ክቡራትን  ደለይቲ ለዉጥን ተቓለስትን  ኤርትራውያን

ከም ዝፍለጥ፡ ኣብ ዓለም መዳርግቲ ዘይርከቦ መስዋእቲ ተኸፊልዋ፡ ቅድሚ 25 ዓመት ዝተጉዋናጸፈት ሃገርና ኤርትራ፡ ነቲ ታሪኻዊ ኣጋጣሚ መዝሚዞም፡ ኣብ ኮረሻ ስልጣን ብዝሓኾሩ ‘መራሕቲ’፡ ተጠሊማ፡ እቶም ውልቀመለኽቲ ደቐይ ኢሉ ዝሓቖፎም ህዝቢ፡ ደም የንብዕዎ ኣለዉ። ነቲ ህዝቢ፡ መሰረታዊ ሰብኣዊ መሰላቱ ምንፋጎም ከይኣክል፡ ሓርኮትኮት ኢሉ መዓልታዊ ህይወቱ ከይፍጽም፡ ምስ ኩለን ጎረባብቲ ሃገራት ኩናት ወሊዖም፡ ኣብ መጋርያ ሓዊ ብምጥባስ፡ ወግሐ-ጸብሐ ዉግእን ወረ-ዉግእን ብምግዋሕ፡ ኣብ ሸቐልቐል የንብርዎ ኣለው። የግዳስ፡ ከምቲ ኣናፎለስ (Anopheles) ጣንጡ፡ ኣብ ጀቕ-ጀቕ መሬት እምበር ኣብ ንቑጽ ቦይታ ዘይትርከብን ዘይትራባሕን፡ ዉልቐ-መለኽቲ እዉን፡ ኣብ ዕግርግርን ቕልዉላዉን እምበር፡ ኣብ ሰላምን ቅሳነትን ክነብሩን ክሰርሩን ከም ዘይኽእሉስ፡ ህሉው ኩነታትን ሕሉፍን ታሪኽ ዓለምን ስለ ዝምህረና፡ ኣይሕድሰናን እዩ።

እምበኣር ካብዚ ብምብጋስ ኢና፡ እቶም ኣብ ዲሞክራሲያዊ ዓለም፡ መሰል እንስሳታት ከይተረፈ ዝኽበረለን ሃገራት እንርከብ፡ ደለይቲ ዲሞክራሲያዊ ለዉጢ ዜጋታታ፡ ነዚ ን 23 ሰነ 2016 ኣብ ጀነቫ ዝካየድ ሰላማዊ ሰልፊ እንዉድብ ዘሎና። እዚ ሰላማዊ ሰልፊ ዚ፡ መቐጸልታ ናይቲ ኣብ ዝተፈላለየ ክፋላት ዓለም፡ ሓላፍነታውያን ዜጋታት ከካይድዎ ዝጸንሑ ንጥፈታት ኮይኑ፡ ‘ደጊም ይኣክል፡ ኢሳያስ ቀታልን ኣጽናትን ስለ ዝኾነ  ንፍርዲ ይቅረብ’፡ ዝብል መሪሕ ቴማ፡ ብዉሑዱ ነዘን ዝስዕባ 7 ንጥፈታት ንከንተግብር ንብገስ ኣሎና።

