ካብ ሰሜን ኣፍሪቃ ናብ ዓዲ ጥልያን  ብጃልባ ዝጓዓዙ ዝነበሩ ዛጊት ዜግነቶም ዘይተረጋገጸ ልዕሊ ኣስታት 250 ስደተኛታት ኣብ ማእከላይ ባሕሪ 120 ኪሎሜተር ካብ ላምፐዱዛ  ብዘጋጠሞም ሓደጋ ባሕሪ ተሳፊሮምላ ዝነበሩ ጃልባ ስለዝጠሓለት  ብውሑዱ 27 ሞይቶም ከምዘለዉ  ቀዳማይ ሚኒስተር ማልታ ከምዘረጋገጸ ቢቢሲ ሓቢሩ።

ብመሰረት ሓበሬታ ቀዳማይ ሚኒስተር ማልታ፣ ዛጊት 203 ስደተኛታት ድሒኖም ኣለዉ።

እታ መርከብ ኣብ ጸሓይ ዓራርቦ እዩ  ኣብ ማያዊ ግዝኣት ማልታ ሓደጋ ኣጋጢሙዋ፣ እቲ ብሓይሊ ባሕሪ ማልታ ዝወሃሃድ ዘሎ ናይ ድሕነት ዕማም  ብጸላም ይቕጽል ከምዘሎ ‘ውን እቲ ሓበሬታ የረድእ።

እቶም 147 ስደተኛታት ብሓለዋ ባሕሪ  ማልታ እቶም 56 ከኣ ብኣሃዱታት ጥልያን እዮም ድሒኖም። ኣንሳ ዝተባህለ ኣገልግሎት ዜና ጥልያን ኣብቲ ባሕሪ ብውሑዱ 50 ሬሳታት ከምዝተራእየ ኳ እንተሓበረ ዛጊት ጭቡጥ ቁጽሪ ግዳያት ክፍለጥ ኣይከኣለን ዘሎ።

እዚ ሓደጋ ‘ዚ ድሕሪ ሓደ ሰሙን ናይቲ ኣስታት 350 ዳርጋ ኹሎም ኤርትራውያን ዝኾኑ ስደተኛታት ዘህለቐ ዘስካሕክ ሓደጋ ባሕሪ እዩ ኣጋጢሙ።

ኣብ ቀጻሊ ተወሳኺ ሓበሬታ ከነስዕበልኩም ኢና።