ካብ ምልካዊ ስርዓት ኢሳይያስ ኣምሊጦም ሱዳን ካብ ዝኣትዉ ኣስታት ክልተ ወርሒ ዝገበሩ 4 መንእሰያት ሃገራዊ ኣገልግሎት፣ ኣብ ካርቱም ብሓባር ኣብ ዝተኻየሩዎ ገዛ ኣብ ካንሸሎ ደቂሶም ክለዉ፣ ብ 26 ሚያዝያ፣ ሰዓት ክልተ ናይ ወጋሕታ ድሕሪ ዝወረዶም ሃንደበታዊ መጥቃዕቲ፣  ሓደ ካብኦም ኢዮብ ተስማማርያም ዝተባህለ መንእሰይ በቲ ኣብቲ ጥምጥም ዝወረዶ ማህሰይቲ፣ ኣብ ሕክምና ድሕሪ ምጽናሕ ኣብ ሰሙኑ  ብ 3 ግንቦት ክመወት ከሎ፣ እቶም ዝተረፉ ሰለስተ ጉዱኣት ብጾቱ ‘ውን ኣብ ሕክምና ከምዝቐነዩ ምንጭታት ሓቢሮም።

እቶም ደቂ ሰፍኣ ምዃኖም ዝንገረሎም መሳኪን ግዳያት፣ እቶም መንነቶም ዘይተፈልጡ ናይ ከተማ ሸፋቱ ኣብ ምድቃሶም ከለዉ ኣብ ዓይኖም ላምፓዲና ብምውላዕ ኣብ መኪና ክስቀሉ ምስ ኣገደዱዎም ካብቲ ጭውያ ከምልጡ ድሕሪ ዘካየዱዎ ጥምጥም ካብታ መኪና ብምውዳቖም እዮም እቲ ሞትን መጕዳእትን ኣጋጢሙዎም።

መንነት ናይቶም ፈተነ ጭውያ ዘካየዱ ገበነኛታት ዛጊት ብልክዕ ኳ እንተዘይተፈልጠ፣ ደጊም ካርቱም ‘ውን ከምተን መደበራት ስቓይን ሞትን ኮይነን ንመንእሰያት ኤርትራ ግዳይ ሸፋቱን ዓመጽትን ዝገበራኦም ሸገራብን ሲናይን ውሕስነት ከምዘይብላ ብዝምኽኻር፣ ሰብኣዊ ድሕነቶም ንምሕላው መንእሰያት ኤርትራ ከቢድ ጥንቃቐታት ከዘውትሩ እቶም ምንጭታት የዘኻኽሩ።

ብዘይካ ‘ቶም ንመንእሰያት ኤርትራ ጅሆ ሒዞም ገንዘብ ምምእራር ዝለመዱ ነጋዶ ሰብ፣ ሃሱሳትን ሰለይትን ምልካዊ ስርዓት ኢሳይያስ ‘ውን ነቲ ኣብ ሱዳን ዘሎ ሕጊ ኣልቦነት ተጠቒሞም ከምዚ ዝኣመሰለ ናይ ጭውያን ግፍዕን ስርሓት ከምዝፍጽሙ ይፍለጥ።