• ኣብዛ ስርዓት ህግደፍ፡ ብምልኪ ሓኒቁ ተቁጻጺሩዋ ዘሎ ሃገርና ህዝቢ ቀሲኑ ብሓርነት ክነብር ስለዘይክእል፡ ስልጣን ንኽለቕቅ ንምጥላብ
• ተሳተፍቲ ሰላማዊ ሰልፊ፡ ኣብ ጎድኒ ህዝብና ምህላውና፡ ዳግማይ ንምርግጋጽ
• ንሓይልታት ምክልኻል፡ ኣብ ጎድኒ ህዝቡ ደዉ ንኽብል መጸዋዕታ ንምቕራብ
• ትም በሃልቲ (Silent Majority)ዲያስፖራ፡ ንሕልንኦም ከሕኩ ንምዝኽኻር
• መርማሪት ኮምሽን እቲ ምልካዊ ስርዓት ገበናት ኣንጻር ሰብኣውነት ከምዝፈጸመ ብምውሳን ኣብ ኣህጉራዊ ቤትፍርዲ ንዘቅረቦ ጻውዒት ብዘየማትእ መንገዲ ደገፍና ንምግላጽ
• ኣብ መሪሕነት’ቲ ስርዓት ዝቕንዐ ማዕቀብ (targeted/ smart sanction) ክጸንዕ መርማሪት ኮምሽን ንዘመሓላለፈቶ ጽውዒት ልዑል ደገፍ ንምሃብ
• ኣብ መወዳእታ ድማ ምልካዊ ስርዓት ኢሳይያስ ከምዚ እቲ ብውድብ ሕቡራት ሃገራት ዝተመዘ መርማሪ ኮምሽን[ውን ዝመስክረሉ ካብ ባርነት ዘይፍለ ግዳድ ዕስክርና፣ ማዕሰርት፣ ጾታዊ ዓመጽ፣ ምስዋር ሃላዋት፣ ቅትለትን፣ምጽናትን ምብትታን ስድራቤታትን ዝርከቦ ሰፊሕ ግሕሰት ሰብዓዊ ምሰላትን ገበናት ኣንጻር ሰብዓዊነትን ብምፍጻም ቀንዲ ምንጪ ስደት ኮይኑ ኤርትራዊ ኣድዳ ጅምላዊ ህልቂት ምድረበዳን ባሕርን ከምዝኸውን ጌይሩ ህዝቢ የጥፍእ ስለዘሎ ኣብ ውሽጥን ወጻእን ዝርከብ ህዝቢ ኤርትራ ንደሕንነቱን ቀጻልነት ሃገሩን ክለዓል ንምጽዋዕን እዩ

ካብ’ዚ ዕላማታት ዚ ተበጊሱ ኩሉ ደላይ ለውጥን ንለውጢ ዝቓለስን  መሓዛ ህዝቢ ኤርትራን ብሓደ ዕላማን ስሙር ውደባን ነዚ ብ 23 ሰነ 2016 ኣብ ጀነቫ ዝካሄድ ሰላማዊ ሰልፊ ተረኺቡ ምሳና ክውዕል ንጽውዕ።

(N.B ኣብ ቀዳማይ ጽሑፍና ኣስማት ውድባትን ምንቕስቓስን ክንዝርዝር ከሎና ነተን ኣብ ስዊስ ኣብ ትሕቲ ጽላል ደንበ ተቓዉሞ ስዊስ ነቲ መደብ ዘእንግዳ ዘለዋ ንምግላጽ ዝዓለመ ጽሑፍና ንገለ ውልቀሰባት ዲዩ ጥርናፈታት ጌጋ ተርድኦ ከይሕብ ብትሕትና ንሓትት። እንተ እዚ ሰላማዊ ሰልፊ እዚ ግን ናይ ኩሉን ንኹሉን ንመላእ ህዝብና ዘሕበረ፣ ሙዃኑ ደጊምና ነረጋግጽ

ንምጥቕላል፡ እዚ ኣብ 23 ሰነ 2016 ዝካየድ ዘሎ ሰላማዊ ሰልፊ፡ ውራይ ናይቶም ፡ ‘ብሃገርና ንግደስ ኢና፡ ስቓይ ህዝብና የሕምመና ኢዩ’፡ ንብል ዜጋታት፡ ስለ ዝኾነ ምዉዳቡን ምንጪ ቑጠባኡን ንሕና ምዃና ተረዲእና ካብ ዝሓለፈ ንላዕሊ ዝያዳ ክንሰርሕን ክነውፍን ባኣካል ተረኺብና ክንሳተፎ እናተላቦና ብደሓን ምጹ! ብደሓን ምጽኣ! ንብል

ኣብ ሳልሳይ ጽሑፍና  ኣገዳሲ ሓበሬታትን ንሰላማዊ ሰልፊ ዝምልከት ንህዝቢ ክትህብ’ያ።

ኣድራሻ ውፈያ

https://www.youcaring.com/geneva-23-demo-donatenow-579149#.V1H3T-TNX0Q.facebook
ቴሌፎን 0041 76 382 86 06

ንሓብሬታ ቴሌፎን

004178 865 70 77

004179 777 34 23

004176 596 49 95

ኢመል

E-mail demo.geneva23@gmail.com

ሰማእታትና ብግብሪ ይዘከሩ!

ዓወት ነቲ ዉጹዕ ህዝቢ!

ኮሚተ ዉዳበ ሰላማዊ ሰልፊ ጀነቭ