተድኣ ሃልዩ፡ ብዙሓት ጌጋታት ክፍጸሙ እንዳርኤና፡ ኣስቂጥና ነሕልፎም ኔርና ኢና፡ ሕጂ ግን ኣብ መለክዒ ዘይርከቦም ደረጃ ስለዝበጽሑ ዝመጽኤ ይምጻእ፡ ካብኡ ዝኸፍእ ነገር የልቦን ኢልና ተቓውሞና ጀሚርና ኣሎና ዝብል ናይ ጣዕሳ ምልክት  እዩ። እወ እቶም ዝፍጸሙ ዝነበሩ ጌጋታት ብኢሳያስ ጥራሕ እዮም ተፈጺሞም ኣይንብል ኢና። መብዛሕትኦም ካብ’ዞም ሽዕኡ ናብ ቀይዲ ዝኣተዉ ሰባት፡ ኣብ’ቲ ፍጻመ ናይ’ቶም ጌጋታት ይኹኑ ገበናት ተሳተፍቲ ምንባሮም ብሩህ እዩ። እንቋዕ ሕራይ ኰኑ ዝብል ዘይፍትሓዊ ኣዘራርባ ክህልወና ግን ኣይግባእን እዩ። እቲ ዝምረጽ ሓደ ፍትሓዊ መንግስቲ ተኺልካ፡ ኩሉ ዝኽሰስ ሰብ ብሕጊ ጉዳዩ ክርኤ ከሎ እዩ። ቀዳማዮም ከኣ ኢሳያስ ኣፈዎርቂ። እዚ ዕድል እዚ ግን ኣይተረኽበን። እቲ ኣብ’ዚ ክርኤ ዘለዎ ጉዳይ፡ እዞም ሰባት እዚኣቶም  ብዘይ ፍርዲ፡ እሞ ከኣ ብኢሳያስ ኣፈወርቂ ክጠፍኡ ከለዉ እዩ።

እታ “ቅዋም ኣብ ግብሪ ይውዓል” ምባሎም ዋላ’ኳ ደንጉዮም እንተበሉዋ ብዋጋ ሂወቶም እዮም ኢሎማ። ኣብ ትሕቲ ዝዀነ ይኹን ኩነታት ከኣ እትድገፍ ጠለብ እያ።

እዛ “ካብ ትም ምባልሲ ምጅማር መሪጽና” እትብል ኣበሃህላ ሃይለ፡ ንክመጽኦም ዝኽእል ጸገማት’ውን ትሕብር ነይራ’ያ። እዞም ሰባት እዚኣቶም ምስ ኢሳያስ ንነዊሕ ዓመታት ስለዝሰርሑ፡ ኢሳያስ ንዝተቓወምዎ እንታይ ከምዝፈድዮም ኣጻርዮም ይፈልጡ ነይሮም እዮም። ኣብኦም በጺሓ ከምዘይትቕየር’ውን ልዕሊ ኩሉ ሰብ ይፈልጡ ነይሮም። መብዛሕትኦም ዲፕሎማቲክ ፓስፖርት ዝነበሮም ሰባት እዮም። ኣቐዲሞም ንከምልጡ መደብ እንተ ዝነብሮም ነይሩ ከምልጡ ምኸኣሉ ነይሮም። ወረ ገለ ካብኣቶምስ  ኣብ ወጻኢ ከለዉ እዮም ተቓውሞኦም ጀሚረሞ። ከም ናይ ገሊኣቶም ዝገበርዎ “ፓስፖርትና ስሒበሞ መምለሲ ስኢና” ኢሎምዶ ኣብ ቃሕ ዝበሎም ሃገር ክነብሩ ኣይምኸኣሉን እዮም።  ግን እንታይ መሪጾም? እቲ ተቓውሞ ንጀምሮ፡ ኢሳያስ ንክንቅጽሎ ዕድል ስለዘይህበና ከኣ ካልኦት ይፍጽምዎ። እንተዀነ ህዝብና ብሰንኪ እቲ ቅድሚኡ ዝነበረ ዝምድናታት ከም’ቲ ናይ ቀደም ባህሪኡ ክገብር ኣይከኣለን። እንሆ ከኣ ንሳቶም ብዘይ ፍርዲ ጠፊኦም፡ ህዝብና ከኣ ኣደዳ ሕሰምን መከራን ኰይኑ።

ዘልኣለማዊ ዝኽሪ ንስዉኣትና

ተስፋይ ተምነዎ